एमाले मुख्यालय निर्माणका लागि भाटभटेनी सुपर मार्केटका सञ्चालक मिनबहादुर गुरुङ र उनकी श्रीमती सावित्री गुरुङले १० रोपनी १४ आना जग्गा उपलब्ध गराएका हुन्
काठमाडौँ — प्रधानमन्त्री तथा एमाले अध्यक्ष केपी शर्मा ओलीले पार्टीको केन्द्रीय कार्यालय कीर्तिपरमा शिलान्यास गरेका छन् । एमालेले कीर्तिपुर नगरपालिका- २ मैत्रीनगरमा केन्द्रीय कार्यालय निर्माण गर्न लागेको हो ।
एमाले सचिवालयको बिहीबारको बैठकले कीर्तिपुरमा पार्टी केन्द्रीय कार्यालय निर्माण गर्ने निर्णय गरेको थियो ।
एमाले अध्यक्षसमेत रहेका प्रधानमन्त्री ओलीले शुक्रबार वैदिक विधिअनुसार पार्टी केन्द्रीय कार्यालय शिलान्यास गरेका हुन् । शिलान्यास कार्यक्रममा एमाले उपाध्यक्षसमेत रहेका उपप्रधानमन्त्री तथा अर्थमन्त्री विष्णु पौडेल, वरिष्ठ उपाध्यक्ष ईश्वर पोखरेल, महासचिव शंकर पोखरेल लगायतका एमाले नेता/कार्यकर्ताको उपस्थिति रहेको छ ।
एमालेले पार्टी सदस्यहरूको सदस्यता शूल्क र सहयोगबाट पार्टी मुख्यालय भवन निर्माण गर्ने बताएको छ । जमिन एमाले मुख्यालय निर्माणका लागि भाटभटेनी सुपर मार्केटका सञ्चालक मिनबहादुर गुरुङ र उनकी श्रीमती सावित्री गुरुङले उपलब्ध गराएका हुन् । उक्त जग्गा १० रोपनी १४ आना रहेको एमालेका महासचिव शंकर पोखरेलले बताएका छन् ।
२०७२ सालको भूकम्पपछि काठमाडौं महानगरपालिका–१४ मदननगर बल्खुमा रहेको एमाले पार्टी कार्यालय ध्वस्त भएको र त्यसयताका ९ वर्ष विभिन्न ठाउँमा भाडाका भवनमा बस्दै आएको थियो । हाल च्यासलस्थित पार्टी कार्यालयमा पनि हरेक वर्ष बाढीको सामना गर्नुपरेकाले स्थायी रूपमा केन्द्रिय कार्यालय बनाउने काम सुरु गरिएको एमालेले जनाएको छ ।
एमाले पार्टी कार्यालय एक वर्षभित्र निर्माण भइसक्ने बताइएको छ ।
