बुटवल — राजधानी प्रवेशमार्गको झ्याप्ले खोलाको पहिरोमा पुरिएर परिवारै गुमाएपछि गुल्मी दरबार गाउँपालिका–७ लामडाँडाका ३४ वर्षीय विवेक रायमाझी सम्हालिन सकेका छैनन् । उनले पहिरोमा २ वर्षका छोरा, २६ वर्षीया श्रीमती र ६३ वर्षका बुबा गुमाएका छन् । 

विवेकले ११ वर्षको हुँदा आमा गुमाए । बाबु जुद्धबहादुर भारतको हैदरबादमा जागिरे थिए । घरमा अर्को सहारा नभएपछि विवेक र भाइ विजय मामा मेखबहादुर खत्रीको घरमा बस्न थाले । मामाघरमा हुर्किएका विवेकले २०७८ सालमा प्रमितासँग विवाह गरे । विवाहपछि बुटवल झरे । बुटवलको तिलोत्तमा नगरपालिका–३ शान्तिचोकमा बाइक अड्डा नामको मोटरसाइकल ग्यारेज खोले । श्रीमती प्रमिताले नास्ता पसल चलाइन् । 

अर्को साथीसँग मिलेर फल्स सिलिङको व्यापार पनि सुरु गरेका थिए । विवेकका भाइ विजय काठमाडौंमा बैंकको जागिरे थिए । विजयले दाजुलाई काठमाडौंमा सँगै बसेर व्यवसाय गर्न आग्रह गरेपछि ६ महिनाअघि विवेकले थानकोटमा मोटरसाइकल ग्यारेज खोलेका थिए । प्रमिता नागरिकताको प्रतिलिपि बनाउन काठमाडौंबाट १५ दिनअघि गुल्मी पुगेकी थिइन् ।

केही दिन माइतीमा बसेर उनी नागरिकता बनाएर बुधबार बुटवल झरिन् । रोजगारीका लागि भारतको हैदराबादमा रहेका विवेकका बुबा (प्रमिताका ससुरा) बिहीबार बुटवल आउँदै थिए । बुटवलमा भेट भएपछि शुक्रबार लु१ज ४५७८ नम्बरको बिंगर गाडी चढेर बुटवलबाट काठमाडौं हिँडेकी प्रमिता, उनका २ वर्षका छोरा कृश र ६३ वर्षका ससुरा जुद्धबहादुर धादिङको झ्याप्ले खोलाको पहिरोमा पुरिए । तीनै जना पहिरोमा पुरिएपछि विवेक अहिले एक्ला भएका छन् । परिवारका नाममा उनीसँग अहिले भाइ विजय मात्र छन् ।

झ्याप्ले खोलाको पहिरोमा त्यही गाडीमै पुरिएर स्याङ्जाको गल्याङ नगरपालिका–३ स्थायी घर भएर बुटवलको कालिका मानवज्ञान माविमा कक्षा १० मा पढ्ने १५ वर्षका जुम्ल्याहा दाजुबहिनी दीपेश र दीपिका भट्टराई र उनीहरूकी आमा सीताले पनि ज्यान गुमाएका छन् । कालिका मानवज्ञान माविका ‘टपर’ मध्ये थिए, दीपेश र दीपिका । उनीहरू एस्ट्रोनोमी (खगोल शास्त्र) का पनि जिज्ञासु थिए । नेपाल एस्ट्रोनोमिकल सोसाइटीको आयोजनामा हुन लागेको कार्यक्रम ‘नेसनल एस्ट्रोनोमी ओलम्पियाड–२०२४’ मा भाग लिन आमा सीतासँगै उनीहरू शुक्रबार बुटवलको राजमार्ग चौराहाबाट काठमाडौंका लागि माइक्रो चढेका थिए । 

तर, काठमाडौं पुगेर प्रतियोगितामा सहभागी हुने र दोस्रो चरणमा बंगलादेशमा उत्कृष्ट भएर अमेरिका पुग्ने दाजुबहिनीको सपना पहिरोमै पुरियो । बंगलादेशमा आयोजना हुने उक्त ‘कन्फ्रेन्स’ मा ३२ देशका विद्यार्थी सहभागी हुने विद्यालयले जनाएको छ । भट्टराई परिवार बुटवल उपमहानगर पालिकास्थित योगीकुटीमा बस्दै आएको थियो । कालिका मानवज्ञान माविका प्राचार्य दिनेश थापाका अनुसार दीपेश र दीपिका आफैं ‘कन्फ्रेन्सको फारम’ भरेर छनोटमा परेका थिए । ‘कार्यक्रम यही असोज १७ गते हो,’ उनले भने, ‘सायद काठमाडौंमा पढ्ने दाइदिदीसँग पनि भेटघाट गर्ने मनसायले दुई/चार दिनअघि नै गएको हुनुपर्छ ।’