नेपालमा भारतको 'माइक्रो म्यानेजमेन्ट'बारे शर्मा : हाम्रा पार्टी र प्रणालीले निमन्त्रणा पो गरिरहेको छ कि ?

संसदीय सुनुवाइ समितिको आइतबारको बैठकमा शर्माले भारतका विदेशमन्त्री एस जयशंकरले एक अन्तर्वार्तामा भनेका कुरा उल्लेख गर्दै नेपालमा नेताहरूले भारतीय हस्तक्षेप निम्त्याएको हो कि भन्ने आशंका व्यक्त गरे । उनले भारतले छिमेकी मुलुकहरू खासगरी नेपालमा हस्तक्षेप गरेको कुरा आफूलाई थाहा नभएको बताए ।

'भारतले माइक्रो म्यानेजमेन्ट गरिरहेको छ भन्ने कुरा मलाई थाहा छैन । त्यो राजनीतिक तहमा धेरै थाहा हुने कुरा भयो । तर म भारतबाट आएपनि फेरि भारत जान लागेको हुनाले इन्डियन न्यूजपेपर र युट्युबहरू हेरिरहन्छु । हिजो छाडि अस्ति छिमेकी मुलुकका विषयमा भारतको परराष्ट्रमन्त्री जयशंकरसँग अन्तर्वार्ता भइरहेको थियो । उहाँले भन्नुभएको थियो छिमेकीहरू सबैसँग हाम्रो सम्बन्ध केही न केही कम्प्लेक्सिटी छ,' डा. शर्माले भने, 'उहाँले त्यो इन्टरभ्यूमा के भन्नुभएको छ भने कम्प्लेक्सिटी हुन्छ, नेबरिङ कन्ट्रीमा कुन देशमा कुन एरियामा कम्प्लेक्सिटी छैन र ? उहाँले यो पनि कुरा गर्नुभयो हामीलाई गर्‍यो भनेर भन्छन् छिमेकी देशमा तर कति त त्यहाँको डिमान्ड पनि त हुनसक्ला भनेर उहाँले कूटनीतिक रूपमा त्यहाँकै राजनीतिज्ञलाई त्यस्तो डिमान्ड पनि गरेका हुन् कि भनेजस्तो संकेत उहाँले दिनुभएको छ । मैले थाहा पाएर भनेको होइन तर उहाँलाई कोट गरेर भन्दा हाम्रो राजनीतिक पार्टीभित्र, हाम्रो सिस्टमभित्र पनि कहिँ त्यस्तो समस्या पो छ कि ? हामीले 'इन्भाइट' पो गरिरहेका छौं कि ?'

जयशंकरको भनाइलाई थप पुष्टि गर्नका लागि शर्माले क्यानडाका प्रधानमन्त्रीले छिमेकी अमेरिकालाई लिएर भनेको कुरा पनि उल्लेख गरेका थिए । 'पहिला क्यानडाको प्रधानमन्त्रीले के भन्नुभएको थियो भने अमेरिका यस्तो देश हो रे, यसो सुतेर घुर्‍यो भनेपनि हामीलाई असर गर्छ, यसो पल्टिन लाग्यो भने पनि असर गर्छ भने‍र उहाँले भन्नुभएको थियो त्यो खुब प्रचलनमा छ' भारतले छिमेकमा हस्तक्षेप गरेको भन्ने कुरा पनि यस्तै भएको शर्माले बताए ।

शर्मासहित ४ प्रस्तावित राजदूतहरूको संसदीय सुनुवाइ सकिएको छ । उनीहरूको नाम भने अनुमोदन भएको छैन । बाँकी १३ राजदूतको सुनुवाइ सकिएपछि सबैको सँगै नाम अनुमोदनको निर्णयबारे छलफल गरिने सुनुवाइ समिति सचिवालयले जनाएको छ ।

सम्बन्धित समाचार :

• भारतसँग ईपीजी र सीमा विवादको विषय राजदूतको तहभन्दा धेरै माथि गइसक्यो : शर्मा
• मलाई भारतको राजदूतमा सिफारिस गरेको जवाफ सरकारले दिनुपर्ने हो : डा. शर्मा
• नेपाललाई ईयूको 'एयर सेफ्टी लिस्ट'बाट निकाल्न भूमिका खेल्छु : प्रस्तावित राजदूत रुपाखेती
• डेनमार्कसँग व्यापार गर्ने र लगानी ल्याउने चुनौती छ : प्रस्तावित राजदूत तुलाधर
• बीआरआईबारे सरकारको निर्णय कार्यान्वयनमा भूमिका खेल्छु : प्रस्तावित राजदूत ओली