काठमाडौँ — नेपाली कांग्रेसको महासमिति बैठकमा पेश हुने विभिन्न दस्तावेजहरु केन्द्रीय कार्यसमितिबाट पारित भएका छन् । यही फागुन ७ देखि १० गतेसम्म हुने महासमिति बैठकमा चार वटा प्रतिवेदनहरु पेश हुँदैछन् ।

बिहीबार र शुक्रबार बसेको केन्द्रीय समिति बैठकमा उपसभापति पूर्णबहादुर खड्काको नीति, महामन्त्री  गगन थापाको  सांगठनिक तथा अर्को महामन्त्री विश्वप्रकाश शर्माको राजनीतिक र पार्टीका प्रवक्ता एवम् अर्थमन्त्री प्रकाशशरण महतद्वारा प्रस्तुत आर्थिक अवस्था, सम्भावना र भावी दिशा सम्बन्धी प्रतिवेदनहरुमाथि छलफल भएको थियो ।

दुई दिनसम्म छलफलपछि संशोधनसहित चार वटै प्रतिवेदनहरु पारित भएको मुख्यसचिव कृष्णप्रसाद पौडेलले जानकारी दिए। 

उनका अनुसार बैठकमा नेताहरुले राखेको धारणा र सुझावहरुलाई समेत मध्यनजर गर्दै संशोधनसहित प्रतिवेदनहरु पास भएका छन् । अब ती संशोधनसमेतलाई समेटेर तयार गरिएका दस्तावेज महासमिति हलमा पेश गरिनेछ ।