नेपाली सेनाको क्षमता वृद्धिका लागि अमेरिकी एसपीपी सम्झौता : सांसद विश्वकर्मा- समाचार - कान्तिपुर समाचार
कान्तिपुर वेबसाईट
AdvertisementAdvertisement

नेपाली सेनाको क्षमता वृद्धिका लागि अमेरिकी एसपीपी सम्झौता : सांसद विश्वकर्मा

कान्तिपुर संवाददाता

काठमाडौँ — नेपाली कांग्रेसका सांसद मीन विश्वकर्माले अमेरिकाद्वारा प्रस्तावित स्टेट पार्टनरसीप प्रोग्राम (एसपीपी) सम्झौता नेपाली सेनाको क्षमतावृद्धिका लागि भएको बताएका छन् ।

मीनबहादुर विश्वकर्मा । फाइल तस्बिर ।

मंगलबार नयाँबानेश्वरस्थित संसद भवनमा सञ्चारकर्मीहरुलाई संक्षिप्त प्रतिक्रिया दिँदै सांसद विश्वकर्माले एसपीपी सम्झौता नेपाली सेनाको सशक्तिकरण, आधुनिकीकरण र सैन्य क्षमता वृद्धिका लागि भएको बताए ।

उनले नेपाली सेनाले संयुक्त राष्ट्रसंघमा शान्ति सेनाको रुपमा खेलेको भूमिकालाई थप बलियो बनाउन उक्त सम्झौताले सहयोग गर्ने बुझाइमा नेपाल सरकार रहेको बताए । ‘नेपाली सेनाको सशक्तिकरणका लागि, नेपाली सेनाको आधुनिकीकरणका लागि र नेपाली सेनाको सैन्य क्षमता वृद्धिको लागि साथै संयुक्त राष्ट्रसंघमा नेपाली सेनाले खेलेको महत्वपूर्ण शान्ति सेनाको भूमिकालाई थप क्रियाशील र बलियो बनाउनका लागि हो भन्ने बुझाइमा नेपाल सरकारले काम गरिराखेको छ । अमेरिकी सेना र सेनाका प्रतिनिधिहरु पनि विगतमा पनि आउनुहुन्थ्यो अहिले पनि त्यसै सीमाभित्र रहेर आउनुभएको भन्ने म बुझ्दछु,’ सांसद विश्वकर्माले भने ।

प्रकाशित : जेष्ठ ३१, २०७९ १८:५०
प्रतिक्रिया
पठाउनुहोस्

अमेरिकी एसपीपी सम्झौता गरिए परराष्ट्र नीति ध्वस्त हुन्छ : रावल

कान्तिपुर संवाददाता

काठमाडौँ — नेकपा (एमाले)का सांसद भीम रावलले अमेरिकाद्वारा प्रस्तावित स्टेट पार्टनरसीप प्रोग्राम (एसपीपी) सम्झौता गरिए देशको परराष्ट्र नीति नै ध्वस्त भएर जाने दाबी गरेका छन् ।

फाइल तस्बिर ।

आफूहरूले एमसीसी पारित गर्दा नै नेपाललाई अमेरिकी हिन्द प्रशान्त रणनीतिको अंग बनाएर नेपालको स्वतन्त्र परराष्ट्र नीतिलाई ध्वस्त गर्ने काम हुँदैछ भन्ने आशंका गरेको उल्लेख गर्दै उनले एसपीपीका दफाहरू र घटनाक्रमले पनि त्यतै संकेत गरेको उनको भनाइ छ ।

यस विषयमा सरकारले यथार्थ स्पष्ट गराउनुपर्ने उनको माग थियो । ‘यदी त्यस्तोमा नेपालले प्रवेश गर्ने हो भने नेपालको संविधानको धारा ५१ को ड र अरु २७९, अरु सबै हाम्रो जुन अहिले असंलग्न स्वतन्त्र परराष्ट्र नीति हो, जो संयुक्त राष्ट्रसंघको वडापत्रमा आधारित छ । असंलग्न पञ्चशिलका सिद्धान्तमा आधारित छ । हामी चीन र भारतजस्ता विशाल देशमा रहेको जुन प्रकारको संवेदनशील भू–राजनीतिमा छौं । यो देशको सम्पूर्ण रुपमा परराष्ट्र नीति नै ध्वस्त भएर जान्छ । त्यस्तो गम्भीर कुरा बाहिर आएको छ । यो विषय नेपालजस्तो देशको लागि अत्यन्त गम्भीर विषय छ । यदी यस्तो हो भने त नेपाललाई एउटा सैनिक गठबन्धनतिर लैजाने र नेपाललाई अमेरिकी हिन्द प्रशान्त रणनीतिको अंग बनाएर नेपालको स्वतन्त्र परराष्ट्र नीतिलाई ध्वस्त गर्ने राष्ट्रहित विरोधी काम हुँदैछ र यसका कतिपय दफाहरुले त्यसतर्फ संकेत गर्छन् भनेर हामीले जुन कुरा उठाएका थियौं, अहिले घटनाक्रमले त्यो कुरातर्फ संकेत गरिरहेका छन् । र त्यो कुरा दिनदिनै अझ प्रवल रुपमा अगाडि देखा पर्दै आएको छ,’ सांसद रावलले भने ।

यस्तै नेकपा (माओवादी केन्द्र)का प्रमुख सचेतक देव गुरुङले पनि एसपीपी सम्झौता गरिए राष्ट्रघात हुने र नेपाली सेना आइपीएसको अंग बन्न जाने बताए । यसले नेपालको राष्ट्रिय स्वाधिनतामाथि ठूलो समस्या पैदा गर्ने उनको तर्क थियो ।

प्रकाशित : जेष्ठ ३१, २०७९ १८:४६
पूरा पढ्नुहोस्
प्रतिक्रिया
पठाउनुहोस्
×