अमेरिकाको एसपीपी प्रस्तावबारे परराष्ट्रमन्त्रीले भने - सरकार कुनै सैन्य गठबन्धनमा जाँदैन- समाचार - कान्तिपुर समाचार

अमेरिकाको एसपीपी प्रस्तावबारे परराष्ट्रमन्त्रीले भने - सरकार कुनै सैन्य गठबन्धनमा जाँदैन

कान्तिपुर संवाददाता

काठमाडौँ — परराष्ट्रमन्त्री नारायण खड्काले सरकार कुनै पनि सैन्य गठबन्धनमा नजाने बताएका छन् । अमेरिकी जर्नेलको नेपाल भ्रमणका क्रममा आएको ‘स्टेट पार्टनरसीप प्रोग्राम’ (एसपीपी) प्रस्ताव सम्बन्धमा मन्त्री खड्काले उक्त कुरा बताएका हुन् । 

परराष्ट्रमन्त्री डा. नारायण खड्का । तस्बिर : रोशन सापकोटा/प्रधानमन्त्री शेरबहादुर देउवाको सचिवालय

प्रतिनिधिसभाको मंगलबारको बैठकमा मन्त्री खड्काले अमेरिकी सेनाको प्रशान्त क्षेत्रका प्रमुख चार्ल्स ए. फ्लिनको नेपाल भ्रमणका क्रममा एसपीपीमा हस्ताक्षर अर्थात् अमेरिकी सैन्य गठबन्धन गर्ने विषय हल्लामात्रै भएको दाबी गरे ।

उनले कांग्रेस नेतृत्वको सरकार कुनै पनि सैन्य गठबन्धनमा नजाने बताए । ‘अमेरिकाका जर्नेलको नेपालको भ्रमण र उहाँको भेटघाट यो कहीं अमेरिकी सैन्य गठबन्धनमा नेपाललाई लाने प्रस्ताव हो कि, भन्ने १० बुँदे केही पत्रपत्रिकाले लेखेका छन् । स्टेट पार्टनरसीपअन्तर्गत हिजोको दिनमा एमसीसी आइरहँदा हामीले इन्डो-प्यासिफिकका कुरा गर्‍यौं । यसमा कुनै गठबन्धनमा सहभागी हुने कुरा भएको छैन । सैन्य गठबन्धनमा फस्न लाग्यो नेपाल भन्ने बाहिर आएको छ । त्यो होइन,' उनले भने, 'कांग्रेस नेतृत्वको सरकार स्वाभीमानी, राष्ट्रवादी र देशभक्ति रहेको छ । विगतमा प्रधानमन्त्री, राष्ट्रपतिको भ्रमण हुँदा कुरा उठेनन् । कहिले काहीं यस्ता विषय उठाइने गरिएको छ । तर संसद्मा‌ म पूर्ण विश्वासकासाथ निवदेन गर्न चाहन्छु । स्वाभीमानी, राष्ट्रवादी र मुलुकको हितमा काम गर्ने सरकारले कुनै खालका सैन्य गठबन्धनमा जाँदैन । आवश्यकता छैन ।'

प्रधानमन्त्री र परराष्ट्रमन्त्रीलाई कुनै पनि सैन्य गठबन्धनमा जान आवश्यकता नरहेको उनले बताए । उनले भने, 'के को लागि टाढाको देशले कुन हवाई मार्ग प्रयोग गरेर कुन दिशा प्रयोग गर्छ । हामी पत्रपत्रिकाको हल्लाको पछि नजाऔं ।’

परराष्ट्रमन्त्री खड्काले प्रधानमन्त्री देउवाको अमेरिका भ्रमण तयारीलाई शंकाको दृष्टिले नहेर्न आग्रह गरेका थिए । दुई पक्षको सम्बन्धलाई थप मजबुत बनाउन, आपसी सम्बन्धलाई गति प्रदान गर्न र सम्बन्धका नयाँ आयाम ल्याउनका लागि दुई देशको भ्रमण तथा छलफल अपरिहार्य रहेको उनले दाबी गरे ।

प्रकाशित : जेष्ठ ३१, २०७९ १८:१९
प्रतिक्रिया
पठाउनुहोस्

वाग्मती प्रदेशसभामा ५ वटा प्रतिवेदन पेस

सुवास विडारी

मकवानपुर — वाग्मती प्रदेशसभाको बैठकमा विभिन्न समितिका ५ वटा प्रतिवेदन पेस भएको छ । प्रदेशसभाको मंगलबार बसेको बैठकमा लोकसेवा आयोग र संसदीय समितिको वार्षिक प्रतिवेदन पेस भएका हुन् । मुख्यमन्त्री राजेन्द्रप्रसाद पाण्डेले प्रदेश लोकसेवा आयोगको ०७७/७८ को वार्षिक प्रतिवेदन सदनमा पेस गरेका थिए ।

प्रदेश मामिला समितिका सभापति माधव पौडेल, अर्थ तथा विकास समितिका सभापति नारायणबहादुर सिलवाल, शिक्षा, स्वास्थ्य तथा कृषि समिति सभापति केशवप्रसाद पोखरेल र उद्योग पर्यटन तथा वातावरण समितिका सभापति रमा आलेले आफ्नो समितिको वार्षिक प्रतिवेदन सदनमा पेस गरेका हुन् ।

प्रदेशसभा बैठकमा आर्थिक मामिला तथा योजनामन्त्री शालिकराम जम्कट्टेलले आर्थिक सर्वेक्षण २०७८/७९ पेस गरेका थिए । प्रदेश सरकारले असार १ गते अर्थात् बुधबार आगामी आवको बजेट ल्याउँदैछ । प्रदेशसभा बैठक बुधबार अपराह्न ४ बजे बस्ने गरी सभामुख सानुकुमार श्रेष्ठले स्थगित गरेका छन् ।

प्रकाशित : जेष्ठ ३१, २०७९ १८:१२
पूरा पढ्नुहोस्
प्रतिक्रिया
पठाउनुहोस्
×