आफू पक्षीय कार्यकर्ता भेलामा सिटौलाले भने, 'व्यक्ति हैन राष्ट्र केन्द्रीत कांग्रेस निर्माणमा जुट्नुस्'- समाचार - कान्तिपुर समाचार

आफू पक्षीय कार्यकर्ता भेलामा सिटौलाले भने, 'व्यक्ति हैन राष्ट्र केन्द्रीत कांग्रेस निर्माणमा जुट्नुस्'

कान्तिपुर संवाददाता

काठमाडौँ — कांग्रेस नेता कृष्णप्रसाद सिटौलाले आफू पक्षीय कार्यकर्ता भेलामा व्यक्ति नभएर राष्ट्र केन्द्रीत पार्टी निर्माणमा जुट्न आग्रह गरेका छन् । १४औं महाधिवेशनको पूर्व सन्ध्यामा कार्यकर्ताहरुलाई निर्देशन दिँदै उनले भने,' कांग्रेसको विचार, सिद्धान्त र नीति अनुसार काम गर्नुहोस् । व्यक्ति केन्द्रीत नभएर राष्ट्र केन्द्रीत पार्टी निर्माणमा जुट्न आग्रह गर्छु । '


उनले कांग्रेसमा जागरण आएको बताउँदै अबको कांग्रेस युवाहरुले नेतृत्व गर्नुपर्ने बताए । ' अब युवाहरु हिँड्नुपर्छ । युवाहरुको नेतृत्व गर्नुपर्छ,' उनले भने,' अब युवाहरुकै पालो हो । म युवाहरुलाई सबैको विश्वास जित्न र विश्वासपात्र बन्न आग्रह गर्छु ।'

उनले अभाव,जोखिम र संकटमा आफूलाई साथ दिनेलाई निरन्तरता दिने र सधैं सहयोग हुने बताए ।

उनले १३औं महाधिवेशनपछि बितेको ५ वर्षमा आफूले के पाए भन्दा पनि पार्टी एकताका लागि काम गरेको उल्लेख गरे । नेताहरुले राजनीतिलाई इमान्दारिताको बाटोतर्फ डोर्‍याउनुपर्नेमा उनको जोड छ ।

प्रकाशित : मंसिर २३, २०७८ १६:४३
प्रतिक्रिया
पठाउनुहोस्

बजार अनुगमन कपडामा केन्द्रित, तीन पसललाई जरिवाना

कान्तिपुर संवाददाता

काठमाडौँ — जाडो मौसम सुरु भएसँगै सरकारले न्यानो लत्ताकपडामा अनुगमन तीव्र पारेको छ । लत्ताकपडा क्षेत्रमा बढी मूल्य लिएको, ठगी गरेको जस्ता उजुरी परेपछि  वाणिज्य आपूर्ति तथा उपभोक्ता संरक्षण विभागले अनुगमन कपडामा केन्द्रित गरिएको जनाएको छ । अनुगमनको क्रममा भने बिलबिजककै समस्या देखिएको विभागका सूचना अधिकारी धनेश्वर पौडेलले बताए ।

‘जाडो महिना सुरू भएसँगै न्यानो कपडाको माग बढ्दो छ । लत्ताकपडा क्षेत्रमा चहलपहल बढेसँगै ठगीको सम्भावना पनि उत्तिकै हुन्छ, उजुरी पनि परेको छ,’ उनले भने, ‘उजुरीका आधारमा अनुगमन पनि त्यतातिर केन्द्रित बनाएका छौं ।’ विभागले बुधबार गरेको ६ व्यवसायिक फर्मको अनुगमनमध्ये ५ वटा लत्ताकपडाकै थियो ।

५ मध्ये ३ फर्मलाई अनुगमनस्थलमै जरिवाना गरिएको छ । बाँकी दुई व्यवसायिक फर्मलाई कागजातसहित विभागमा उपस्थित हुन निर्देशन दिएको पौडेलले बताए । ‘ललितपुरमा रहेको मेस्मराइज फेसन, एस्टिलो इन्टरप्राइजेज र पेज थ्री ट्रेडर्सलाई उपभोक्ता संरक्षण ऐनको दफा ३८ को (घ), ३९, १ (क)को कसुरमा ५/५ हजार रुपैयाँ जरिवाना गरेका छौं,’ उनले भने, ‘ललितपुरकै एक्सप्रेस प्लस र ट्याग योर आइडेन्टिटी तफाल्हो रेडिमेड तथा थान कपडा पसललाई कागजातसहित ३ दिनभित्र विभागमा उपस्थित हुन निर्देशन दिएका छौं।’


प्रकाशित : मंसिर २३, २०७८ १६:३०
पूरा पढ्नुहोस्
प्रतिक्रिया
पठाउनुहोस्
×