१८.१२°C काठमाडौं
काठमाडौंमा वायुको गुणस्तर: १२४

राप्रपामा पुस्तान्तरण

दलहरुमा पुरानै नेतृत्वले निरन्तरता पाइरहेका बेला लिङ्देनको विजयले राजनीतिक वृत्त तरंगित
मणि दाहाल

काठमाडौँ — राष्ट्रिय प्रजातन्त्र पार्टीको अध्यक्षमा राजेन्द्र लिङ्देन विजयी भएसँगै नेपालको राजनीतिक वृत्तमा एकखालको तरंग आएको छ । त्यसको एउटै कारण हो– राप्रपामा पुस्तान्तरण । राप्रपालाई ‘कब्जा’ मा राख्दै आएका कमल थापालाई पराजित गरेपछि लिङ्देनले आफ्नो पार्टीको महाधिवेशनलाई एमालेसँग तुलना गरेका छन् ।

राप्रपामा पुस्तान्तरण

अध्यक्षमा निर्वाचित भएपछिको पहिलो औपचारिक कार्यक्रममा उनले देशभरको ध्यान राप्रपातर्फ आकर्षित भएको बताए । ‘राप्रपामा मात्रै होइन, देशमै पुस्तान्तरणको मुद्दा लिएर जानेछु,’ उनले भने, ‘राप्रपाको महाधिवेशनलाई देशका अन्य पार्टीका मानिस, बुद्धिजीवी र पत्रकारको ध्यान कम आकर्षित भएको छ । यो ध्यानाकर्षण एमाले महाधिवेशनमा भन्दा कम छैन ।’

नेपालगन्ज उपमहानगरपालिकाका मेयर धवलशमशेर राणासँग मिलेर लिङ्देनले उम्मेदवारी घोषणा गरेदेखि नै महाधिवेशनमा चासो निकै बढेको थियो । संसद्मा राप्रपाका एक मात्रै प्रतिनिधि लिङ्देनले पार्टी नेतृत्वमा दाबी गरेदेखि नै महाधिवेशनको विषयले समाचारमाध्यममा स्थान पाएको थियो भने नेतृत्वमा पुस्तान्तरण हुनुपर्ने माग गर्दै आएका अन्य दलका नेताहरूले समेत चासोका साथ हेरेका थिए ।

कांग्रेसभित्र नेतृत्व पुस्तान्तरण हुनुपर्ने बताउँदै आएका विमलेन्द्र निधिले निर्वाचन परिणाम सार्वजनिक हुनेबित्तिकै विज्ञप्ति जारी गर्दै लिङ्देनलाई बधाई दिए । ‘राप्रपाको यो महाधिवेशनले नेपाली राजनीतिमा पुरानो नेतृत्वबाट नयाँमा पुस्ता हस्तान्तरणको प्रक्रिया प्रारम्भ भएको सन्देश दिएको छ,’ निधिले आइतबार विज्ञप्तिमार्फत भनेका छन् । निधि अर्को साता हुने कांग्रेसको १४ औं महाधिवेशनमा सभापतिका आकांक्षी हुन् ।

पञ्चायतकालबाटै राजनीतिमा होमिएका लिङ्देनले देशभर पुस्तान्तरणको अभियान चलाउने र देशको वैकल्पिक प्रजातान्त्रिक नभई मुख्य राजनीतिक शक्तिका रूपमा पार्टीलाई स्थापित गर्ने दाबी गरेका छन् । उनी बहुदलीय व्यवस्था पुनःस्थापना भएपछि गठन भएको राष्ट्रिय प्रजातान्त्रिक विद्यार्थी संगठनको संस्थापक अध्यक्ष बनेका थिए ।

लामो समयसम्म निवर्तमान अध्यक्ष थापाको मुख्य खम्बाका रूपमा रहेका लिङ्देन पछिल्लो समय भने टाढिँदै गएका थिए । निर्मल निवाससँग थापाको बढ्दो दूरी र पार्टीभित्र गुम्सिएर रहेको असन्तुष्टिलाई उपयोग गर्दै लिङ्देनले राप्रपाको अध्यक्षमा बाजी मारेका हुन् । राप्रपाका विषयमा पुस्तक लेखेका केन्द्रीय सदस्य गोविन्दराज खनियाँले लिङ्देनको जितले विगतमा राप्रपाका बारेमा रहेको बुझाइमा परिवर्तन आउने अपेक्षा लिएको बताए ।

‘हिजोको दिनमा मानिसको नजरमा सम्भ्रान्त वर्ग शासकहरूले स्ट्याटस राखिराख्नका लागि खोलेको क्लबजस्तो थियो, त्यही अवस्थामा राप्रपा धेरै लामो समयसम्म चल्यो,’ उनले भने, ‘क्लबका सदस्यहरूको झगडाले अर्को क्लब बन्ने र अप्ठ्यारो समयमा जोडिने जस्तो राजनीतिक संस्कार धेरै कम भएको परिस्थिति थियो । अब त्यो अवस्था र नजरमा परिवर्तन आउँछ भन्ने लागेको छ ।’ लिङ्देननिकट रहेका खनियाँले पार्टीको छवि सुधारको विषयलाई नवनिर्वाचित अध्यक्षले ध्यान दिने बताएका छन् ।

खनियाँले जापान, बेलायतमा रहेको जस्तो राजासहितको प्रजातान्त्रिक शासन व्यवस्था हुनुपर्छ भनेर राप्रपालाई उदारवादी पार्टी हुने कल्पना गरे पनि त्यसअनुसार सञ्चालन नभएको बताए ।स्थानीय स्वायत्ततासहितको हिन्दु अधिराज्य स्थापना हुनुपर्ने बताउँदै आएको छ ।

नेतृत्वमा पुगेका लिङ्देनका लागि सबैभन्दा पहिलो चुनौती आन्तरिक रूपमा आउने देखिन्छ । निर्वाचनमा पराजित भएका कमल थापा प्रमाणपत्र वितरण तथा शपथग्रहण कार्यक्रममा नआएर असन्तुष्टि देखाइसकेका छन् । उनले लिङ्देनलाई बधाई दिए पनि निरन्तर रूपमा ट्वीट गर्दै आक्रोश व्यक्त गरेका छन् । पराजयबाट क्षुब्ध भएका थापा पूर्वराजा ज्ञानेन्द्र शाहमाथि पनि जाइलागेका छन् ।

राजावादी दल राप्रपा सञ्चालनमा निर्मल निवासको संकेत महत्त्वपूर्ण हुने गरेको छ । ‘यो राजेन्द्र लिङ्देन र कमल थापाको होइन, ज्ञानेन्द्र शाह र कमल थापाको चुनाव हो,’ थापानिकट नेता उद्धव पौडेलले भने, ‘नत्र अन्य पोस्टमा सबै कमल थापाको मानिस आउने, कार्यकारिणी समिति सदस्यहरू सबै आउने तर कमल थापाले हार्ने हुन्छ ?’ दरबारमार्गस्थित होटल याक एन्ड यतिमा आइतबार बिहान परिणामको विषयमा थापा समूहको समीक्षा बैठक भएको थियो ।

१ सय ४९ जना निर्वाचित सदस्यमा पदाधिकारी र केन्द्रीय सदस्य थापा प्यानलमा रहेका अधिकांश आएका छन् । पदाधिकारीमा महामन्त्रीमा धवलशमशेर जबरा र उपाध्यक्षमा विक्रम पाण्डेबाहेक सबै थापा प्यानलबाट निर्वाचित भएका छन् । उपाध्यक्ष पाण्डे लिङ्देन र थापा दुवै प्यानलमा रहेका थिए ।

थापा प्यानलबाट उपाध्यक्षमा बुद्धिमान तामाङ, ध्रॅवबहादुर प्रधान, रोशन कार्की, महामन्त्रीमा भुवन पाठक र कुन्ती शाही विजयी भएका छन् । उनीहरूले प्रज्ञा भवनमा भएको कार्यक्रममा शपथग्रहण गरे र प्रमाणपत्र बुझ्नेबित्तिकै बाहिरिए । ‘सबैलाई समेटेर लैजाने विषयमा अध्यक्षको ध्यान हुनेछ, विगतमा जस्तो महाधिवेशनपछि राप्रपा फुट्ने भन्ने हुँदैन,’ खनियाँले भने, ‘एजेन्डा पूरा हुँदैन कि भनेरनिराश भएकाहरूमा नयाँ आशाको सञ्चार हुन्छ ।’

‘अहिलेको चासो भनेको नवनिर्वाचित अध्यक्षले कसरी पार्टीलाई अघि लैजानु हुन्छ भन्ने नै हो,’ केन्द्रीय सदस्य भरत पाठकले भने, ‘राप्रपाका लिङ्देनभन्दा धेरै सिनियर नेता हुनुहुन्छ ।’ १ सय ९९ सदस्यीय कमिटीमा अध्यक्ष लिङ्देनले पदाधिकारी र सदस्य गरी ५० जना मनोनीत गर्न सक्ने व्यवस्था छ ।

आइतबार थापानिकट पदाधिकारी कार्यक्रमबाट चाँडै बाहिरिनुको कारण पनि बुद्धिमान तामाङलाई मर्यादाक्रममा अघि नराखेकामा असन्तुष्टिको जनाउ भएको नेताहरूले बताएका छन् । शपथग्रहण कार्यक्रममा शनिबार सम्बोधन गर्दै लिङ्देनले सबैलाई समेटेर लैजाने बताएका छन् । उनले निरन्तरतासहितको परिवर्तन चाहेको बताए ।

‘कमल थापा पनि यहाँ हुनुभएको भए सुनमा सुगन्ध हुन्थ्यो, फेरि पनि पूर्ण विश्वासमा छु, हामी सँगै हुनेछौं, उहाँहरूको योगदान राप्रपाले सधैं प्राप्त गर्नेछ,’ उनले भने, ‘पार्टीका संस्थापक अध्यक्ष लोकेन्द्रबहादुर चन्दको भूमिका सदा जीवित राख्नेछौं ।’ उनले निरन्तरतासहितको परिवर्तन देशका लागि मात्रै नभएर पार्टीमा पनि लागू हुने बताए ।

प्रकाशित : मंसिर २०, २०७८ ०७:२२
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?