ताजपुरिया समुदायबाट एक्ला वडा सभापति- समाचार - कान्तिपुर समाचार

ताजपुरिया समुदायबाट एक्ला वडा सभापति

‘अवसर पाइयो भने नेतृत्व गर्न गाह्रो छैन’
अर्जुन राजवंशी

बिर्तामोड — सानो कद, हँसिलो अनुहार । २४ वर्षीय देव ताजपुरियाको काँधमा कलिलै उमेरमा ठूलो जिम्मेवारी छ । अंग्रेजीमा भर्खरै स्नातक सकेका उनी गौरीगन्ज बहुमुखी क्याम्पसका स्ववियु सभापति हुन् ।

कांग्रेसको १४ औं महाधिवेशनअन्तर्गत भर्खरै सम्पन्न वडा अधिवेशनबाट ताजपुरिया गौरीगन्ज गाउँपालिका–४ को वडा सभापतिमा निर्वाचित भएका छन् । ०७३ देखि कांग्रेसको राजनीतिमा सामेल उनी जिल्लाको कान्छो वडा सभापतिसमेत हुन् । अल्पसंख्यक समुदाय ताजपुरियाबाट पार्टी सभापति जितेका पनि उनी एक्ला हुन् ।

१०७ जना क्रियाशील सदस्य रहेको वडामा सुरुमा सभापतिका लागि १० जनाले उम्मेदवारी दिने तयारी थियो । सहमतिको प्रयास गर्दा ८ जना पछि हटे । गुनुदेवी राजवंशी अडानबाट पछि हटिनन् । ६० वर्षीया राजवंशी गौरीगन्जकी पुरानो कांग्रेस नेता हुन् । सहमति नभएपछि वडा सभापतिका लागि निर्वाचन भयो । निर्वाचनमा राजवंशीलाई १९ मतले पछि पार्दै यसै वर्ष क्रियाशील पाएका ताजपुरिया वडा सभापतिमा निर्वाचित भए ।

किसानका छोरा ताजपुरियाको राजनीतिक इतिहास छैन । ‘०७३ मा गौरीगन्ज क्याम्पस भर्ना भएँ । एक दिन गाउँकै नीरज अग्रवाल र मखना महतो दाजुहरू हाम्रो क्याम्पस आउनुभएको थियो । उहाँहरूले मलाई नेपाल विद्यार्थी संघमा लाग्नुपर्छ भन्नुभयो । लगत्तै मेरै सभापतित्वमा नेविसंघको क्याम्पस इकाइ समिति पनि गठन गरिदिनुभयो,’ ताजपुरियाले सम्झिए, ‘मेरो राजनीतिक यात्रा त्यहीँबाट

सुरु भयो ।’

०७३ मै उनी क्याम्पसको स्ववियु सभापतिमा निर्वाचित भए । ‘त्यसपछि म पार्टी गतिविधिमा पूर्णरूपमा लागें । पार्टीका सबै कार्यक्रममा जान थालें । स्थानीय नेता/कार्यकर्तासँग प्रत्यक्ष चिनजानलाई बढाएँ । लगातारको क्रियाशीलताकै कारण छोटो समय भए पनि सबैले माया गरेर मलाई पार्टी वडा सभापतिको जिम्मेवारी सुम्पिनुभएको छ,’ उनले भने, ‘अवसर पाइयो भने नेतृत्व गर्न गाह्रो छैन ।’ आफू स्ववियु सभापति र वडा सभापति भएकामा सिंगो समुदाय र क्षेत्र उत्साहित बनेको उनले सुनाए ।

प्रकाशित : मंसिर १९, २०७८ ०८:२२
प्रतिक्रिया
पठाउनुहोस्

सीताले हङकङमा खेल्ने

कान्तिपुर संवाददाता

काठमाडौँ — महिला राष्ट्रिय क्रिकेट टोलीकी उपकप्तान सीता रानामगरले हङकङमा हुने फेयर ब्रेक इन्भिटेसनल २०२२ क्रिकेट प्रतियोगितामा नेपालको प्रतिनिधित्व गर्ने भएकी छन् । सीतालाई यो अवसरका लागि क्विन्स इभेन्ट म्यानेजमेन्टले सहयोग गरेको हो ।

नेपालमै पहिलोपल्ट वुमन च्याम्पियन्स लिग क्रिकेट (डब्लूएसएल) आयोजना गरेको क्विन्स इभेन्टमार्फत नेपाली राष्ट्रिय टोलीका तीन सदस्यले सो प्रतियोगिताका लागि आवेदन दिएकामा सीता छनोट भएको शनिबार आयोजित पत्रकार सम्मेलनमा जानकारी गराइयो । क्विन्सले सीतासहित इन्दु बर्मा र सवनम राईको नाम पठाएकामा सीताको स्वीकृत भएको हो ।

अघिल्लो साता यूएईमा सम्पन्न ट्वान्टी–२० महिला विश्वकप एसिया छनोटमा नेपाल असफल रहे पनि १ सय रन बनाउनुका साथै सर्वाधिक ६ विकेट लिँदै सीता प्लेयर अफ द सिरिज बनेकी थिइन् । नेपालले सन् २००७ मा पहिलो पटक अन्तर्राष्ट्रिय प्रतियोगिता खेल्दादेखिकी सदस्य हुन् सीता । उनले नेपालबाट महिला ट्वान्टी–२० अन्तर्राष्ट्रियमा २१ खेलमा सर्वाधिक ४ सय ३९ रन बनाउनुका साथै २१ विकेट लिएकी छन् ।

सन् २०२२ मे १ देखि १५ सम्म हङकङमा हुने उक्त प्रतियोगिताले लैंगिक समानता र महिलालाई समाजको मूलधारमा ल्याउने उद्देश्य दिएको छ । यो प्रतियोगितामा विश्वभरबाट खेलाडीहरू अनुबन्ध गरिएको छ । ६ टोलीबीच गरिने प्रतियोगितामा सीताले कुन टिमबाट खेल्ने निश्चित भइसकेको छैन । ‘प्रतियोगिता आयोजकले सीतासँग प्रतियोगिता र सुविधासहितको सम्झौता गरिसकेको छ । यसका लागि हामीले पहल गरेका थियौं । उनी कुन टिमबाट खेल्ने भन्ने आयोजकले नै पछि निर्धारण हुने भनेका छन्,’ क्विन्स इभेन्टका प्रबन्ध निर्देशक छुम्बी लामाले भने । भारतकी हरमनप्रित कौर,

पाकिस्तानकी साना मिर, वेस्ट इन्डिजकी डिएना डोटिनलगायतले खेल्दैछन् । नेपाली महिला क्रिकेटरले विदेशमा खेल्न लागेको थोरैमात्र इतिहास छ । रुबिना क्षेत्री र रोशनी बोहराले श्रीलंकाको डिभिजन १ मा पालिन्क (पालियन्स) क्रिकेट क्लबबाट २०१३ मा खेलेका

थिए । रुबिना नै २०१६ मा मेलबर्न रेनेगेड्सबाट बिग बास २ मा एसोसिएटको कोटामा थिए, तर कुनै खेल खेल्न पाएकी थिइनन् ।

बाँकेकी अलराउन्डर सीता नेपाली महिला क्रिकेटमा पहिलो पुस्ताकी खेलाडी हुन् । नेपालले पहिलोपल्ट सन् २००७ मा अन्तर्राष्ट्रिय प्रतियोगिता खेल्दा टिममा परेकी सीताले लामो समयको करिअरमा विदेशी प्रतियोगिता खेल्न पाउनुलाई गर्वको रूपमा लिएकी छन् । ‘१५ वर्षको मेरो अन्तर्राष्ट्रिय करिअरमा देशको प्रतिनिधित्व गरेर विदेशी प्रतियोगिता खेल्न पाउनुलाई मैले गर्वको रूपमा लिएको छु,’ सीताले पहल गरिदिएकामा क्विन्स इभेन्टलाई धन्यबाद दिइन् ।

खेलकुदमन्त्री महेश्वरजंग गहतराजले सीतालाई शुभकामना दिँदै एउटा खेलाडीको सफलताले भविष्यमा समग्र महिला खेलाडीका लागि मार्गदर्शन बन्ने बताए । उनले सीतालाई प्रतियोगितामा राम्रो प्रदर्शन गर्न शुभकामना दिए । सीता र खेलकुदमन्त्री गहतराज एकै जिल्लाका हुन् ।

यसैबीच सीता र क्विन्स इभेन्टबीच एजेन्सी सेवा प्रदानका लागि पनि सम्झौता भएको छ । क्विन्सले भविष्यमा सबैजसो क्रिकेट खेलाडीलाई एजेन्सी सेवा प्रदान गर्ने गरी गृहकार्य गरिरहेको जनाएको छ । महिला खेलाडीहरूलाई राष्ट्रिय तथा अन्तर्राष्ट्रिय व्यावसायिक घरानाहरूसँग खेलाडीको पहुँच स्थापित गर्न मध्यस्थकर्ताको भूमिका खेल्नेछ । त्यस्तै अन्तर्राष्ट्रिय तथा फ्रेन्चाइज प्रतियोगिताहरूमा खेलाडीलाई एजेन्सी सेवा प्रदान गर्नेछ ।

प्रकाशित : मंसिर १९, २०७८ ०८:२१
पूरा पढ्नुहोस्
प्रतिक्रिया
पठाउनुहोस्
×