राप्रपामा होडबाजी : थापा र लिङ्देन को बढी राजावादी ? - समाचार - कान्तिपुर समाचार

राप्रपामा होडबाजी : थापा र लिङ्देन को बढी राजावादी ? 

थापा र लिङ्देनले अध्यक्षमा उठ्ने घोषणा गरेसँगै राजतन्त्र पुनःस्थापनाको विषय चर्काएका छन्
मणि दाहाल

काठमाडौँ — संवैधानिक राजतन्त्र र हिन्दु राष्ट्रको राजनीतिक एजेन्डा बोकेको राप्रपाको महाधिवेशनमा नेतृत्वका लागि प्रतिस्पर्धा उत्रिएका नेताहरूबीच को बढी राजावादी देखिने भन्ने होड सुरु भएको छ । काठमाडौंमा बुधबार सुरु भएको एकता महाधिवेशनमा अध्यक्षका प्रतिस्पर्धीहरू कमल थापा र राजेन्द्र लिङ्देनले आफूलाई बढी राजावादी देखाउन कोसिस गरेका छन् ।

भृकुटीमण्डपमा आयोजित उद्घाटन कार्यक्रममा बोल्दै अध्यक्ष थापाले उनका प्रतिस्पर्धी रहेका लिङ्देनभन्दा बढी राजतन्त्रको पक्षमा बोलेका थिए । पूर्वराजा ज्ञानेन्द्रको समर्थन आफूलाई रहेको दाबी गर्दै लिङ्देनले राजतन्त्र पुनःस्थापनाको विषयलाई जोड दिएका छन् ।

राप्रपाका ३ अध्यक्षमध्येका एक कमल थापाले सदन र सडक दुवैको संयुक्त संघर्षबाट राजसंस्था पुनःस्थापनाको रोडम्याप प्रस्तुत गरेका छन् । उनले सदनमा राप्रपाले सिट जित्न सके र सडकबाट १ लाख मानिस परिचालन गर्न सके नेपाललाई हिन्दु अधिराज्य बनाउन सकिने बताए ।

‘हाम्रो चिन्ता राप्रपाले कहिले दुईतिहाइ बहुमत ल्याउने, हिन्दु राष्ट्र कहिले ल्याउने भन्ने छ । उहाँहरूलाई के स्पष्ट पार्न चाहन्छु भने सदन र सडक दुवै मैदानलाई प्रयोग गर्नुपर्छ । संसदीय शक्ति र सडकको शक्ति प्रयोग गरेर हिन्दु राष्ट्र र राजसंस्था पुनःस्थापना गर्न सकिन्छ,’ थापाले भने, ‘राप्रपाले काठमाडौंको सडकमा १ लाखभन्दा बढी मानिस निरन्तर उतार्न सक्छ भने दुईतिहाइको धारा पर्खेर बस्दैन, संसद्को शक्ति र सडकको शक्तिबाट नागार्जुनबाट राजालाई नारायणहिटीमा राख्ने काम जनताले गर्छन् ।’ थापाले अबको नारा ‘राजा आऊ देश बचाऊ’ होइन ‘जनता आऊ, राजा ल्याऊ’ हुने बताए ।

अध्यक्षका अर्का आकांक्षी राजेन्द्र लिङ्देनले वर्तमान नेतृत्व र कार्यशैलीबाट हिन्दु राष्ट्र र राजसंस्था पुनःस्थापना हुन नसक्ने बताए । ‘जसोतसो जोडजाड गरेर तीन प्रतिशत कटाउने, कुनै पार्टीसँग मिलेर दुई–चार सिट जोड्ने, जोडजाड गरेर ८/१० सिट बनाउने र कुनै पार्टीको पिछुवा बनेर केही मान्छेलाई मन्त्री बनाउन सकिएला तर यही कार्यशैलीले राजसंस्था र हिन्दु राष्ट्र पुनःस्थापना गर्ने पार्टी बन्न सक्दैन,’ बुधबार राप्रपा महाधिवेशनको उद्घाटनसत्रलाई सम्बोधन गर्दै लिङ्देनले भने ।

राप्रपा नेता भुवन पाठकले अध्यक्ष थापाले लगातार आफ्ना एजेन्डा उठाउँदै आएको तर लिङ्देन केही असन्तुष्टहरूसँग मिलेर चुनाव जित्न सकिन्छ कि भनेर लागेको बताए । ‘केही हिन्दुवादी राजावादी थापासँग असन्तुष्ट छन्, विभिन्न राजावादी पार्टी स्थापना भएको छ, उनीहरूले पनि कमल थापा नेतृत्वमा हुन्जेल मौका नपाउने भएकाले खेल भइरहेको छ,’ उनले भने, ‘अघिल्लो महाधिवेशनमा भन्दा अहिले राजतन्त्रको विषय मुखरित भएको छ तर हाम्रो नीति पहिले जे छ, त्यही नै हो ।’

हिन्दु अधिराज्यको स्थापना र संघीयता खारेजी निरन्तरको एजेन्डा रहेको उनले बताए । लिङ्देन र थापाले उठाएका विषयमा कुनै फरक नभएको उनले दाबी गरे । ‘यो शैलीको फरक भएको विषय मात्रै हो,’ उनले भने, ‘मुख्य रूपमा सबैको दस्ताबेज यही छ ।’ सुनील थापासहितको समूह कांग्रेसमा प्रवेश गरेपछि राप्रपामा हिन्दु अधिराज्यको विषयमा मतैक्य छ । ‘राजसंस्थाका विषयमा हामीमा कुनै प्रकारको मतभेद छैन, आफू असली राजावादी हुँ भनेर प्रस्तुत हुँदा भोट बढ्छ भनेर चर्कोसँग उठाएको मात्रै हो,’ उनले भने ।

प्रकाशित : मंसिर १५, २०७८ २१:५५
प्रतिक्रिया
पठाउनुहोस्

नेपाल–भारत व्यावसायिक उडान अनिश्चित

ओमिक्रोनको जोखिम बढेपछि एयर बबल हटाउने निर्णयबाट भारत पछि हट्यो
राजेश मिश्र

नयाँदिल्ली — नेपाल र भारतबीच सीमित मात्रै उडान गर्ने गरी कायम ‘एयर बबल’ तत्काल नहट्ने भएको छ । दक्षिण अफ्रिकामा देखिएको कोरोना भाइरसको नयाँ भेरियन्ट ओमिक्रोनको जोखिमका कारण भारत एयर बबल हटाउने आफ्नो पूर्वनिर्णयबाट पछि हटेको छ ।

कोभिड–१९ का कारण एक वर्षदेखि दुई देशका राष्ट्रिय ध्वजावाहक विमानले मात्रै निश्चित संख्यामा काठमाडौं–दिल्ली उडान गर्दै आएका छन् । निजी क्षेत्रका विमान कम्पनीहरुको व्यावसायिक उडानमा रोक लगाइएको छ । कोभिडको असर कम भएसँगै भारतले डिसेम्बर १५ (मंसिर २९) देखि एयर बबल हटाउने निर्णय गर्दै सबै विमान कम्पनीलाई व्यावसायिक उडानको तयारी गर्न अनुमति दिएको थियो । तर अनमुति दिएको एक साता नपुग्दै बुधबार अर्को सूचना नभएसम्मका लागि व्यावसायिक उडान गर्न नमिल्ने परिपत्र गरिएको छ । सीमित उडानका कारण हवाई मार्गबाट ओहोरदोहर गर्ने नेपाली र भारतीय नागरिक चर्को भाडा तिर्न बाध्य छन् ।

भारतीय सिभिल एभिएसनको महानिर्देशक कार्यालयले बुधबार जारी गरेको परिपत्रमा कोरोना भइरसको नयाँ भेरियन्टलाई लक्ष्य गरेर अघिल्लो निर्णयमा रोक लगाइएको उल्लेख छ । २६ नोभेम्बर (मंसिर १०) मा उक्त कार्यालयले व्यावसायिक उडानको तयारी गर्न पत्राचार गरेको थियो । नयाँ परिपत्रमा परिस्थितिको अध्ययन र मूल्यांकन गरेर मात्रै व्यावसायिक उडान खोल्नेबारे अर्को उपयुक्त निर्णय लिइने उल्लेख छ ।

दिल्ली विमानस्थलमा सतर्कता

कोरोना भाइरसको ओमिक्रोन भेरियन्ट भेटिएका मुलुकबाट भारत आउने यात्रुले विमानस्थलमा पीसीआर परीक्षणपछि मात्रै गन्तव्यमा जान पाउने भएका छन् । नयाँ भेरियन्टलाई लिएर सतर्कता अपनाउँदै भारतीय स्वास्थ्य मन्त्रालयले सबै अन्तर्राष्ट्रिय विमानस्थलका लागि उक्त व्यवस्था गर्न निर्देशन जारी गरेको छ । दिल्लीस्थित इन्दिरा गान्धी अन्तर्राष्ट्रिय विमानस्थलमा बुधबारबाट त्यसको अभ्यास थालिएको छ । संक्रमण भेटिएका र त्यसको जोखिम रहेका मुलुकबाट आएका यात्रुको स्वाब संकलन गरेर रिपोर्ट आएपछि मात्रै उनीहरुलाई एयरपोर्टबाट बाहिरिन दिने व्यवस्था मिलाइएको छ । त्यसका लागि विमानस्थलमा १ हजार ५ सय कुर्सी तथा आवश्यक संख्यामा स्वास्थ्यकर्मीको छुट्टै व्यवस्था मिलाइएको छ । नयाँ व्यवस्थाका कारण यात्रुले आरटी पीसीआर रिपोर्टको प्रतीक्षामा ४ देखि ६ घण्टा विमानस्थलमा बिताउनुपर्ने भएको छ । रिपोर्टका लागि तथा प्रतिक्षारत अवधिमा खानाको सुविधाका लागि विमानस्थलमा सम्बन्धित यात्रुले १ हजार ७ सय भारु शुल्क तिर्नुपर्नेछ । हवाई मार्गबाट भारत आउने यात्रुमध्ये कम्तीमा २ प्रतिशतले त्यस्तो प्रोटोकलको पालना गर्नुपर्ने हुन सक्छ ।


प्रकाशित : मंसिर १५, २०७८ २१:४६
पूरा पढ्नुहोस्
प्रतिक्रिया
पठाउनुहोस्
×