काठमाडौँ — एमाले महाधिवेशन मूल व्यवस्थापन समितिका संयोजक एवं नेता रामबहादुर थापाले पार्टीको विधान महाधिवेशनले एमालेलाई सबैभन्दा ठूलो, अनुशासित र एकताबद्ध पार्टी भएको सन्देश दिएको बताएका छन् । १० औँ राष्ट्रिय महाधिवेशनको उद्घाटन सत्रमा स्वागत गर्दै नेता थापाले विधान महाधिवेशनले ‘जबज’ सही छ भन्ने पुनः पुष्टि गरेको बताए । 

‘दुई महिना पहिले एमालेले पहिलो विधान महाधिवेशन गर्‍यो । प्रतिगामीहरूको डिजाइन बमोजिम नेकपालाई तीन टुक्रामा विभाजन गरपनि विधान महाधिवेशनले नेकपा एमाले नै सबैभन्दा ठूलो, अनुशासित र एकताबद्ध पार्टी भएको सन्देश दियो,’ थापाले भने, ‘विधान महाधिवेशनले नेपाल संघीय लाकतान्त्रिक गणतन्त्रको स्थापना भएकाले जननेता मदन भण्डारीद्धारा प्रतिपादित नीति एवम् सिद्धान्त सही भएको पुनः पुष्टि गर्‍यो । विधान महाधिवेशनले विभाजनबाट पार्टीको वैचारिक, राजनीतिक एवम् सांगठनिक शुद्धिकरण र सुदृढिकरण भएको स्पष्ट सन्देश दियो । समाजवादको आधार निर्माण गर्न सिद्धान्त, नीति तथा कार्यक्रमको श्रृंखला प्रस्तुत गर्‍यो, सार तः जबज लाई पुनः पुष्टि गर्‍यो ।’