एमालेले २६० केन्द्रीय सदस्यको विवरण अध्यावधिक गर्न आयोगमा दियो निवेदन- समाचार - कान्तिपुर समाचार
कान्तिपुर वेबसाईट
AdvertisementAdvertisement

एमालेले २६० केन्द्रीय सदस्यको विवरण अध्यावधिक गर्न आयोगमा दियो निवेदन

कान्तिपुर संवाददाता

काठमाडौँ — नेकपा एमालेले पार्टीको केन्द्रीय कमिटीको सदस्यहरुको विवरण अध्यावधिक गर्न निर्वाचन आयोगमा निवेदन दिएको छ । राजनीतिक दल सम्बन्धी ऐन २०७३ अनुसार २ सय ६० जनाको विवरण अध्यावधिक गर्नका निवेदन दिएको हो । 

जसमा नेकपा माओवादी केन्द्रबाट आएका नेताहरु रामबहादुर थापा बादल, टोपबहादुर रायमाझी, लेखराज भट्टसहितका नेताहरु नामसमेत रहेको छ ।

'हामीले कहिले कारबाही गरेको छैन । माधवकुमार नेपालसहितका नेताहरुलाई अपडेट गर्दा हटाउनु भन्ने लागेको छ भने निर्वाचन आयोगमा गएर हेर्दा हुन्छ,' कार्यालयका सचिव शेरबहादुर तामाङले भने, 'नवौं राष्ट्रिय महाधिवेशनबाट निर्वाचित केन्द्रीय सदस्य तथा पछि थपेका केन्द्रीय सदस्यहरुसहितको विवरण हामीले अध्यावधिक गर्न पठाएका छौं ।'

आयोगका प्रवक्ता राजकुमार श्रेष्ठले केन्द्रीय सदस्यहरुको विवरण अध्यावधिक गर्नका लागि निवेदन आएको बताए ।

एमालेले अध्यादेश आउने बित्तिकै केन्द्रीय सदस्यहरुको विवरण अध्यावधिक गर्नका लागि निवदेन दिएको हो । एमालेले राजनीतिक दल ऐन २०७३ को दफा ५१ को ३ अनुसार पदाधिकारी तथा सदस्यहरुको हेरफेर सम्बन्धी जानकारी गराउनु पर्ने व्यवस्था रहेकाले निवेदन दिएको जनाएको छ ।

प्रकाशित : भाद्र १, २०७८ १५:४३
प्रतिक्रिया
पठाउनुहोस्

विपक्षीको अवरोधपछि लुम्बिनी प्रदेश सभाको बैठक स्थगित

गठबन्धनमा सहभागी दुई सदस्यलाई कारबाहीको माग
घनश्याम गौतम

रूपन्देही — लुम्बिनी प्रदेश सभाको बैठकमा विपक्षी दल एमालेको अवरोधपछि मंगलबारको बैठक केहीबेर चलेर स्थगित भएको छ । 

एमालेले आफ्ना दुई प्रदेशसभा सदस्यलाई कारबाही गर्न माग गर्दै सभामुख पूर्णबहादुर घर्तीलाई सभाको बैठक सुरु हुनु केहीबेर अघि पत्र बुझाएको थियो । पत्रकै कारण निर्धारित समयभन्दा झण्डै डेढ घण्टा ढिला सुरु भएको बैठकमा विपक्षी दलको पत्रको विषयका कारबाही अघि नबढाएको र सदनलाई जानकारी पनि नदिएको भन्दै एमालेले बैठक अवरोध गरेको हो ।

विपक्षी दल एमालेका प्रमुख सचेतक भूमिश्वर ढकालले यसअघि अन्य पार्टीका कारबाही र आफ्नै पार्टीका सदस्यको राजीनामा सभामुखले मसी सुक्न नपाउँदै कारबाही र स्वीकृत गर्ने गरेको तर अहिले एमालेले कारबाहीका लागि गरेको सिफारिस बेवास्ता गरेपछि बैठक अवरुद्ध गरेको बताए । ‘हामीले कारबाही नभएसम्म बैठक अवरोध गरिरहन्छौं,’ उनले भने, ‘सभामुखले पार्टीकै जसरी काम गर्नु भएन ।’ एमालेले उपनिर्वाचनबाट निर्वाचित दाङकी विमला खत्री वली एमालेको सूर्य चिह्न लिएर निर्वाचित भएको र नेकपा विघटनपछि पनि एमाले पार्टी र संसदीय दलको बैठकमा सहभागी भएको भन्दै उनले माओवादी दल रोज्न नपाउने दाबी गर्दै आएको छ ।

त्यस्तै अहिलेको गठबन्धनको सरकारमा बिना विभागीय मन्त्री भएका नवलपरासी पश्चिमबाट निर्वाचित अजय शाहीले पनि एमाले चुनाव चिह्नबाट निर्वाचित भएको र अहिलेसम्म एमालेको संसदीय दलबाटै प्रतिनिधित्त्व गरेको भन्दै उनलाई पनि कारबाही गर्न सिफारिस गरेको छ ।

बैठक अघि सत्ता पक्ष र विपक्षी दलका बीच बैठक सुचारु गर्ने विषयमा छलफल भएको थियो । कारबाही प्रक्रिया अघि नबढेसम्म बैठक चल्न नदिने विपक्षीको अडानपछि साढे दुई बजे बैठक सुरु भएको थियो । बैठक सुरु गर्नासाथ विपक्षी दलका प्रमुख सचेतक ढकालले कारबाहीको माग गरेका थिए । विपक्षी दलका सांसदले पनि उठेर विरोध जनाएका थिए ।

विरोधका बीच सभामुख घर्तीले प्रदेश प्रमुख अमिक शेरचनको अधिवेशन आह्वान सम्बन्धी र सरकार गठन सम्बन्धी पत्र पढेर सुनाएका थिए । दुवै पत्रको बेहोरा बैठकलाई जानकारी गराएपछि बैठक बुधबार दिउँसो एक बजेसम्मका लागि स्थगित भएको छ ।

प्रकाशित : भाद्र १, २०७८ १५:३३
पूरा पढ्नुहोस्
प्रतिक्रिया
पठाउनुहोस्
×