सर्वोच्चमा १४६ सांसदको रिट : ‘बहुसंख्यक सांसद यहाँ छौं, विघटन कपटपूर्ण हो’- समाचार - कान्तिपुर समाचार
कान्तिपुर वेबसाईट
AdvertisementAdvertisement

सर्वोच्चमा १४६ सांसदको रिट : ‘बहुसंख्यक सांसद यहाँ छौं, विघटन कपटपूर्ण हो’

कृष्ण ज्ञवाली

काठमाडौँ — प्रतिनिधिसभा विघटन गर्ने प्रधानमन्त्रीको सिफारिस र त्यसलाई कार्यान्वयनगर्ने राष्ट्रपतिको निर्णय गैरसंवैधानिक भएको दाबी गर्दै कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल, एमाले नेता माधवकुमार नेपाल, जनता समाजवादी पार्टीका अध्यक्ष उपेन्द्र यादवसहित १४६ जनाले सर्वोच्च अदालतमा रिट निवेदन दर्ता गरेका छन् ।

प्रतिनिधिसभा विघटन बदरको मागदाबीसहित सोमबार सर्वोच्च अदालतमा रिट दायर गर्न पुगेका कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल, एमाले नेता माधवकुमार नेपाल, जनता समाजवादी पार्टीका अध्यक्ष उपेन्द्र यादवलगायतका नेता–कार्यकर्ता । तस्बिर : कान्तिपुर

उनीहरूको सहित सोमबारसम्म प्रतिनिधिसभा विघटनसँग सम्बन्धित २८ वटा निवेदन सर्वोच्चमा दर्ता भएका छन् ।

देउवासहित प्रतिनिधिसभा विघटनको विरोधमा उभिएका दलका शीर्षस्थ नेताहरू आफू सर्वोच्च अदालतमा उपस्थित भएरै निवेदन दर्ता गराएका हुन् । विघटित प्रतिनिधिसभाका १४६ सांसदमध्ये १३९ जना सर्वोच्चमा उपस्थित भएका थिए भने बाँकीको हकमा वारेसले निवेदन दर्ता गराएका हुन् । केही भने कोरोना संक्रमण र अन्य कारणले सर्वोच्चमा उपस्थित भएनन् । उनीहरूले पेस गरेको रिट सोझै संवैधानिक इजलासमा सुनुवाइ हुने गरी दर्ता भएको छ ।

अदालत प्रशासनका अनुसार २८ वटामध्ये २४ निवेदनमा प्रतिनिधिसभा विघटनको निर्णय बदर हुनुपर्ने माग छ । तीमध्ये ९ वटा संवैधानिक इजलासमा दर्ता भएका छन् भने बाँकी १५ वटा सामान्य प्रकृतिका निवेदन हुन् । चारवटा निवेदन भने प्रधानमन्त्री केपी शर्मा ओलीको कदमलाई समर्थन गर्ने स्वरूपका छन्, जसमा प्रधानमन्त्रीमा ओलीलाई नै निरन्तरता दिनुपर्ने र तोकिएको मितिमा निर्वाचन हुनुपर्नेलगायतका माग छन् ।

उनीहरूको रिटमा प्रतिनिधिसभा विघटन गर्ने निर्णय गैरसंवैधानिक भएकाले त्यसलाई बदर गर्नुपर्ने माग छ । १४९ जनाको समर्थनसहित दाबी पेस गरेकाले ‘शेरबहादुर देउवालाई प्रधानमन्त्री नियुक्त गर्नू र विश्वासको मत लिने वातावरण बनाउनू’ भनी आदेश माग गरिएको छ । सांसदको हैसियतले कुनै व्यक्तिलाई समर्थन गरेका आधारमा दल त्याग गरेको भनी कारबाही नगर्नू/नगराउनू भनी अन्तरिम आदेशसमेत मागिएको छ ।

जेठ १५ भित्र संसद्मा बजेट पेस गर्नुपर्ने भएकाले तत्कालीन प्रतिनिधिसभा बैठक डाक्नू र अध्यादेशबाट बजेट ल्याउन रोक लगाउनू भनेर पनि मागदाबी गरिएको छ । उनीहरूले निर्वाचन प्रक्रिया रोक्नसमेत माग गरेका छन् । निवेदनमा भनिएको छ, ‘कामचलाउ प्रधानमन्त्री नेतृत्वको मन्त्रिपरिषद्बाट कुनै पनि दूरगामी र नीतिगत निर्णय नगराउनू भनी आदेश दिनू ।’ २२ पेज लामो रिटमा करिब १२ पेज नामावलीको फेहरिस्त छ ।

प्रधानमन्त्रीबाट राष्ट्रपति कार्यालयमा पेस भएको कागजातमा नामावली मात्र रहेको दाबी उनीहरूको रिटमा छ । त्यसमा ओलीले आफूमाथि समर्थन रहेको भनी राजनीतिक दलको पत्र मात्र लिएर उपस्थित भएको भन्दै उनीहरूले देउवाका हकमा भने सांसदको हस्ताक्षरसहितको पत्र रहेको दाबी गरेका छन् । ओलीलाई समर्थन गरेका भनिएका जनता समाजवादी पार्टीका ३२ जनामध्ये १२ जनाले देउवालाई हस्ताक्षरसहित समर्थन गरेका थिए । ओलीकै दल एमालेका २६ जना सांसदले समेत देउवालाई समर्थन गरेकाले ओलीको दाबी नपुग्ने रिटमा उल्लेख छ । दोहोरो हस्ताक्षर नभएको भन्दै उनीहरूले त्यसरी दोहोरो हस्ताक्षर भएकै भए पनि राष्ट्रपति कार्यालयले परीक्षण गर्नुपर्नेमा नगरेको आरोप लगाएका छन् । रिटमा भनिएको छ, ‘यसरी दाबी परेकै अवस्थामा दाबी नपुग्ने भनी गरिएको निर्णय संविधानसम्मत छैन । संविधानले राष्ट्रपतिलाई त्यसो गर्ने अधिकार दिएको छैन ।’

विश्वासको मत नपाउने निश्चित भएपछि वैकल्पिक सरकार गठनका लागि अनुरोध गरेका प्रधानमन्त्री ओलीले फेरि त्यही पदमा दाबी गर्न नमिल्ने रिटमा उल्लेख छ । दोहोरो सूची परेको भनिएको तर त्यसबारे दाबीकर्तालाई एकपटक पनि नसोधिएको भन्दै निवेदनमा अघिल्लो पटकको प्रतिनिधिसभा पुनःस्थापना भइसकेपछि समेत प्रधानमन्त्री ओलीले विघटनका पक्षमा बारम्बार अभिव्यक्ति दिएर देउवालाई बहुमत जुटाउने अवसर नदिइएको आरोप छ ।

संविधानको धारा ७६ को उपधारा १, २ ३ मा सरकार गठन प्रक्रियामा राजनीतिक दलहरूको भूमिका र पहल हुने भए पनि उपधारा ५ मा भने त्यो भूमिका सांसदलाई छाडेको रिट निवेदनमा सांसदहरूको दाबी छ । निवेदनमा भनिएको छ, ‘प्रतिनिधिसभाले सरकार बनाउने यो व्यवस्था अन्तिम उपायका रूपमा रहेको छ ।’ त्यो अवस्थामा जुनसुकै सांसदले सरकार बनाउन पहल गर्नु संवैधानिक कर्तव्य हुने भन्दै उनीहरूले केही सांसदले अर्को दलका नेतालाई गरेको समर्थनलाई अन्यथा भन्न नमिल्ने दाबी गरेका छन् ।

ओलीले प्रधानमन्त्री पदमा गरेको दाबी केवल भाँजो हाल्ने प्रकृतिको थियो भन्दै सांसदहरूले ओलीले विश्वासको मत नलिएरै उपधारा ५ बमोजिमको प्रक्रिया प्रारम्भ गर्न राष्ट्रपतिलाई गरेको सिफारिसबाटै स्पष्ट हुने दाबी गरेका छन् । सांसदहरूको दाबीमा, ‘आफूले बहुमत प्राप्त गर्न नसक्ने र अरूलाई सरकार बनाउन पनि नदिने गरी विघटन गर्ने प्रधानमन्त्रीको कामकारबाही बदनियतपूर्ण रहेको स्पष्ट हँॅदा बदरभागी छ ।’

राष्ट्रपति कार्यालयमा कुनै सांसदले अर्को दलको सांसदलाई गरेको समर्थनमा ह्विप नलाग्ने दाबी गरेका छन् । कुनै सांसदले आफूलाई बहुमत पुग्छ भनेर दाबी गरेपछि त्यसको परीक्षण गर्ने कुरा संसदीय विशेषाधिकार भन्दै उनीहरूले त्यो प्रतिस्पर्धामा प्रधानमन्त्री ओली नरहेको आरोप लगाएका छन् । निवेदनमा भनिएको छ, ‘उपधारा ४ अनुसार विश्वासको मत लिने र उपधारा ५ अनुसार प्रधानमन्त्री नियुक्त भएर विश्वासको मत लिने अवस्था बनेको छैन ।

संसदीय प्रक्रिया र अभ्यासलाई अनुशरण नगरी हठात् स्वेच्छाचारी ढंगबाट प्रतिनिधिसभा विघटन हुनै सक्दैन ।’ अहिले कोरोना महामारीका कारण देशभर निषेधाज्ञा र बन्दाबन्दी रहेको भन्दै उनीहरूले खोप, औषधि र अक्सिजन अभावका बेलामा निर्वाचन गर्नु जोखिमपूर्ण हुने दाबी गरेका छन् ।

प्रकाशित : जेष्ठ ११, २०७८ ०६:१८
प्रतिक्रिया
पठाउनुहोस्

एमालेमा खनाल–नेपाललाई बहिर्गमनको ढोका खुला !

खनाल–नेपाल समूहका विद्यार्थी नेताहरुले निर्वाचन आयोगमा पार्टी नै दर्ता गरेका छन् । नेपाल कम्युनिस्ट पार्टी एकीकृत नाम र चुनाव चिह्न कलम हुने गरी आयोगमा वैशाख ७ मै पार्टी दर्ता गरेका छन् ।
बबिता शर्मा

काठमाडौँ — गत वर्षको फागुन तेस्रो साताबाट सुरु भएको निषेध र प्रतिशोध बढ्दै गएपछि एमालेमा झलनाथ खनाल र माधवकुमार नेपाल समूह पार्टीबाट बहिर्गमनको मनस्थितिमा पुगेको छ । सोमबार बालुवाटारमा बसेको एमाले स्थायी कमिटी बैठकले खनाल–नेपालसहित ११ नेतालाई पार्टीबाट निस्कासन गर्ने र थप १२ सांसदलाई २४ घण्टे स्पष्टीकरण सोध्ने निर्णयले एमाले विवाद विभाजनको सीमारेखामा पुगेको हो । 

खनाल–नेपालसहितका ११ नेतालाई ‘आफ्नो पार्टी अध्यक्ष, दलका नेता र प्रधानमन्त्रीबाट हटाउन विपक्षी पार्टीहरुसँग मिलि विपक्षी दलका नेतालाई प्रधानमन्त्री बनाउन हस्ताक्षरसहित समर्थन गर्नेजस्ता अनुशासनहीन, अराजक, अनैतिक र लोकतान्त्रिक पद्धतिविरुद्धको कार्य’ गरेको आरोपमा कारबाही गरिएको छ ।

शनिबारको स्थायी कमिटी बैठकले खनाल–नेपालसहित भीम रावल, मुकुन्द न्यौपाने, रामकुमारी झाँक्री, पुष्पा कर्ण, लक्ष्मी चौधरी, कलिला खातुन, कल्याणी खड्का, सरला यादव र निरा जैरूलाई स्पष्टीकरण सोध्ने निर्णय लिएको थियो । तर, स्पष्टीकरण नबुझाएपछि खनाल–नेपालसहितका यी नेताहरुलाई पार्टीको साधारण सदस्यसमेत नरहने गरी निष्कासन गरेको हो ।

त्यसबाहेक उपमहासचिव घनश्याम भुसाल, स्थायी कमिटी सदस्य सुरेन्द्र पाण्डेलगायत १२ नेतालाई पनि कारबाही गर्ने तयारीसहित २४ घण्टे स्पष्टीकरण मागिएको छ । यी नेताले पनि स्पष्टीकरण नबुझाउने संकेत गरेका छन् । स्पष्टीकरण नबुझाए १२ नेतालाई पनि पार्टी सदस्यबाट निष्कासन गर्ने तयारी अध्यक्ष केपी शर्मा ओलीको एक नेताले जानकारी दिए ।

एमालेका दुवै समूहले एक अर्काका गतिविधि विभाजनकारी भइरहेको आरोप–प्रत्यारोपमा उत्रेका बेला खनाल–नेपाल समूहका नेतामाथिको कारबाहीले उनीहरुको बहिर्गमनको ढोका खुला गरेको एमालेकै नेताहरुले बताउन थालेका छन् । अब खनाल–नेपाल समूह औपचारिकरुपमै नयाँ पार्टी घोषणाको तयारीमा लाग्ने भएको छ । त्यसको संकेत वरिष्ठ नेता खनालले पनि गरेका छन् ।

‘मलाई विभाजन शब्द मन पर्दैन । तर, केपी ओलीजस्ता विघटनकारी र दक्षिणपन्थीले पार्टी कब्जा गरेको हुँदा देशको कम्युनिष्ट आन्दोलन एकीकृत भएर पनि फेरि विभाजनतर्फ जान विवश भएको छ,’ उनले भने, ‘सारा कमरेडहरु हुनुहुन्छ, उहाँहरुले अगाडि बढाउँदै लानुहुन्छ । कम्युनिष्ट आन्दोलन आफ्नै ढंगले दृढतापूर्वक अगाडि बढ्छ ।’

हुन त फागुन २८ मा ओलीले एकतर्फी केन्द्रीय कमिटी बैठक डाकेर महत्वपूर्ण निर्णय लिएपछि एमालेमा विवाद बढ्न थालेको हो । यसबीचमा नेता नेपालसहित ४ नेतालाई पार्टीबाट ६ महिनासम्मको निलम्बनको निर्णय गरिए पनि पछि त्यो कारबाही फुकुवा भएको थियो ।

तर, वैशाख २७ यताका उथलपुथलकारी राजनीतिक घटनाक्रमले एमाले विवादलाई लगातार विभाजनतिर धकेलेको छ । वैशाख २७ मा प्रधानमन्त्रीले विश्वासको मत लिने दिन खनाल–नेपाल समूहका २८ जना सांसद अनुपस्थित भएका थिए ।

पार्टी अध्यक्ष एवं प्रधानमन्त्री ओलीले त अब खनाल–नेपाल समूहका नेताहरुसँगको सम्बन्ध ‘भूतकाल’ भैसकेको सार्वजनिक अभिव्यक्ति दिएर एमाले विभाजन भईसकेको आंशकामा मदत पुर्‍याएका छन् । कांग्रेस सभापति देउवालाई प्रधानमन्त्री बनाउन एमालेको खनाल–नेपाल समूहका सांसदले गरेको हस्ताक्षरलाई ओलीले गम्भीर पार्टी अनुशासनको विषय भएको बताएका थिए ।

एमालेका २६ सांसदले देउवालाई प्रधानमन्त्री बनाउने गरी उनको पक्षमा हस्ताक्षर गरेका थिए । यद्यपि सर्वोच्चमा रीट हाल्ने दिनसम्म पुग्दा यो संख्या २३ भएको छ । देउवालाई समर्थन गर्ने खनाल–नेपाल समूहको निर्णयमा ओलीले आइतबारमात्रै टिप्पणी गरेका थिए, ‘माधव नेपालको नेतृत्वमा निर्लज्जता प्रदर्शन भयो, त्यस्तो दुनियाको राजनीतिक इतिहासमा कहीं छैन । एमालेको वरिष्ठ नेता भनेर लाजमर्दो काम गरेका छन् ।’

खनाल–नेपाल समूहकै नेताहरुसमेत अनौपचारिक कुराकानीमा ‘विभाजन’ को अब औपचारिकतामात्रै बाँकी रहेको बताएका छन् । एक नेताको टिप्पणी छ, ‘ओली कम्युनिष्ट आन्दोलन ध्वस्त पार्न उद्धत छन्, अब उनकै नेतृत्वमा एकीकृत पार्टी सम्भव छैन् । प्रक्रिया र प्राविधिक पक्षमात्रै बाँकी हो ।’

यतिसम्म कि खनाल–नेपाल समूहका विद्यार्थी नेताहरुले निर्वाचन आयोगमा पार्टी नै दर्ता गरेका छन् । नेपाल कम्युनिस्ट पार्टी एकीकृत नाम र चुनाव चिह्न कलम हुने गरी आयोगमा वैशाख ७ मै पार्टी दर्ता गरेका छन् । ओली समूहले यसलाई खनाल–नेपाल समूहको योजनाबद्ध कदम भनेको छ । तर, पार्टी अध्यक्ष जीवन राईले भने आफूहरुले कसैको निर्देशन वा दवावमा नभई स्वतन्त्ररुपमा पार्टी दर्ता गरेको बताएका छन् । राईको प्रस्तावित पार्टीमा २५ सदस्यीय केन्द्रीय कमिटी र पाँच सदस्यीय पदाधिकारी रहेको बताइएको छ ।

प्रकाशित : जेष्ठ १०, २०७८ २२:१७
पूरा पढ्नुहोस्
प्रतिक्रिया
पठाउनुहोस्
×