सरकार र चन्द समूहबीच वार्ता सुरु- समाचार - कान्तिपुर समाचार
कान्तिपुर वेबसाईट
AdvertisementAdvertisement

सरकार र चन्द समूहबीच वार्ता सुरु

कान्तिपुर संवाददाता

काठमाडौँ — सरकार र नेत्रविक्रम चन्द नेतृत्वको समूहबीच वार्ता सुरु भएको छ । औपचारिक रूपमा वार्ता टोली गठन गरेको भोलिपल्टै दुवै पक्ष वार्तामा बसेका हुन् । 

बुधबार बिहानदेखि दुवै पक्षबीच वार्ता भइरहेको र वार्तास्थल गोप्य रहेको चन्द समूहका एक नेताले जानकारी दिए । वार्तामा सरकारका तर्फबाट गृहमन्त्री रामबहादुर थापा र प्रधानमन्त्री केपी शर्मा ओलीका परराष्ट्र मामिला सल्लाहकार राजन भट्टराई तथा चन्द समूहका तर्फबाट खड्गबहादुर विश्वकर्मा र उदय चलाउने सहभागी छन् ।

चन्द समूहले म‌ंगलबार प्रवक्ता विश्वकर्माको नेतृत्वमा दुई सदस्यीय वार्ता टोली सार्वजनिक गरेको थियो । चन्द समूहले जेलमा रहेका आफ्ना नेता–कार्यकर्ता रिहा र हतियारसम्बन्धी मुद्दा फिर्ता गर्नुपर्ने, पार्टीमाथिको प्रतिबन्ध फुकुवा हुनुपर्नेलगायत सर्त अघि सारेको छ ।

सरकारले पनि गृहमन्त्री थापाको संयोजकत्वमा दुई सदस्यीय समिति सार्वजनिक गरेको थियो । मंगलबार सरकारका प्रवक्तासमेत रहेका सञ्चारमन्त्री पार्वत गुरुङले चन्द समूहले पनि वार्ता टोली गठन गरे चाँडै वार्ता हुने बताएका थिए । उनले हतियार मुद्दालगायत विषय वार्ताबाटै टुंगो लगाइने जानकारी दिएका थिए ।

सम्बन्धित समाचार

कसरी बन्यो सरकार र चन्द समूहबीच वार्ताको वातावरण ?

प्रकाशित : फाल्गुन १९, २०७७ १०:३२
प्रतिक्रिया
पठाउनुहोस्

सचिवालय सदस्यबाहेकका सांसद छलफल गरी साझा सुझाव तयार पारौँ : शर्मा

इकान्तिपुर डेस्क

काठमाडौँ — नेकपा स्थायी कमिटी सदस्य जनार्दन शर्माले पार्टीका सचिवालय सदस्यबाहेका सांसदहरूको छुट्टै छलफल आवश्यक भएको बताएका छन् । जनमतको सम्मान र जनप्रतितिनिधको कर्तव्यसमेत कसरी पूरा गर्ने भन्ने विषयमा छलफल आवश्यक रहेको नेता शर्माले बताएका हुन् ।

दाहाल-नेपाल नेतृत्वको नेकपाका नेतासमेत रहेका शर्माले बुधबार बिहान सामाजिक सञ्जालमा छलफलका लागि अपिल गर्दै लेखेका छन्, 'जनमतको सम्मान र आपनो जनप्रतिनिधिको कर्तव्यसमेत कसरी पूरा गर्ने भन्ने बारे स्वतन्त्र ढंगले छलफल गर्न आवश्यक भएको सन्दर्भमा सचिवालय सदस्यहरु बाहेकका सांसदहरूले एउटा छलफल गरी आवश्यक निष्कर्षका लागि पहल गर्ने कुराको महसुस गरी पार्टी,आन्दोलन र जनताको पक्षमा के गर्दा हुन्छ भन्ने बारे स्वतन्त्ररुपले छलफल गर्न माननीयहरुमा हार्दिक अपिल गर्दछु ।'

नेता शर्माले यो छलफल साझा कुनै हस्ताक्षर संकलन गर्न नभई साझा सुझाव तयार गर्न भएको समेत स्पष्ट पारेका छन् । 'यो छलफल कुनै हस्ताक्षर र यो वा त्यो नेतृत्वको पक्षमा नभएर हाम्रो साझा सुझाव तयार गर्न अर्थमा भएको समेत जानकारी गराउँछु । कुनै त्रास र कुनै प्रलोभनमा नपरी छलफल गरिने छ,' उनले भने ।

नेकपामा उत्पन्न विवादलाई सैद्धान्तिक कुरा, नेतृत्वको प्रश्न एंवम पदीय झगडाका रुपमा आ-आफ्ना बुझाइ रहेको पनि शर्माले बताएका छन् । नेकपामा देखिएको समस्याको कारण जे भए पनि जननिर्वाचित प्रतिनिधिसभा भंग हुने अवस्थासम्म पुग्नु सबैका लागि दूर्भाग्यपूर्ण अवस्था भएको उनले बताएका छन् । 'जनताको आन्दोलन र अदालतको स्वतन्त्र र सुझबुझपूर्ण निर्णयबाट संसद्को पुन:स्थापना भएको सन्दर्भमा हामी प्रतिनिधिसभाका संसदहरुले आफैप्रति उठेका प्रश्नहरुको जवाफ दिन आवश्यक भएको छ,' शर्माले लेखेका छन् ।

प्रकाशित : फाल्गुन १९, २०७७ १०:३२
पूरा पढ्नुहोस्
प्रतिक्रिया
पठाउनुहोस्
×