चन्द समूहका महोत्तरी–सर्लाही इन्चार्ज पक्राउ- समाचार - कान्तिपुर समाचार
कान्तिपुर वेबसाईट
AdvertisementAdvertisement

चन्द समूहका महोत्तरी–सर्लाही इन्चार्ज पक्राउ

सन्तोष सिंह

धनुषा — नेत्रविक्रम चन्द समूहका महोत्तरी–सर्लाही इन्चार्ज कमलबहादुर शुसलिङ्गलाई प्रहरीले पक्राउ गरेको छ । सर्लाहीमा चन्दा आतंक मच्चाएपछि प्रहरीले खोजी सूचीमा राखेका शुसलिङ्गलाई आइतबार साँझ पक्राउ गरिएको हो । 

इलाका प्रहरी कार्यालय गौशालाको प्रहरी टोलीले महोत्तरी, गौशाला नगरपालिका–११ तारेचौरीमा लुकेर बसेको अवस्थामा शुसलिङ्गलाई पक्राउ प्रहरी स्रोतले जनाएको छ । गौशाला प्रहरीले पक्राउ गरेका शुसलिङ्गलाई थप अनुसन्धानका लागि जिल्ला प्रहरी कार्यालय महोत्तरीमा बुझाइएको छ । शुसलिङ्गले महोत्तरीमा बसेर सर्लाहीमा चन्दा आतंक मच्चाएको प्रहरीको आरोप छ ।

व्यापारी र कर्मचारीलाई धम्किपूर्ण व्यवहार गरी चन्दा आतंक मच्चाएपछि सर्लाही प्रहरीको सहयोगमा शुसलिङ्गलाई महोत्तरीको गौशालाबाट पक्राउ गरिएको हो ।

प्रकाशित : फाल्गुन १६, २०७७ २१:५९
प्रतिक्रिया
पठाउनुहोस्

नेकपा नेता सवार गाडीले ठक्कर दिँदा साइकल यात्रु घाइते, चालक नियन्त्रणमा

शिव पुरी

रौतहट — नेकपा दाहाल-नेपाल समूहका नेता योगेश भट्टराई चढेको गाडीले रौतहटको चन्द्रपुर नगरपालिका ४ स्थित पूर्वपश्चिम राजमार्गमा आइतबार राति साइकल यात्रुलाई ठक्कर दिएको छ । ठक्करबाट घाइते साइकल यात्रुलाई थप उपचारका लागि काठमाडौं लगिएको छ । घटनापछि प्रहरीले धनुषा बटेश्वर–७ घर भएका स्करपियो चालक धर्मदास महत्तोलाई नियन्त्रणमा लिएको छ ।

जनकपुरबाट पार्टीको कार्यक्रम सकेर हेटौंडा जाँदै गरेका नेता भट्टराई सवार ज १ झ ४२७ नम्बरको स्करपियोले साइकल यात्री चन्द्रपुर ६ का ५५ वर्षीय ईन्द्रप्रसाद घिमिरेलाई साढे ७ बजेतिर ठक्कर दिएको हो । दक्षिणबाट साइकल चढेर उत्तर लागेका घिमिरे स्करपियोको ठक्करबाट घाइते भएको जिल्ला प्रहरी प्रमुख एसपी सिद्धिविक्रम शाहले बताए । घाइते घिमिरेलाई नजिकको सिभिल अस्पताल लगिएको थियो । अस्पतालले थप उपचारका लागि काठमाडौं रिफर गरेको ईलाका प्रहरी चन्द्रनिगाहपुरले जनायो ।

घिमिरको टाउको र शरीरका विभिन्न भागमा चोट लागेको छ । घटनापछि नेता भट्टराई केहीबेर इलाका प्रहरी चन्द्रनिगाहपुरमा बसेका थिए । त्यसपछि उनी अर्को सवारीमार्फत हेटौंडा गएका छन् । घटनापछि प्रहरीले धनुषा बटेश्वर–७ घर भएका स्करपियो चालक धर्मदास महत्तोलाई नियन्त्रणमा लिएको छ । दुर्घटनामा साइकल र स्करपियो दुबै सामान्य क्षति भएको प्रहरीले जनायो ।

प्रकाशित : फाल्गुन १६, २०७७ २१:४४
पूरा पढ्नुहोस्
प्रतिक्रिया
पठाउनुहोस्
×