सभामुख सरकारका झगडिया र किर्ते, उपराष्ट्रपति चुनावतिर आउनुस् : प्रधानमन्त्री ओली- समाचार - कान्तिपुर समाचार

सभामुख सरकारका झगडिया र किर्ते, उपराष्ट्रपति चुनावतिर आउनुस् : प्रधानमन्त्री ओली

कान्तिपुर संवाददाता

काठमाडौँ — प्रधानमन्त्री केपी शर्मा ओलीले सभामुख र उपराष्ट्रपतिको आलोचना गरेका छन् । उपराष्ट्रपति नन्दबहादुर पुनले सरकारको आलोचना गरेको र सभामुख अग्निप्रसाद सापकोटाले किर्ते गरेको तथा सरकारविरुद्ध मुद्दा हालेको भनेर प्रधानमन्त्रीले आलोचना गरेका हुन् । 

फाइल तस्बिर।

ओली समूहले शनिबार विराटनगरमा आयोजना गरेको सभामा प्रधानमन्त्रीले सभामुख बनाइएको व्यक्ति सरकारको विरुद्धमा मुद्दा हाल्दै हिँडेको र किर्ते काममा लागेको आरोप लगाएका हुन् । 'सभामुख बनाइएको थियो एकजनालाई । सरकारविरुद्ध मुद्दा हाल्न जानुभएको छ । सरकारविरुद्ध झगडिया हो सभामुख । सुहाउँछ ? सभामुख झगडिया हुन जानुभएको छ,' प्रधानमन्त्रीको भनाइ थियो ।

संवैधानिक परिषद्‍बाट भएका विभिन्न संवैधानिक निकायमा भएका नियुक्तिविरुद्ध परिषद् सदस्यसमेत रहेका सभामुख सापकोटाले सर्वोच्च अदालतमा रिट निवेदन दर्ता गराएका थिए । सोही कुरालाई लिएर प्रधानमन्त्री ओलीले आलोचना गरेका हुन् ।

त्यस्तै, सभामुख सापकोटाल किर्ते गरेको पनि ओलीले आरोप लगाएका छन् । उनले भने, 'उहाँले किर्ते गर्नुभएको छ । भन्न पनि लाज लाग्ने कुरा । सभामुखजस्तो पदको मान्छेले किर्ते सनाखत गर्छ । साढे ३ बजे दर्ता गर्न लगेको कुरालाई १०:४० बजे ल्याएको भनेर किर्ते सनाखत गर्नुजस्तो लज्जास्पद कुरा के हुन्छ ?,' उनले भने ।

प्रधानमन्त्रीविरुद्ध नेकपाका सांसदहरूले ल्याएको अविश्वासको प्रस्तावको समयलाई लिएर विवाद उत्पन्न भएको थियो । सोही विषयमा प्रधानमन्त्रीले सभामुखको आलोचना गर्दै किर्ते गरेको भनेका हुन् ।

उपराष्ट्रपतिलाई सरकारविरुद्ध भाषण गर्दै हिँड्नुभन्दा निर्वाचनमा आउन ओलीले चुनौती दिएका छन् । उपराष्ट्रपति पुनले पत्रकार महासंघको महाधिवेशनको उद्घाटन गर्दै प्रतिनिधिसभा विघटनको विरोध गरेका थिए । उक्त भनाइतर्फ इंगित गर्दै ओलीले भने, 'उपराष्ट्रपति सरकारविरुद्ध भाषण गर्दै हिँड्नुभएको छ । उहाँको पदले भाषण गरेर हिँड्ने, सरकारको विरोध गरेर हिँड्ने होइन । संविधान मिचियो, प्रजातन्त्र मासियो आदि कुराहरू, प्रतिनधिसभा विघटन गरेर बेठिक भयो चुनाव, गर्न पाइँदैन भन्ने होइन ।'

उपराष्ट्रपतिको पदबारे उल्लेख गर्दै प्रधानमन्त्री ओलीले थपे, 'उहाँ त चुनाव नगर्ने नै पृष्ठभूमिबाट आउनुभएको हो । अब त कमसेकम चुनावतिर आउनुस् ।'

प्रकाशित : फाल्गुन ८, २०७७ १६:४५
प्रतिक्रिया
पठाउनुहोस्

अब प्रचण्डलाई काँध हाल्न सक्दिनँ : प्रधानमन्त्री ओली

इकान्तिपुर डेस्क

काठमाडौँ — प्रधानमन्त्री केपी शर्मा ओलीले नेकपाका अध्यक्ष पुष्पकमल दाहाललाई अब काँध हाल्न नसक्ने बताएका छन् । नेकपा ओली पक्षले विराटनगरमा शनिबार आयोजना गरेको आमसभालाई सम्बोधन गर्दै न‍ेकपा अध्यक्ष रहेका ओलीले दुई/चार सिटमा सीमित हुन लागेका दाहाललाई आफूले ठूलो बनाए पनि गलत बाटो हिँडेकाले अब काँध नथाप्ने टिप्पणी गरेका हुन् ।

दाहालले राजनीतिमा गलत बाटो छानेको उनको नियति अब असफलता मात्रै रहेको ओलीले दाबी गरे । 'सिद्धिइसकेको प्रचण्डलाई, २/४ सिटमा सीमित हुने प्रचण्डलाई ल्याएर मैले एउटा ठूलै जुरो हालिदिएको थिएँ । जुरो भएपछि अलिकति सिङ पनि हालिदिएको थिएँ । लामा सिङ भएपछि उहाँमा अहंकार चल्यो । उहाँले हामीलाई सिध्याउन खोज्नुभयो,' ओलीले भने,'उहाँको नियति अब असफलताबाहेक केही छैन ।'

'प्रचण्डजीको माया लाग्छ । पहिले उहाँसँग वैद्य हुनुहुन्थ्यो । वैद्यले छाड्नुभयो, डाक्टर लिनुभयो । उहाँले नि छाड्नुभयो, अहिले झाँक्री लिनुभयो । वैद्यबाट डाक्टर, डाक्टरबाट झाँक्री तर उहाँलाई अब झाँक्रीले बचाउन सक्दैन,' ओलीले भने,'उहाँले गलत बाटो छान्नुभयो । राजनीतिमा गलत बाटो छान्नुभयो । विकासको बाटोमा तगारो हाल्न खोज्नुभयो । नेपालको राजनीतिमा अब उहाँले सफलता पाउने सम्भावना छैन ।'

दाहाललाई पार्टीमा फर्कन आग्रह गर्दै उनले भने, 'अझै पनि तपाईं फर्कन चाहनुहुन्छ भने फर्कनुहोस् । मिसिन हुन्न भने भीरबाट लड्नेलाई राम भन्न सकिन्छ काँध हाल्न सकिदैन । खिइँदै गएर सिधिने बाटोमा प्रचण्ड जानुभयो ।'

पुस ५ गते मन्त्रिपरिषद्को सिफारिसमा राष्ट्रपतिले प्रतिनिधिसभा विघटन गराइदिएपछि सत्तारुढ नेकपा दुई समूहमा विभाजन भएको छ । ओली समूह र दाहाल-नेपाल समूह बनेपछि आन्दोलन र सभा गर्दै नेताहरु एक अर्काबीच आरोप-प्रत्यारोपमा उत्रेका छन् ।


प्रकाशित : फाल्गुन ८, २०७७ १६:४१
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×