आन्दोलन प्रधानमन्त्री फेर्नकै लागि मात्रै हुने हो भने जनता सडकमा आउँदैनन् : वाग्ले- समाचार - कान्तिपुर समाचार

आन्दोलन प्रधानमन्त्री फेर्नकै लागि मात्रै हुने हो भने जनता सडकमा आउँदैनन् : वाग्ले

‘हिजोका आन्दोलनका घाइतेहरुको घाउ आलै छ । अब फेरि हिंसात्मक आन्दोलन हुनु हुँदैन ।’
‘सुवास नेम्बाङलाई यति निरीह कसले बनायो ?’
इकान्तिपुर डेस्क

काठमाडौँ — पत्रकार नारायण वाग्लेले प्रतिनिधिसभाविरुद्धको आन्दोलनलाई प्रधानमन्त्री फेर्ने साधन बनाए जनता सडकमा नआउने बताएका छन् । प्रेस संगठन नेपालको दोस्रो राष्ट्रिय सम्मेलनमा सम्बोधन गर्दै वाग्लेले आन्दोलनको उद्धेश्य प्रतिगमन लखेट्नुपर्ने हुनुपर्ने बताएका हुन् । 

‘अहिलेको आन्दोलन प्रधानमन्त्री फेर्नकै लागि मात्र हो भने जनता सडकमा आउँदैनन् । यदि प्रतिगमन लखेट्ने आन्दोलन हो भने तपाईंहरुले भन्न सक्नुपऱ्यो केका लागि आन्दोलन हो,’ प्रतिनिधिसभा विघटनविरुद्ध आन्दोलनरत पार्टीका नेताहरुलाई सचेत बनाउँदै वाग्लेले भने ।

साथै अबको आन्दोलन मांसाहारी हुनुपर्ने नेकपाका अध्यक्ष पुष्पकमल दाहालको भनाइप्रति पनि वाग्लेले आपत्ति जनाए । ‘हिजोका आन्दोलनका घाइतेहरुको घाउ आलै छ । अब फेरि हिंसात्मक आन्दोलन हुनु हुँदैन । त्यो राम्रो होइन, त्यसले प्रतिगमनलाई नै सक्रिय बनाउँछ । सत्ताले आन्दोलन नै भड्कियोस् भन्ने चाहन्छ । सत्ताबाट थप दमनको सम्भावना भएकाले नेतृत्वबाट शान्तिपूर्ण आन्दोलनको प्रतिबद्धता चाहिन्छ,’ वाग्लले भने ।

त्यस्तै अर्को प्रसंगमा संविधानसभा अध्यक्ष सुवास नेम्बाङ यतिबेला सबैभन्दा निरीह पात्रका रुपमा देखा परेको पनि वाग्लेले टिप्पणी गरे । ‘आज नेपालमा सबैभन्दा निरीह दुई कार्यकाल संविधानसभाका अध्यक्ष भएका व्यक्ति देखिएका छन् । ती व्यक्ति कसरी यति निरीह भए, कसले बनायो यति निरीह ?,’ वाग्लले प्रश्न गरे ।

त्यस्तै प्रतिपक्ष दल पनि अहिले निरीह देखिएको टिप्पणी गर्दै पत्रकार वाग्लेले भने, ‘आजको प्रतिपक्ष नेतृत्व किन लाचार छ ? प्रतिपक्ष दलको नेता प्रधानमन्त्रीको दैलोमा चाहर्नुपर्ने बाध्यता के हो । तपाईंहरुको संघर्ष त केबल कुर्सीका लागि हो भन्ने हामीले बुझिरहेका छौं । के यो लोकतन्त्र हो ?’ प्रधानन्यायाधीश प्रधानमन्त्रीको कोठामा हात फैलाएर जानुपर्ने कुरालाई लोकतन्त्र र शक्ति सन्तुलन कायम भएको मान्न नसकिने पनि वाग्लेको भनाइ थियो ।

हिजोको जनआन्दोलनमा गरिएका वाचाहरुमा कहाँकहाँमा नेतृत्व कहाँकहाँ चुक्यो भन्ने कुरा उल्लेख गरी आन्दोलनरत पार्टीहरुले बडापत्र सार्वजनिक गर्नुपर्ने पनि उनको भनाइ थियो ।

आफू सक्रिय पत्रकारितामा रहँदा सधैँ जनताका आवाज उठाउने गरेको उल्लेख गर्दै पत्रकार वाग्लेले भने, ‘पहिले म सक्रिय पत्रकार थिएँ, अहिले मसँग पत्रिका नभएकाले म माइक समात्न गएँ । हामीहरु माइतीघरबाटै प्रतिगमनविरुद्ध खबरदारी गरिरहेका छौं ।’

उनले नेकपाका अध्यक्षद्वय पुष्पकमल दाहाल र माधवकुमार नेपाललगायतका नेताहरुले पनि केपी शर्मा ओलीले गलत कदम चालिरहँदा किन खबरदारी नगरेको भन्दै प्रश्न गरे । देश र नागरिक कोरोना महामारीले आक्रान्त हुँदा संसद् बैठक आह्वान नगर्ने भन्दै वाग्लले आक्रोश व्यक्त गरे । अहिले संविधान मृत अवस्थामा रहेको र नेतृत्वले अब यसलाई ब्युझाउँने प्रतिबद्धतासहित अगाडि बढ्नुपर्नेमा पनि उनले जोड दिए ।

प्रकाशित : माघ ६, २०७७ १७:२६
प्रतिक्रिया
पठाउनुहोस्

नेकपा र प्रधानमन्त्री ओली दुवै असक्षम : प्रकाशचन्द्र लोहनी

कान्तिपुर संवाददाता

मोरङ — राष्ट्रिय प्रजातन्त्र पार्टी(राप्रपा)का अध्यक्ष प्रकाशचन्द्र लोहनीले नेकपा र प्रधानमन्त्री ओली असक्षम सावित भएको बताएका छन् ।

विराटनगरमा मंगलबार आयोजित पत्रकार सम्मेलनमा अध्यक्ष लोहनीले प्रधानमन्त्री ओलीको असक्षमताले बहुमतमा भएर पनि सरकार सञ्चालन गर्न नसकेको बताए ।

नेकपाभित्रको विवाद शक्ति, पद र पैसाको खेल भएको भन्दै अध्यक्ष लोहनीले प्रधानमन्त्री ओलीको कदमलाई गैरसंवैधानिक भएको बताए । उनले संसद् विघटनले दलहरुलाई फाइदा बेफाइदाभन्दा पनि संविधान अनुसार चल्ने कि नचल्ने भन्ने मुख्य कुरा भएको बताए । ‘बहुमतमा रहेका प्रधानमन्त्रीलाई संसद् विघटन गर्न संविधानले अधिकार दिएको छैन,’ उनले भने, ‘दुई पार्टी मिलेर वा एक व्यक्तिले समेत बहुमत पुर्‍याएर सरकार गठन गर्ने अधिकार संविधानमा हुँदाहुँदै प्रतिनिधिसभा विघटन गर्नु असंवैधानिक हो ।’

प्रधानमन्त्री ओलीको गतिविधि शंकास्पद भएको लोहनीको भनाइ थियो । ‘प्रधानमन्त्री ओलीले नयाँ नक्सासहितको किताब छाप्न रोक लागाएका छन्,’ उनले भने, ‘नेपाल सरकारले गरेको कुरामा रोक लगाउनु नै नियतमा खोट रहेको प्रष्ट हुन्छ ।’

उनले राजसंस्था र धर्म सापेक्षतालाई पार्टीले मुख्य एजेन्डाको रुपमा अगाडि बढाउने बताए । नेपालको पहिचानसँग राजसंस्थाको उपस्थिति जोडिएको लोहनीको भनाइ थियो । ‘देशको समृद्धि र विकासका लागि राजसंस्था अनिवार्य छ,’ उनले भने, ‘राजसंस्था पुन:स्थापनाका लागि जनमत संग्रह गर्नुपर्छ ।’

प्रकाशित : माघ ६, २०७७ १७:००
पूरा पढ्नुहोस्
प्रतिक्रिया
पठाउनुहोस्
×