देशभर कोरोना उपचारका लागि अक्सिजनसहितको ६ हजार बेड थपिने- समाचार - कान्तिपुर समाचार

देशभर कोरोना उपचारका लागि अक्सिजनसहितको ६ हजार बेड थपिने

कान्तिपुर संवाददाता

काठमाडौँ — स्वास्थ्य तथा जनसंख्या मन्त्रालयले देशभर अक्सिजनसहितको ६ हजार बेड हाइ डिपेन्डेन्सी युनिटको व्यवस्था गरिरहेको जानकारी दिएको छ ।

मन्त्रालयका प्रवक्ता डा. जागेश्वर गौतमले यसका लागि ४ अर्ब २५ करोड २७ लाख २० हजार विनियोजन गरी पठाइएको बताए ।

उपत्यका बाहिर हरेक प्रदेशमा ३/३ वटा अस्पतालमा २५ बेड थपिँदै छ । प्रदेश १ मा बीपी कोइराला स्वास्थ्य विज्ञान प्रतिष्ठान, कोसी अस्पताल, मेची अस्पताल र प्रदेश २ मा नारायणी अस्पताल, जनकपुर अस्पताल, सगरमाथा अस्पताल रहेका छन् ।

वाग्मती प्रदेशमा भरतपुर अस्पताल, हेटौंडा अस्पताल, धुलिखेल अस्पताल, गण्डकी प्रदेशमा पोखरा स्वास्थ्य विज्ञान प्रतिष्ठान, बाग्लुङ अस्पताल, गोरखा अस्पताल, लुम्बिनी प्रदेशमा लुम्बिनी अस्पताल, राप्ती स्वास्थ्य विज्ञान प्रतिष्ठान, भेरी अस्पताल, कर्णाली प्रदेशमा कर्णाली स्वास्थ्य विज्ञान प्रतिष्ठान , सुर्खेत अस्पताल, जाजरकोट अस्पताल, सुदूरपश्चिम प्रदेशमा सेती अस्पताल, महाकाली अस्पताल, डडेल्धुरा अस्पतालमा २५ /२५ बेडका दरले हाइ डिपेन्डेन्सी युनिट सुरु गर्न बजेट पठाइएको हो ।

त्यसैगरी काठमाडौं उपत्यकामा त्रिवि शिक्षण अस्पताल, पाटन अस्पताल र वीर अस्पतालमा सय/सय बेडको हाइ डिपेन्डेन्सी युनिट थपिनेछ ।

परोपकार प्रसूति तथा स्त्रीरोग अस्पताल, पुलिस अस्पताल, कीर्तिपुर आयुर्वेद अस्पताल, धुलिखेल अस्पताल, दहचोक अस्पताल, आर्मी अस्पताल, सिभिल अस्पताल, एपिएफ अस्पतालमा ५०/५० बेडको सेवा सुरु हुने डा. गौतमले बताए ।

नेपाल मेडिकल कलेज टिचिङ हस्पिटल, काठमाडौं मेडिकल टिचिङ हस्पिटल, किष्ट मेडिकल कलेज ,कान्ति बाल अस्पताल, नरदेवी अस्पताल, मानसिक अस्पताल, मनमोहन कार्डियो भास्कुलर एन्ड ट्रान्सप्लान्ट सेन्टर, मानव अंग प्रत्यारोपण केन्द्र, गंगालाल हृदयरोग केन्द्र, चापागाउँ अस्पताल, भक्तपुर नगरपालिका अस्पताल, भक्तपुर अस्पताल, सुमेरु अस्पताल, नेपाल कोरिया मैत्री अस्पताल, मेडिसिटी अस्पताल, ह्याम्स अस्पताल, ग्राण्डी अस्पताल, अल्का अस्पतालमा २५/२५ बेडको एचडीयू थपिनेछ ।

प्रकाशित : कार्तिक ६, २०७७ १८:१३
प्रतिक्रिया
पठाउनुहोस्

कविता : यो अश्लील सत्ता कसको हो ?

यादव देवकोटा

काठमाडौँ — हिजो,दुई तल्ले माटे घरट्याङ्कामा केही हजार रकमकेही मुरी धान फल्ने खेत र पाखोबारीगाउँमा त्यत्ति भएको मानिसलाई सामन्त भन्नेहरु को थिए ?सामन्त भन्दै तिनको टाउको गिँड्नेहरु को थिए ?


आज,

सबैभन्दा आलिसान महल

सबैभन्दा महँगो जीवनशैली

एकसाथ आधा दर्जन गाडीको ताँती

विदेशी अस्पतालमा उपचार

विदेशी रिसोर्टमा ऐस–आराम

सहरमा यो सब व्यवस्था जुगाड गरिसकेकाहरु को–को हुन् ?


हिजो

गरिखानेको व्यवस्था

श्रमजीविको सरकार

सर्वहाराको संसार

शिक्षा, स्वास्थ्य, रोजगार

मजदुर, किसान, हरितन्नमहरुको अधिकार भन्दै

सपना बेच्नेहरु को थिए ?


आज,

युगीन संकटको दिनमा

सत्ता भनेको फगत लास गन्ने

संवेदनाहीन मेसिनमात्रै हो भन्नेहरु को–को हुन् ?


हातमै नाम्लो च्यापेर

सडकपेटीमा मरिरहँदा सूर्यबहादुरहरु

देशमा कोही भोकै मर्दैन भन्दै

अश्लील गफ बेच्ने सत्ता कसको हो ?


उपचारको रकम तिर्न नसकेर नागरिकहरु

अस्पतालबाट आफन्तको शव बुझ्न सक्दैनन् !

गोजीमा केही हजार चुनदाम नहुँदा

खसेको पाठेघर च्यापेर क्यान्सर उमारिरहँदा आमाहरु

महामारीको दिनमा किनिएको स्वास्थ्य सामाग्रीमा

कमिसनको हिसाब जोडिरहेको सत्ता कसको हो ?


कलिला नानी ढाडमा बाँधेर

खाली खुट्टा हप्ता दिन लामो बाटो हिँडेका

आमाहरु कहाँका हुन् ?

पेटको भोकको राँको खप्न नसकेर

एक प्लेट भातको लागि

खुलामञ्चमा ओइरिएका नागरिक कहाँका हुन् ?

यी निरीह भोका पेटहरुलाई

समृद्धिको ठट्टा सुनाउने शासक कसको हो ?


सत्तामा सवार यो निर्लज्जतालाई

खसाउन अश्लीलताको घोडाबाट

गरिखानेहरुले

‘पाखुरी’को खिया टक्टक्याउने कहिले हो ?

प्रकाशित : कार्तिक ६, २०७७ १७:५८
पूरा पढ्नुहोस्
प्रतिक्रिया
पठाउनुहोस्
×