नवलपरासी पूर्व — कोरोना भाइरसको संक्रमणबाट कावासोतीका एक पुरुषको चितवन मेडिकलमा उपचारका क्रममा मृत्यु भएको छ ।
आइतबार कोरोना संक्रमण पुष्टि भएका कावासोती नगरपालिका वडा नम्बर ५ का ७७ वर्षका पुरुषको मंगलबार बिहान मृत्यु भएको हो ।
अस्पतालका निर्देशक दयाराम लम्सालका अनुसार उनमा निमोनियासमेत देखिएको थियो । गत शुक्रबार श्वासप्रश्वासको समस्या देखिएपछि उपचारका लागि अस्पताल भर्ना भएका उनमा दुई दिनपछि कोरोना संक्रमण पुष्टि भएको हो ।
स्वास्थ्य मन्त्रालयका अनुसार सोमबार साँझसम्म नवलपरासी पूर्वमा संक्रमितको संख्या एक हजार १ सय १३ पुगेको छ । नवलपरासी पूर्वमा अहिलेसम्म ८ सय ६८ जना संक्रमणमुक्त भएका छन् ।
