संसदीय उपसमितिले भन्यो –'ननकोभिडको बिरामीलाई सहज तरिकाले उपचारको व्यवस्था मिलाऊ'- समाचार - कान्तिपुर समाचार
कान्तिपुर वेबसाईट
AdvertisementAdvertisement

संसदीय उपसमितिले भन्यो –'ननकोभिडको बिरामीलाई सहज तरिकाले उपचारको व्यवस्था मिलाऊ'

कान्तिपुर संवाददाता

काठमाडौँ — कोभिड १९ नियन्त्रण तथा रोकथामका लागि सरकारले गरेका कामको अनुगमन गर्न गठित संसदीय उपसमितिले प्रत्येक अस्पतालहरुमा ‘नन कोभिड’ बिरामीहरुको सहज तरिकाले उपचारको व्यवस्था मिलाउन सुझाव दिएको छ ।

संसदको शिक्षा तथा स्वास्थ्य समिति अन्तर्गत गठित उपसमितिका संयोजक जीवनराम श्रेष्ठले प्रतिवेदन बुझाउँदै कोभिड बाहेकका अन्य रोगका बिरामीहरुले सहज उपचार सेवा पाउन नसकेको बताए । उपसमितिले पीसीआर रिपोर्ट छिटो प्रदान गर्न देशभरीका प्रयोगशालालाई एकीकृत रुपमा समन्वय गर्न पनि सुझाव दिएको छ ।

पीसीआर ल्याबको क्षमताअनुसार दक्ष जनशक्तिको व्यवस्था गर्दै पूर्ण क्षमतामा ल्याब सञ्चालन गर्नुपर्ने, होम आइसोलेसनमा बसेका संक्रमितको नियमित रुपमा स्वास्थ्यकर्मीले निगरानी गर्नुपर्ने उपसमितिले सुझाव दिएको हो । त्यसैगरी क्वारेन्टाइनमा रहेका बिरामीहरुलाई खाना बापत तोकिएको १७५ रुपैयाँ अपुग भएकाले बजार मूल्य अनुसार खानाको मूल्य निर्धारण गर्न पनि संयोजक श्रेष्ठले अनुरोध गरे ।

उपसमितिले कोभिड अस्पतालहरुमा भेन्टिलेटर, आईसीयू र दक्ष जनशक्तिको व्यवस्थापन गर्न,कोभिड उपचारमा खटिने स्वास्थ्यकर्मी र चिकित्सकलाई जोखिम भत्ता छिटो उपलब्ध गराउनु पर्ने, स्वास्थ्यकर्मी संक्रमित भएर उपचार सेवा प्रभावित हुन नदिन वैकल्पिक स्वास्थ्यकर्मीको व्यवस्थापन गर्न उपसमितिले सुझाव दिएको हो ।

स्वास्थ्यकर्मीलाई गुणस्तरीय पीपीई उपलब्ध गराउन, शव व्यवस्थापनका लागि शव गृहको क्षमता बढाउन, कोभिड संक्रमितको मृत्युदर बढेका बेला पनि सहज रुपमा शव व्यवस्थापन हुने गरि तयारी गर्ने सुझावसहित उपसमितिले समिति सभापति जयपुरी घर्तिलाई प्रतिवेदन बुझाएको हो ।

सांसद खगराज अधिकारीले शवगृह व्यवस्थापनलाई प्राथमिकतामा राख्‍न अस्पताल प्रशासनलाई आग्रह गरे । त्यसका साथै वीर अस्पतालमा बन्दीको मृत्यु प्रकरणका विषयमा बोल्दै सांसदहरुले शवगृह व्यवस्थापनमा उचित ध्यान दिन आग्रह गर्दै तीन दिनमै शव सड्ने अवस्थामा कसरी पुग्यो भन्ने प्रश्नको जवाफ दिनुपर्ने बताएका छन् ।

सांसद अञ्जना विशंखेले पनि शव गृह व्यवस्थापनबारे चासो राख्दै शवगृह जस्तो सुकै अवस्था भएपनि तीन दिनमा नै सड्ने अवस्था हुन्छ की हुँदैन भन्ने कुराको जवाफ दिनुपर्ने बताउँछिन् । वीर अस्पताल र कारागारले यसअघि नै कैदीबन्दी रामलखन जैसवालको मृत्यु शंकास्पद नभएको स्पष्टिकरण दिइसकेका छन् ।

पाटन अस्पताल, वीर अस्पताल, त्रिवि शिक्षण अस्पताल, धुलिखेल अस्पतालले कोरोना भाइरस संक्रमितको उपचार गर्नुपर्दा आफ्नो नियमित आम्दानी गुमाएकाले सरकारले अनुदान दिनुपर्ने उपसमितिले सुझाव दिएको छ ।

प्रकाशित : आश्विन ८, २०७७ १७:३६
प्रतिक्रिया
पठाउनुहोस्

राजविराजमा दुई दिनमा १५ जना फरार अभियुक्त पक्राउ

अवधेशकुमार झा

राजविराज — विभिन्न मुद्दामा फरार रहेकामध्ये १५ जनालाई सप्तरी प्रहरीले बुधबार र बिहीबार पक्राउ गरेको छ । सप्तरी जिल्ला अदालतमा रहेको मुद्दामा फैसला भइ सजाय तोकिइसकिएको भएपनि फरार रहदै आएका उनीहरुलाई जिल्लाका विभिन्न स्थानवाट नियन्त्रणमा लिइएको हो ।

कुटपिट मुद्दामा फरार रहेका राजविराज नगरपालिका–१ का ९८ वर्षीय उतिमलाल यादव, ४५ वर्षीय शंकरकुमार यादव, ३५ वर्षीय लक्ष्मण यादव, ३० वर्षीय लक्ष्मी यादव, वडा नम्बर–९ का ४४ वर्षीय गुलावलाल दास र ६६ वर्षीय सुब्बी यादवलाई नियन्त्रणमा लिइएको प्रहरी नायब उपरीक्षक तिलक भारतीले जानकारी दिए । यस्तै ज्यान मार्ने उद्योग र कुटपीट मुद्दाका फरारी राजविराज–९ का ७६ वर्षीय झौली नुनिया, कुटपीट अंगभंग मुद्दाका फरारी राजविराज–९ का सुबसु साह र लिलावती साह, राजविराज–१ का लुटपीट मुद्दाका फरारी ७५ वर्षीय गोसाई यादवलाई पनि नियन्त्रणमा लिइएको छ ।

यसैगरि कुटपीट मुद्दाकै फरारीहरु राजविराज १ का शत्रुधन यादव, राजविराज–९ का जुक्ती यादव, केही सार्वजनिक अपराध मुद्दाका फरारी राजविराज–१ का बडेलाल यादव, जालसाजी मुद्दाका फरारी राजविराज–६ का झवर यादवलाई नियन्त्रणमा लिइएको नायब उपरीक्षक भारतीले बताए । अदालतको फैसला कार्यान्वयन अन्तर्गत फरारीहरुलाई नियन्त्रणमा लिने अभियान अन्तर्गत जिल्ला प्रहरी कार्यालय सप्तरीबाट प्रहरी निरीक्षक सन्तोषकुमार खडकाको नेतृत्वमा खटिएको टोलीले उनीहरुलाई नियन्त्रणमा लिइएको हो । नियन्त्रणमा लिइएकाहरुलाई जिल्ला अदालतमा पेश गरिएको छ ।

यसैगरि लागूऔषध मुद्दामा फरार रहेका अग्नीसाइर कृष्णासवरण गाउँपालिका–५ का ग्वाला मेहता भनिने महेन्द्र मेहतालाई आफ्नै घरमा लुकेर बसेको अवस्थामा पक्राउ गरि म्याद थप भइ अनुसन्धान भइरहेको नायब उपरीक्षक भारतीले जनाए ।

हत्या आरोपी आफै हाजिर

यसैबीच सप्तरीको महदेवा गाउँपालिका–१ का ८० वर्षीय सुबी यादवलाई कर्तव्य गरि मारेको कर्तव्य ज्यान मुद्दाका आरोपी सोही स्थानका रविलाल यादव आफै प्रहरी कार्यालयमा हाजिर भएका छन् । ०७७ वैशाख २३ गते रविलालले सुब्बी यादवको हत्या गरेको आरोप छ । सोही दिनदेखि फरार रहँदै आएका रविलाल बुधबार निवेदनसहित प्रहरीमा हाजिर भएको र म्याद थप भइ अनुसन्धान भईरहेको नायव उपरिक्षक भारतीले बताए ।

प्रकाशित : आश्विन ८, २०७७ १७:२०
पूरा पढ्नुहोस्
प्रतिक्रिया
पठाउनुहोस्
×