कोरोनाबाट पाेखराका एक संक्रमितको मृत्यु- समाचार - कान्तिपुर समाचार

कोरोनाबाट पाेखराका एक संक्रमितको मृत्यु

लालप्रसाद शर्मा

पोखरा — कोरोना संक्रमणबाट पोखरा–१० का ७० वर्षीय एक पुरुषको मृत्यु भएको छ  । क्यान्सर रोगबाट पीडित उनको पोखराकै मनिपाल शिक्षण अस्पतालमा उपचारका क्रममा सोमबार राति ११ बजेर २० मिनेटमा मृत्यु भएको प्रदेश स्वास्थ्य निर्देशनालयले जनाएको छ ।

निर्देशनालयका अनुसार उपचारका लागि भर्दौ २५ मा अस्पताल भर्ना भएका उनमा आइतबार कोरोना पुष्टि भएको निर्देशनालयका निर्देशक एवं प्रदेश कोरोना नियन्त्रण तथा रोकथाम कार्यक्रमका प्रवक्ता डा. विनोदबिन्दु शर्माले बताए । योसँगै कोरोनाबाट गण्डकी प्रदेशमा ३१ जनाको मृत्यु भएको छ ।

यसैबीच मंगलबार दिउँसो १ बजेसम्ममा प्रदेशभरि कोरोना संक्रमितको संख्या ३ हजार १ सय १६ पुगेको छ । क्षयरोग उपचार केन्द्र पोखरा, पोखरा स्वास्थ्य विज्ञान प्रतिष्ठान, चितवन मेडिकल कलेजमा गरिएको पीसीआर परीक्षणमा मंगलबार विभिन्न जिल्लाका ५१ संक्रमित थपिएको निर्देशनालयले जनाएको छ । अधिकांश संक्रमित कन्ट्याक्ट ट्रेसिङबाट पहिचान भएका हुन् ।

संक्रमितमध्ये प्रदेशभरि १ हजार ८ सय ९५ जना निको भएका छन् । हाल सक्रिय संक्रमित संख्या १ हजार एक सय ९० छ ।

प्रकाशित : भाद्र ३०, २०७७ १३:४३
प्रतिक्रिया
पठाउनुहोस्

उमाकुण्डको पीडा : फोन टिप्दैन, इन्टरनेट छैन

टीका भट्ट

रामेछाप — रामेछापको उमाकुण्डमा फोन टिप्दैन । इन्टरनेटको सुविधा छैन । बिरामी पर्दा एम्बुलेन्सलाई खबर गर्न पनि मुस्किल भएको छ । ‘सेवा छैन भनौँ कहिलेकाहीँ पिलिक्क आउँछ पनि,’ बाम्तीका चुणामणि श्रेष्ठ भन्छन्, ‘छ भनौं आज कैयौं दिन भइसक्यो सम्पर्क हुन सकेको छैन ।’

श्रेष्ठका अनुसार देउराली डाँडाको टावर मर्मत नहुँदा नेपाल टेलिकमको कुनै पनि सेवा प्रभावकारी नभएको हो ।

जिल्लाको सबैभन्दा दुर्गम मानिने उमाकुण्डमा सञ्चार सेवा प्रभावित हुदा अधिकांश काम प्रभावित हुने गरेका छन् । गाउँपालिकाका अध्यक्ष शेरबहादुर सुनुवार भन्छन्, ‘हामीलाई टेलिफोन सम्पर्क नभएर बारम्बार समस्या भइरहेको छ । फोन र इन्टरनेट सेवा नै चल्दैन कसरी मिटिङमा सहभागी हुने । कसरी पालिकाका अन्य भागमा समन्वय गर्ने ?’ संघीय मामिला तथा स्थानीय विकास मन्त्रालयले दिने निर्देशनलगायतका जानकारी पाउन पनि समस्या भएको सुनुवारले गुनासो गरे ।

गुम्देल, बाम्ती, कुभुकास्थली, प्रिती, भुजी र गुप्तेश्वर गरेर ७ वडामै टेलिफोन सेवा प्रभावहीन भएको महिनौं भएको छ । वडा नम्बर–६, गुप्तेश्वरका वडाध्यक्ष कृष्णकुमार सुनुवार भन्छन्, ‘टेलिफोन गर्न घरबाट धाएरै डाँडामा पुग्नुपर्छ । बिरामी पर्दा एम्बुलेन्स बोलाउन पनि सकिँदैन । कहिलेसम्म डाँडा चढ्नु पर्ने हो ?’

सोमबार उमाकुण्ड पुगेकी प्रमुख जिल्ला अधिकारी रुद्रादेवी शर्मासँग गाउँपालिकाका अध्यक्ष सुनुवारले टेलिफोन सेवा प्रभावकारी रुपमा सञ्चालनका लागि पहल गरिदिन आग्रह गरेका छन् । प्रजिअ शर्माले उक्त समस्याका बारेमा जानकारी लिएर आवश्यक सुधारका लागि प्रयास गर्ने बताइन् ।

नेपाल टेलिकम रामेछापका प्रमुख विष्णु भण्डारीले बाम्तीको देउरालीस्थित रिपिटर टावरमा प्राविधिक समस्या देखिएका कारण उमाकुण्डको केही भागमा सञ्चार सम्पर्कमा कठिनाइ भए पनि अन्य स्थानमा सेवा सञ्चालनमा रहेको बताए । उनले समस्या भएको स्थानमा सेवा पुर्‍याउनका लागि थप टावरको निर्माण गर्नुपर्ने र त्यसका लागि कार्यक्रम माग गर्ने बताए ।

प्रकाशित : भाद्र ३०, २०७७ १३:३२
पूरा पढ्नुहोस्
प्रतिक्रिया
पठाउनुहोस्
×