काठमाडौँ — सिनामंगल बस्ने कृष्णबहादुर थापाकी ६६ वर्षीया श्रीमतीलाई साउन १६ गते नर्भिक अस्पतालमा कोरोना पुष्टि भयो । थापाले त्यसको भोलिपल्ट श्रीमतीलाई उपचारका लागि पाटन अस्पताल लगे । उनकी श्रीमती मुटु, दम र निमोनियाका बिरामी हुन् । २५ दिनमा कोरोनामुक्त भएपछि उनलाई घरमा ल्याइयो ।

कोरोनामुक्त भए पनि विभिन्न रोगका कारण उनलाई श्वासप्रश्वासमा समस्या हुन थाल्यो । टेलिभिजनमा लाइन्स क्लब अफ काठमान्डु समर्पणले सुरु गरेको अक्सिजन बैंकका बारेमा थाहा पाएपछि थापाले सम्पर्क गरे । श्रीमतीको अवस्थाबारे बताएपछि बैंकका कर्मचारीले पनि अक्सिजन सिलिन्डर लिने प्रक्रियाबारे बताए । थापाले आफू बस्ने वडाबाट सिफारिस लिएर फर्म भरेपछि अक्सिजन बैंककै कर्मचारीले सिलिन्डर घरमा ल्याई प्रयोग गर्ने विधि पनि सिकाए । अहिले थापाकी श्रीमती श्वास फेर्न गाह्रो हुनासाथ उक्त अक्सिजन प्रयोग गर्छिन् ।

कोभिड–१९ संक्रमित बिरामीको उपचारका लागि आवश्यक अक्सिजन निःशुल्क प्रदान गर्ने उद्देश्यले क्लबले साउन ३१ गतेदेखि सानेपामा ‘अक्सिजन बैंक’ सुरु गरेको छ । क्लबको फन्डबाट करिब ३० लाख रुपैयाँ खर्चेर सानाठूला गरी २ सय वटा अक्सिजन सिलिन्डर खरिद गरी अक्सिजन बैंकको सुरुवात गरेको हो । होम आइसोलेसनमा बस्ने विपन्न वर्गका बिरामीहरूलाई लक्षित गरी बैंक स्थापना गरेको क्लबका अध्यक्ष दीपक बंशलले बताए । गम्भीर बिरामी परेका संक्रमितलाई अस्पताल र सामान्य बिरामीलाई घरमा राखेर उपचार गर्न सके अस्पतालमा बिरामीको भीडभाड कम हुने उनी बताउँछन् ।

अक्सिजन बैंकको सेवा विशेषगरी असहाय तथा आर्थिक अवस्था कमजोर भएका कोभिड संक्रमितहरूका लागि भए पनि अत्यावश्यक भएमा अन्य व्यक्तिहरूलाई पनि उपलब्ध गराउने उनको भनाइ छ । अक्सिजन उपलब्ध गराउनुअघि आफूहरूले ती व्यक्तिहरूको सम्पूर्ण विवरण लिने गरेको ‘अक्सिजन बैंक’ का अध्यक्ष विवेक शर्माले बताए । ‘कुनै व्यक्तिलाई अक्सिजनको आवश्यकता भएको खण्डमा सम्बन्धित वडाध्यक्षबाट सिफारिस ल्याउनुपर्ने हुन्छ,’ शर्माले भने । त्यसपछि उक्त व्यक्तिलाई सिलिन्डर पठाउने गरेको उनले जानकारी दिए । वडाध्यक्षको सिफारिस ल्याउन नसकेको खण्डमा क्लबले ती व्यक्तिका बारेमा सबै बुझेर मात्र अक्सिजन दिने गरेको उनले बताए ।