सल्यान — गाउँमाथिबाट खसेको पहिरोले बाग्चौर नगरपालिका–१२ ओखरेनीका वीरसिंह डाँगीको घर बगायो । गत बुधबार राति १ बजेतिरको यो घटनामा वीरसिंहका छिमेकी सूर्यबहादुर ओलीको पनि घर पुरियो । दुवै परिवार एक सातादेखि विस्थापित छन् ।

उनीहरू मात्र होइन, ओखरेनी, जरेपानी र अँधेरीका ७१ परिवार अहिले दुर्गा माविमा बस्दै आएका छन् । केहीको घर भत्किएको छ भने केहीको घर पहिरोको उच्च जोखिममा छन् । विस्थापित भएर बसेकै ठाउँ पनि बगाउने हो कि भन्ने चिन्ताले रातभर निद्रा नलाग्ने उनीहरूको गुनासो छ । ‘ठूलो कालबाट बाँचियो तर आँखा वरिपरि त्यही पहिरो आउँदा रातभर निदाउन सकिँदैन,’ डाँगीले भने, ‘त्यसमा पनि अहिले बसेकै ठाउँ बगाउने हो कि भन्ने चिन्ता सबैलाई छ ।’

विस्थापित भएदेखि उनीहरूले न पेटभरि खान पाएका छन् न राम्ररी सुत्न नै । ‘वर्षौं भारत बसेर कमाएको पैसाले बनाएको घर एकैछिनमा पुरियो,’ डाँगीले भने, ‘अब न अन्न उब्जाउने जग्गा छ न घर नै ।’ एक महिनाअघि भारतबाट फर्कंदा कमाएर ल्याएको ५० हजार रुपैयाँ पनि पहिरोले पुरेको उनले सुनाए ।