कोरोना संक्रमणमुक्त चिकित्सक भन्छन्– ‘मलाई ओपीडीमा बिरामीबाटै सरेको हो’- समाचार - कान्तिपुर समाचार
कान्तिपुर वेबसाईट
AdvertisementAdvertisement

कोरोना संक्रमणमुक्त चिकित्सक भन्छन्– ‘मलाई ओपीडीमा बिरामीबाटै सरेको हो’

‘सर्तक रहौं, व्यक्तिगत सुरक्षाका उपायहरु अवलम्बन गरौं’
बुनु थारु

काठमाडौँ — कोरोना भाइरसको संक्रमण दर विश्वभर नै बढ्दो छ । नेपालमा पनि संक्रमितको संख्या बढेसँगै फ्रन्टलाइनमा रहेर उपचारमा खटिएका स्वास्थ्यकर्मीहरु पनि संक्रमित बन्न पुगेका छन् । इपिडिमियोलोजी तथा रोग नियन्त्रण महाशाखाका अनुसार सोमबारसम्म देशभरमा २६० भन्दा बढी स्वास्थ्यकर्मीमा कोरोना संक्रमण देखिएको छ ।

कोरोना संक्रमणमुक्त भएर फेरि बिरामीको उपचारमा फर्केका एक स्वास्थ्यकर्मीसँग उनका अनुभवलाई लिएर कान्तिपुरकी बुनु थारुले कुराकानी गरेकी थिइन् । संक्रमण मुक्त भएका ती चिकित्सकले आफ्नो नाम भने गोप्य राखिदिन आग्रह गरेका छन् । ती चिकित्सकसँग गरिएको कुराकानी उनकै शब्दमा :

म एक निजी अस्पतालमा कार्यरत फिजिसियन हो । नेपालमा कोरोना संक्रमण देखिएसँगै हामी सजग सबै थियौँ । अस्पतालमा भएका स्वास्थ्यकर्मीहरुलाई तालिम पनि दिइएको थियो । अस्पतालमा इन्फेक्सन कन्ट्रोलको टिम पनि छ । हाम्रो अस्पतालमा पहिलो पटक असार १८ गते एक जना नर्सलाई संक्रमण देखिएको थियो ।

उनलाई संक्रमण देखिएपछि उनीसँग ‘एक्सपोज’ भएका अरु साथीहरु क्वारेन्टाइनमा बस्यौँ । कुल ९ जना स्टाफ क्वारेन्टाइनमा बसेका थियौँ । क्वारेन्टाइनमा बसेको ७ दिनपछि पीसीआर परीक्षण गराएका थियौं । जसमा ४ जनालाई कोरोना देखियो । त्यसमा म पनि परें । सुरुमा आफूलाई पनि कोरोना संक्रमण भयो भनेर सुन्दा डर लागेजस्तो भएको थियो । यद्यपि ममा कुनै प्रकारको लक्षणहरु भने देखिएको थिएन । अरु साथीहरुमा पनि देखिएको थिएन । मलाई असार २७ गते कोरोना पुष्टि भएको थियो ।

हामीलाई आइसोलेसनमा राखेर उपचारका लागि काठमाडौं मेडिकल कलेज दुवाकोट लगियो ।

लक्षणहरु पनि नभएकाले डर लाग्ने आत्तिने केही भएन । आफैं स्वास्थ्यकर्मी भएकोले धेरै कुरा बुझिने रहेछ । अस्पतालमा रहेका चिकित्सहरुले हालखबर सोधिराख्थे । काउन्सिलिङ पनि दिइयो । त्यसले पनि अझै मोटिभेट गरेको हो । स्वास्थ्यकर्मी भए पनि अरु आमनागरिकजस्तै अलिअलि डर त आइहाल्ने रहेछ ।

केही अरु लक्षण देखिहाल्ने हो कि भन्ने डर थियो । आइसोलेसनमा बसिरहँदा सामाचारहरु हेरिन्थ्यो मान्छे मरेको सुन्दा पनि आत्तिएजस्तो हुन्थ्यो । अहिले पनि फेरि संक्रमणको सिकार होइएला कि भन्ने डर लाग्छ । एकदम प्रेसर फिल भएको जस्ता हुने समाज तथा परिवारले के भन्ला भन्ने कुरा मनमा खेलिरहन्छ ।

मैले त घरमा पनि धेरै समय त क्वारेन्टाइनमा छु मात्रै भने । पोजिटिभ भएँ भनेर भनिन । तर पछि सुनाएँ । केही त्यस्तो प्रतिक्रिया जनाउनुभएन ।

आइसोलेसनमा बसेको १३औं दिनमा रिपोर्ट नेगेटिभ आएको थियो । फेरि १७ औँ दिनमा नेगेटिभ रिपोर्ट आएपछि घर फर्कें । घर फर्किएपछि पनि ४ दिन होम क्वारेन्टाइनमा बसेँ । सायद साउन ४ गते घर फर्केको हो ।

मुख्य कुरा आफ्नो रोग प्रतिरोधात्मक क्षमता, समाज तथा परिवारको साथ र आफू मनोवैज्ञानिक रुपमा सकरात्मक रहे कोरोना जितिने रहेछ । अस्पतालका बसाइँमा मैले आफ्ना साथीभाइसँग कुरा गर्ने, आफूलाई हेर्न आउने चिकित्सक तथा नर्ससँग कुरा गर्ने गरें । साथै फिल्महरु हेर्ने, समाचार हेर्ने, पूराना अन्तर्वार्ताहरु हेर्ने काम गरें । त्यसैगरी रामायणका केही एपिसोड पनि हेरेँ ।

‘मलाई ओपीडीमै बस्दा सरेको हुनुपर्छ’
अब त संक्रमितको संख्या बढेको बढ्यै छ । समुदायस्तरमा पनि फैलिएको हो जस्तो देखिन्छ । पीपीई लगाएर नै काम गरेप नि जोखिम कम हुँदैन हामीमा । अहिले कति संक्रमितहरु यत्तिकै परीक्षण नगराएर बसेका पनि हुनसक्छन् किनकी लक्षण देखिएको हुँदैन । मुख्य कुरा त बिरामीहरुमा नसरोस् र उनीहरुबाट हामीमा नसरोस् भन्नेमा नै सजग हुने हो ।

मलाई सायद ओपिडीमा जँचाउन आएको एक व्यक्तिबाट सरेको हुनुपर्छ । किनकी उनी होम आइसोलेसनमा बसेका थिए पछि शंका लागेर उपचारमा आएका थिए । उनैलाई पछि कोरोना पुष्टि भएको थियो ।

अहिले त लक्षण देखिएका कोरोना संक्रमित पनि देखापरिरहेका छन् । त्यो अलि डरलाग्दो हो । विदेशमा कोरोना संक्रमितलाई सम्भव भएसम्म घरमै बस्न सल्लाह दिइन्छ । नेपालमा त्यो त्यति सम्भव देखिँदैन । किनकी धेरैजना घरभाडामा बसेका हुन्छन् । त्यसमाथि परिवारका सदस्य पनि धेरैजना हुन्छन् ।

सरकारले बढी भन्दा बढी आइसोलेसनको व्यवस्था गर्नुपर्यो । परीक्षणकोे दायरा बढाउँदै लानुपर्छ ।

पीपीई लगाएर हामीले पनि दूरी कायम गरेर बिरामी जाँच्नुपर्छ अनि बिरामी पनि मास्क तथा अरु जनस्वास्थ्यका मापदण्ड पालना गरेर सुरक्षित बस्नुपर्छ । पीपीई फुकाल्न नजान्दा पनि संक्रमणको जोखिम धेरै बढी हुन्छ । हामीले नै ३–४ पटक फुकाल्ने तथा लगाउने तालिम लियौँ । ८ घण्टाको ड्युटीमा पीपीई लगाएर काम गर्न गाह्रो हुन्छ । गर्मी हुन्छ । डाइपर लगाएर पनि काम गर्नुपर्ने अवस्था छ ।

यही हिसाबले स्वास्थ्यकर्मी संक्रमित भए, पछि उपचार गर्ने स्वास्थ्यकर्मी नै कम हुन पुग्छन् । जति एक्सपोज भए त्यति नै संक्रमणको जोखिममा पर्न सक्छन् । अहिले पनि म घरमा जाँदा एक्लै बस्ने गर्दछु । छुट्टै खाने गर्दछु । हामी स्वास्थ्यकर्मी मात्रैले ख्याल गरेर पुग्दैन ।

सर्वसाधारणले पनि आफ्नो ख्याल राख्नुपर्छ । अनि मात्र संक्रमणको जोखिम कम हुन्छ । त्यसैले भीडभाडमा जाँदै नजानुस् । संक्रमित भइहालेमा नडराउनुस् ।

प्रकाशित : श्रावण २८, २०७७ १२:४४
प्रतिक्रिया
पठाउनुहोस्

फिल्म सुटिङ सुरु नहुँदा अन्योलमा कलाकार, म्युजिक भिडियोबाट चित्त बुझाउँदै 

रीना मोक्तान

काठमाडौँ — कोभिड-१९ ले गर्दा फिल्म क्षेत्र करिब पाँच महिनादेखि ठप्प छ । हलमा ताला झुन्ड्याएको छ । फिल्मको छायांकन, प्रदर्शन सबै ठप्प । महिनौं फिल्मको काम बन्द भएपछि कलाकारमा नैराश्य पलाएको छ । काम नपाइने हो कि भन्ने चिन्ता भएको पनि केही कलाकारहरु बताउँछन् । 

'अरुबेला पनि अन्यौलको क्षेत्र हो हाम्रो, काम पाउन सकिन्छ कि सकिदैन भन्ने । तलबमा काम हुने होइन,' अभिनेत्री केकी अधिकारीले भनिन्, 'आकाशे खेती भन्ने शब्द प्रयोग हुने क्षेत्र हो हाम्रो । त्यहीमाथि कोरोनाको कहरपश्चात त त्यो अन्यौल झन् बढैको छ । काम एक त थोरै भइरहेको छ, त्यसमा पनि कसले पाउने कसले नपाउने भइहेको छ । फिल्म त बनेकै छैन । फाट्टफुट्ट म्युजिक भिडियो बनिरहेको हो ।'

लकडाउन खुकुलिएपछि सानो समूहमा म्युजिक भिडियोको छायाङ्कन हुन थालेको छ । म्यूजिक भिडियोमा सक्रिय कलाकारले मात्र यतिखेर काम पाइरहेको केकी बताउँछिन् ।

अभिनेता विपिन कार्की कलाकारमा कोभिड-१९ ले काम नपाइने चिन्ता बढेको बताउँछन् । '४/५ महिना सबै कामबिहीन भएर बस्नु भएको छ । मेरै साथी सर्कलमा मैले यस्तो अवस्था देखिरहेको पनि छु,' उनले भने ।

फिल्ममै निर्भर भएर बाँच्ने कलाकारलाई लामो समय काम नहुँदा गाह्रो हुने अभिनेता नाजिर हुसेन बताउँछन् । 'फिल्ममै निर्भर भएर काम गर्ने कलाकारलाई गाह्रो हुँदो रहेछ । घरबेटीले घरभाडा नदे भन्दैन । लामो समय यत्तिकै बस्दा अलिकति गाह्रो पर्दोरहेछ,' नाजिर भन्छन्, 'कहिले हल खुल्छ, कहिले कामहरु सुरु हुन्छ भन्ने कुराले मलाई पनि पिरोलेको छ । अरुको जस्तो १०-५ को काम होइन । हो, हाम्रो काममा जोखिम छ । त्यही काम नहुँदा चिन्ता हुँदो रहेछ ।'

नाजिरले यसबीच म्युजिक भिडियोमा काम गरे । यी कामहरुले केही राहत मिलेको उनी बताउँछन् । खाली समय किताब पढ्ने, कविता कोर्ने कुरामा मनलाई अल्झाउँछन् नाजिर । तर, कामको विषयमा सोच्दा चिन्ता बढ्ने उनको भनाई छ । 'कामको कुरा सोच्दाचाहिँ कहिलेबाट कसरी सुरु हुन्छ होला भन्ने कुराले मनमा चसक्क हुन्छ,' उनले सुनाए ।

अभिनेत्री वर्षा राउत पनि एक किसिमको अन्यौलले मनमा डेरा जमाएको बताउँछिन् । 'अलिअलि अन्यौल छ । यो मलाईमात्र भएको होइन, संसारभर यस्तै हो । अहिले त आफ्नो स्वास्थ्यको सुरक्षा हो । तर पनि साथीहरुबीच फिल्मको सुटिङ भइरहेको छैन, कसरी गर्ने होला है भन्ने छलफल हुन्छ,' उनी सुनाउँछिन् ।

काम नपाएर कलाकारहरु चपेटामा परेको बताउँछन् विपिन । उनले यसबीच ४/५ वटा फिल्मको स्क्रिप्ट पढे । कयौंले उनलाई म्युजिक भिडियोको अफर गरे । उनले यसबीच 'डर छैन'बोलको म्युजिक भिडियो गरे । 'हिजो अवस्था मेरो पनि त्यस्तै थियो । भोली पनि हुन सक्छ । म व्यस्त छु भनिरहँदा म सुरक्षित छु भन्ने मात्रै होइन । अरु कलाकारहरु एकदमै चपेटामा पर्नु भएको छ । यतिबेलासम्म त धानिराख्नु भएको थियो होला तर सबैको लागि प्रयाप्त काम गर्ने अवस्था नबनिसकेको अवस्था हो । म्यूजिक भिडियोले पनि धान्दैन सबै कलाकारलाई ।'

उनी यो क्षेत्र चलयमान नभएसम्म यी समस्याको समाधान नहुने बताउँछन् । 'जबसम्म चलचित्र क्षेत्र चलयमान हुँदैन । तबसम्म यो समस्या भइरहन्छ । हरेक क्षेत्रमा यस्तो समस्या भइरहेको बेला नेपाली फिल्म क्षेत्रलाई पनि यो समस्याले केही समय पीरोल्छ नै । किनभने आधा वर्ष जति यसरी नै बितिसकेको छ,' उनले भने ।

चलेका कलाकारलाई म्युजिक भिडियो र विज्ञापनले जोगाए पनि अन्य कलाकारलाई कोभिड-१९ ले समस्यामा पुर्‍याएको विपिन बताउँछन् । उनी थप्छन्,'यतिकै २/४ जनाले म्यूजिक भिडियो गरेर आफू सुरक्षितमात्र भएर हुँदैन । कलाकारहरुको बिजोग त हुनेवाला छ अझै पनि । महामारी पनि आक्रमक भइरहेको छ । त्यसैले अन्यौलपूर्ण छ । मलाई दुख पनि लागेको छ ।'

काम नपाएर निराश कलाकारलाई नआत्तिन सल्लाह दिन्छन् दयाहाङ राई । 'निराश भइहाल्नु पर्ने आवाश्यकता छैन । लगातार काम गरिरहेका कोभिडले गर्दा चुपचाप बसिरहेका छन् । आज सय प्रतिशत व्यक्तिले काम गरिरहेको छ भने भोलि ८० प्रतिशतले मात्र काम पाउला,' अभिनेता राई सुनाउँछन्, 'सबैतिर गम्भीर अवस्था आउँदाखेरी यस्तो सोच आउनु त स्वभाविक हो ।'

अभिनेता तथा निर्देशक निश्चल बस्नेत संकट हटेपछि काम स्वत बढ्ने अनुमान गर्छन् । 'अहिलेको ध्यान भनेको कोरोनाबाट आफू कसरी बच्ने भन्ने हो । त्यसपछाडि कामको कुरा आउँछ । काम हुन थालेपछि कमी हुन्छजस्तो लाग्दैन । तर, अहिले त जस्तो अवस्था छ त्यस्तोमा नै रहनु पर्‍यो । लकडाउन पार भएपछि काम नपाउने भन्ने त हुँदैन होला,' उनले भने ।

अभिनेत्री सुरक्षा पन्त अन्यौलबीच नै विकल्पतिर ध्यान पुर्‍याउनुपर्ने बताउँछिन् । 'प्रमुख त फिल्म क्षेत्र नै चलायमान हुन्छ कि हुँदैन भन्ने चिन्ता भयो । हल खोल्ने हो कि होइन । हल खोले पनि दर्शक जाने हो कि होइनन्,' उनले भनिन्, 'सरकारले पनि अन्तिम प्राथमिकतामा राखेको छ नि यो क्षेत्रलाई । तर अब यही अवस्थामा पनि कसरी काम गर्न सकिन्छ भन्ने विकल्प पनि खोज्नुपर्छ जस्तो लाग्छ ।'

उनी खाली समय सिर्जनशील बन्ने प्रयास गर्नुपर्ने धारणा राख्छिन् ।

कोभिडपछि सुनौलो भविष्यको आश

कोभिडपछि संख्यात्मक भन्दा पनि राम्रा फिल्म बन्ने आशमा छन् दयाहाङ । विपिन पनि यसमा आशावादी सुनिन्छन् । 'लकडाउन अगाडिभन्दा पछि तीव्र रुपमा धेरै फिल्महरु बन्ने कुराहरु सुनिरहेको छु । जब सबै खुल्नेछ नेपालमा झन् धेरै फिल्म बन्नेवाला छजस्तो लागिरहेको छ मलाई,' उनले भने ।

अभिनेत्री केकी पनि कोभिडपछि आउने परिवर्तनलाई लिएर सकरात्मक सुनिन्छिन् । 'कोभिडपछि हामीले एकदम राम्रा दिनहरु देख्छौंजस्तो लाग्छ,' उनले भनिन्, 'सबै कुरा फिल्टर हुन्छजस्तो लाग्छ । जो फिल्ममा साँचै लगाव राख्छन्, जो लागिपरेका यो क्षेत्रमा उनीहरुमात्र स्थीर भएर बस्छजस्तो लाग्छ ।'

थप्छिन्, 'अझ राम्रा-राम्रा सिर्जनाहरु आउँछ जस्तो लाग्छ । अहिले अध्ययन गर्ने मौका मिलेको छ, यो समयमा सिँचित रहेको शक्ति पछि बाहिर निस्कन्छजस्तो लाग्छ ।'

दर्शकसम्म पुग्न म्युजिक भिडियो

फिल्मको काम बन्द भएपछि कलाकारले म्युजिक भिडियो गर्न थालेको देखिन्छ । दया, विपिन, केकी र नाजिरले पनि लकडाउन खुकुलिएपछि म्युजिक भिडियोमा काम गरे । फिल्मको काम बन्द भएपछि दर्शकसँग जोडिन म्युजिक भिडियो गरेको उनीहरु बताउँछन् ।

हालै गायक सन्तोष लामाको स्वरमा 'डर छैन' बोलको म्युजिक भिडियोमा देखिएका विपिन दर्शकसँग जोडिन म्युजिक भिडियोमा अभिनय गरेको सुनाउँछन् । 'जुन माध्यबाट भए पनि दर्शकसम्म पुग्न पाएँ । दर्शकसामु आफ्नो काम पोख्न पाएँ । त्यसले थोरै भए पनि राहत मिल्दो रहेछ,' विपिनले भने, 'भिडियोतिर ध्यान जाँदा मनोरोगी भइएन ।'

आफूलाई अफर आएका गीतहरुमध्ये उनले एउटा मात्र गीत रोजेर गरेका हुन् । असोजबाट 'प्रासद २'को छायांकनको तयारीमा जाने तयारीमा थिए उनी । तर, काठमाडौंमा कोरोना संक्रमित बढेसँगै छायांकन निश्चित नभएको उनी सुनाउँछन् ।

लकडाउनपछि अभिनेता पुष्प खड्काले पनि ७ वटा म्युजिक भिडियो गरे । फिल्मको काम नभएपछि म्युजिक भिडियो गरेको उनी बताउँछन् । म्युजिक भिडियोबाट फिल्ममा करियर थालेका पुष्प खड्कालाई यो समयमा कामको अभाव भने भएन । लकडाउनमै एउटा फिल्ममा अनुबन्धित भएका उनलाई पनि काम गर्ने हतारो छ ।

कोरोनाले वाक्क भएका दर्शकलाई मानसिक राहत दिन आफूले म्युजिक भिडियो गरेको दयाहाङ राई बताउँछन् । 'एउटा त सम्बन्धको कारण पनि हो । र अहिलेको समयमा धेरै कुराहरु ठप्प छ । यस्तो समयमा दर्शकसँग जोडिन पनि यो गरें । नयाँ गीतले राहत पनि देला भन्ने सोच आयो,' उनले भने, 'दोस्रो कुरा बजार ठप्प हुँदा आयस्रोत पनि ठप्प नै भयो । मेरो मात्र होइन अरु सबैको त्यस्तै भयो । यी सबलाई हेरेर स्वास्थ्यलाई पनि ख्याल गरेर काम हुन्छ भने गरौं भनेर गरेको हो ।'

सबै काम ठप्प हुँदा आफूलाई नैराश्यको भावना नआएको बताउँछन् दया । कोभिडले गर्दा अध्ययन गर्ने समय पाए उनले । 'विभिन्न कुरा खोज्ने, मनन गर्ने समय पाएको छु,' उनले भने ।

हालै 'डुब्लिकेट माया'बोलको म्युजिक भिडियो गरेका नाजिर ठूलो समूहमा काम गर्ने अवस्था नभएर भिडियो गरेको बताउँछन् । 'हामीलाई दर्शकसँग जोडिरहन लोभ हुन्छ । त्यो धागो हुन्छ नि त्यो नचुडोस् भन्ने हो। मेरो व्यक्तिगत कुरा मलाई यो क्षेत्रमा टिक्नु छ, जसरी हुन्छ । म्युजिक भिडियोबाट हुन्छ वा मेरो कविताबाट,' उनी भन्छन् ।

प्रकाशित : श्रावण २८, २०७७ १२:३४
पूरा पढ्नुहोस्
प्रतिक्रिया
पठाउनुहोस्
×