कान्तिपुर वेबसाईट
AdvertisementAdvertisement

आईसीयू भर्ना हुने कोरोना संक्रमितको संख्या बढ्दो

अतुल मिश्र

काठमाडौँ — कोभिड–१९ बाट संक्रमित भई आईसीयूमा भर्ना हुनेको संख्या बढ्न थालेको छ । केही दिनयता लक्षणसहितका संक्रमितको संख्या विस्तार भएसँगै आईसीयूमा जानेको संख्यामा वृद्धि भएको हो ।

‘हाल करिब एक तिहाइ कोरोना संक्रमितमा लक्षण देखिराखिएको छ,’ इपिडिमियोलोजी तथा रोग नियन्त्रण महाशाखाका निर्देशक एवं भाइरोलजिस्ट डा. वासुदेव पाण्डेले भने, ‘केही दिनअघिसम्म ९९.७ प्रतिशत संक्रमितमा लक्षण देखिएको थिएन, हाल त्यो अवस्थामा परिवर्तन भइरहेको छ । यो खतराको संकेत हो ।’

स्वास्थ्य मन्त्रालयका सहप्रवक्ता डा. समीरकुमार अधिकारीका अनुसार बिहीबार शुक्रराज ट्रपिकल तथा सरुवा रोग अस्पतालमा ८ जना, त्रिवि शिक्षण अस्पतालमा एक जना, पाटन अस्पतालमा २ जना गरी उपत्यकामा ११ जना आईसीयूमा छन् । थप एक जना भेन्टिलेटरमा समेत छन् । यस्तै, धुलिखेल अस्पतालमा एक जना संक्रमितको आईसीयूमा उपचार भइरहेको छ । देशभर २२ जना आईसीयूमा रहेको डा. अधिकारीले जानकारी दिए । बुधबार मृत्यु भएका तीनै संक्रमित आईसीयूमा उपचाररत थिए । जसमध्ये मोरङका ४५ वर्षीय पुरुषलाई भेन्टिलेटरमा समेत राखिएको स्वास्थ्य मन्त्रालयका प्रवक्ता डा. जागेश्वर गौतमले बिहीबार मिडिया ब्रिफिङका क्रममा जानकारी गराएका थिए ।

यस्तै, वीरगन्ज र काठमाडौंमा दुई जना चिकित्सक संक्रमणपछि आईसीयूमा उपचाररत छन् । हाल चिकित्साकर्मीहरूमा सबैभन्दा बढी संक्रमण वीरगन्जमा देखिएको नारायणी अस्पतालका मेडिकल सुपरिन्टेन्डेन्ट डा. मदनकुमार उपाध्यायले बताए । ‘हामीकहाँ एक डाक्टरसहित ५ जना संक्रमित आईसीयूमा छन्, त्यसमध्ये एक जनालाई भेन्टिलेटरमा राखिएको छ,’ उनले भने, ‘२ जना अर्थोपेडिक चिकित्सक, एक जना सर्जन, ३ जना फिजिसियन, २ जना मेडिकल अधिकृत, २ जना मेडिकल विद्यार्थी, ८ जना नर्सिङ स्टाफ, ६ जना स्विपर, २ जना पारामेडिक्स र एक जना एम्बुलेन्स चालकमा संक्रमण देखिएको छ ।’

धनुषा जिल्ला आइसोलेसन संयोजक डा. जामुन सिंहका अनुसार त्यहाँको कोभिड हस्पिटलमा ‘हाई भाइरल लोड’ भएका ५५ वर्षीय एक पुरुष आईसीयूमा छन् । उनलाई कुनै पनि बेला भेन्टिलेटरको आवश्यकता पर्न सक्ने बताउँदै उनले भने, ‘आईसीयूमा राखेर उपचार गर्नुपर्ने बिरामीको संख्या अझ बढ्न सक्छ ।’ वरिष्ठ छाती रोग विशेषज्ञ डा. रमेश चोखानी हालसम्मको विश्वको ट्रेन्ड हेर्दा ८० प्रतिशतभन्दा बढी व्यक्तिमा कोरोना संक्रमण आफैं निको हुने बताउँछन् । ‘१५ देखि २० प्रतिशत संक्रमितलाई अस्पताल जानुपर्छ । अस्पताल गएका मध्ये करिब एक तिहाइलाई आईसीयूमा राख्नुपर्ने अवस्था आउन सक्छ,’ उनले भने ।

उपचार शुल्क तोकियो

सरकारले निजी स्वास्थ्य संस्थाका लागि संक्रमितको उपचार शुल्क तोकेको छ । स्वास्थ्य मन्त्रालयका प्रवक्ता डा. गौतमका अनुसार सामान्य बिरामीका लागि अस्पतालले सेवा शुल्क प्रतिदिन ३ हजार ५ सयभन्दा बढी लिन पाउँदैनन् । मध्यम जटिल बिरामीको हकमा दैनिक अधिकतम सेवा शुल्क ७ हजार र जटिल, गम्भीर बिरामीका लागि दैनिक १५ हजारभन्दा बढी लिन पाइँदैन ।

प्रकाशित : श्रावण १६, २०७७ ०९:०८
प्रतिक्रिया
पठाउनुहोस्

संक्रमण बढिरहे नयाँ निर्णय लिने तयारी

कान्तिपुर संवाददाता

काठमाडौँ — लकडाउन खुलेसँगै मुलुकमा कोरोना भाइरसको संक्रमण बढेकाले यस्तै अवस्था रहे नयाँ निर्णय लिनुपर्ने अनुमान गरेर कोभिड–१९ संकट व्यवस्थापन केन्द्र (सीसीएमसी) को निर्देशक समितिले छलफल थालेको छ । समितिले बिहीबार परीक्षणलाई अझ बढाएर परिस्थिति मूल्यांकन गर्ने विषयमा छलफल गरेको हो ।

साउन ६ गते लकडाउन सकिएको घोषणा गर्दा मुलुकमा संक्रमणका कारण मृत्यु हुनेको संख्या ४० थियो । तर पछिल्ला ९ दिनमा १५ जनाको मृत्यु भइसकेको छ । यस्तै, साउन ६ गते संक्रमित संख्या १७ हजार ९ सय ९४ थियो भने साउन १५ गतेसम्ममा उक्त संख्या बढेर १९ हजार ५ सय ४७ भएको छ ।

उपप्रधान तथा रक्षामन्त्री ईश्वर पोखरेलको नेतृत्वमा बसेको बैठकमा सीसीएमसी सचिवालयले संक्रमणको स्थिति प्रस्तुत गरेको थियो । तथ्यांकको विश्लेषण गर्दै समितिका सदस्यहरूले एक–दुई दिन परीक्षणको दायरा बढाएर हेर्ने र त्यसपछि पनि संक्रमण बढेको पाइए नयाँ निर्णय लिनुपर्ने निचोड निकालेको प्रधानमन्त्री तथा मन्त्रिपरिषद् कार्यालयका सचिव महेन्द्रप्रसाद गुरागाईंले जानकारी दिए । उनका अनुसार सरकारले सीमा क्षेत्रमा अझै कडाइ गर्नुपर्ने देखिएको छ । ‘बाहिरबाट मान्छे नआऊन् भन्ने विषयमा पनि छलफल भएको थियो,’ उनले भने । बैठकमा भदौ १ गतेपछि लामो दूरीका यातायात सेवा सञ्चालन र घरेलु र अन्तर्राष्ट्रिय विमान सञ्चालनका सम्बन्धमा सम्बन्धित मन्त्रालयले तयार पारेको मापदण्डमाथि पनि छलफल भएको उनले जानकारी दिए ।

सरकारले साउन ७ गतेबाट यातायात सेवामा जोर–बिजोर नम्बर प्रणाली हटाएको छ भने दुई सिफ्ट सञ्चालन हुँदै आएका सरकारी कार्यालय एकै सिफ्टमा कायम गरिएको छ । यस्तै, बिहीबारबाट ट्रेकिङ, ट्राभल्स, पर्वतारोहण, पर्यटन व्यवसाय, होटल र रेस्टुरेन्ट (सामूहिक भोज, भेलाबाहेक) सञ्चालन गर्न पाउने निर्णय गरेको थियो । सरकारले भदौ १ गतेबाट लामो दूरीका सवारीसाधन, विद्यार्थी भर्ना, परीक्षा सञ्चालन, आन्तरिक तथा अन्तर्राष्ट्रिय उडान र अन्तर्राष्ट्रिय खेलकुद प्रशिक्षण, प्रारम्भिक चरणका खेललाई पनि सञ्चालन गर्न पाउने निर्णय गरेको छ ।

सरकारले अझै विद्यालय, कलेज, ट्युसन सेन्टर, तालिम केन्द्र सञ्चालन तथा तोकिएबाहेकका अन्तर्राष्ट्रिय नाकाबाट प्रवेशमा रोक लगाएको छ । यस्तै, सिनेमा हल, पार्टी प्यालेस, डान्सबार, सैलुन, ब्युटीपार्लर तथा स्पा, स्विमिङ पुल, जिमखाना, हेल्थ क्लब, सामूहिक खेलिने खेल, खेल मैदानमा हुने प्रस्तुति, धार्मिक, सामाजिक स्थल, पुस्तकालय, संग्रहालय, चिडियाखाना, सभा, गोष्ठी, तालिम, सेमिनार प्रदर्शन, मेला र सम्मेलनमा भने अझै रोक लगाइएको छ ।

प्रकाशित : श्रावण १६, २०७७ ०९:०३
पूरा पढ्नुहोस्
प्रतिक्रिया
पठाउनुहोस्
×