मोरङ —  बक्राहा खोलाको बाढीले तटबन्ध कटान गरिरहेकाले ६ वटा गाउँ बाढीको उच्च जोखिममा छन् । सुनवर्षी नगरपालिका–६ को कैनी, वडा ७ को चैता, रतुवामाई–५ को मुसहरभिट्टा, वडा ९ को जयनगर, पथरीशनिश्चरे–५ मौलीबारी र उर्लाबारी–८ को राजघाट जोखिममा परेका हुन् ।

सुनवर्षीको चैतामा बक्राहाको बाढीले बायाँतर्फको तटबन्ध १ सय ५० मिटर कटान गरेको छ । भेल गाउँमा पस्ने जोखिम बढेपछि स्थानीय प्रशासनले चार सुकुम्बासी परिवारलाई सुरक्षित स्थानमा सारेको छ ।

सतारु ऋषिदेव, विशाल ऋषिदेव, वरुण ऋषिदेव र लक्ष्मण ऋषिदेवको परिवारलाई सारिएको मोरङका प्रहरी प्रवक्ता डीएसपी लोकदर्शन थापाले बताए । कटान रोक्न स्थानीय र प्रहरीको सहयोगमा कोसी तथा बक्राहा नदी व्यवस्थापन आयोजना विराटनगरले बाँसको प्रकुपाइन जडानको काम थालेको छ । आयोजना प्रमुख भिलानन्द यादवले चैतामा पाँच फिट चौडाइको तटबन्ध भेलले धेरै ठाउँ भत्काएकाले बाढी नियन्त्रणको काम धमाधम गरिरहेको बताए । ‘त्यो तटबन्ध पूरै भत्काए चैता गाउँ नै बगाएर लग्ने देखिन्छ,’ उनले भने, ‘रतुवामाईको जयनगरमा बायाँतर्फको सय मिटर र उर्लाबारीको राजघाटमा डेढ मिटर तटबन्ध कटान गरेको छ । रोकथामका लागि प्रकुपाइन जडानको काम गराइरहेका छौं ।’

सुनवर्षी–६, कैनीमा दायाँतर्फको ३ सय मिटर, रतुवामाई–५, मुसहरभिट्टाको बायाँतर्फको ३ सय मिटर र पथरीशनिश्चरे–५, मौलीबारीको ३ सय ५० मिटर बायाँतर्फको कटान भइरहेकाले तटबन्ध जोगाउन बाँसको प्रकुपाइन जडानको काम गरिसकेको यादवले बताए । मंगलबार खोलामा बाढी केही घटेकाले प्रकुपाइन जडानको काममा तीव्रता दिएको उनले जानकारी दिए ।

यस्तै, चिसाङ खोलामा आएको बाढीले लेटाङमा बहावको दिशा नै परिवर्तन हुने देखिएको छ । आयोजना प्रमुख यादवका अनुसार लेटाङ नगरपालिकाको मसानघाट र लेटाङ पुलभन्दा दक्षिणमा गरी दुई ठाउँमा खोलाले धार परिवर्तन गर्ने जोखिम छ । कानेपोखरी गाउँपालिकाको होक्लाबारी, बेलबारी र रंगेली नगरपालिकामा चिसाङको बाढी खेत कटान गर्दै गाउँ पस्ने जोखिम बढेको जनप्रतिनिधिहरूले बताए । यस्तै लोहन्द्रा खोलामा आएको बाढीले बेलबारी, धनपालथान–४ र ६ स्थित मोतिपुर, जहदा गाउँपालिका–२ र ४ मा धान खेत कटान गर्दै गाउँ पस्ने अवस्था छ ।