पहिरोसँगै खसेको ढुंगा फुटाउन नसक्दा अझै खुलेन सिद्धार्थ राजमार्ग
पाल्पा — सिद्धार्थ राजमार्गमा खसेको पहिरो तीन दिनदेखि पन्छाउन सकिएको छैन । सिद्धार्थ राजमार्गअन्तर्गत पाल्पाको तिनाउ गाउँपालिका दोभान बजार नजिकै तीन दिनअघि खसेको पहिरो पन्छाउन अझैसम्म नसकिएको हो ।
दोभान प्रहरी चौकीदेखि सय मिटर दक्षिणतर्फ पहिरोसँगै खसेको ठूलो ढुंगा फुटाउन कठिन भएकाले सडक खुलाउन नसकिएको दोभान प्रहरी चौकी प्रमुख सोमबहादुर सारु मगरले बताए । सडक डिभिजनले समयमै ब्रेकर नपठाएको र डोजरले पनि काम नगर्दा खुलाउन ढिलाइ भएको हो ।
सडक डिभिजनले तीन वटा डोजर, एक्स्काभेटर, लोडर तयारी अवस्थामा रहेको दाबी गरे पनि समयमा व्यवस्थापन गर्न नसक्दा यात्रुले सास्ती खेप्नु परेको छ । पाल्पातर्फबाट गएका सवारी साधन दोभान, भूतखोलातर्फ नै रोकिएको छ । सडक डिभिजन कार्यालयका सूचना अधिकारी शिवु खत्रीले काम जारी रहे पनि ढुंगा ठूला भएकाले पन्छाउन समस्या भएको बताए । उनका अनुसार ब्रेकरले ढुंगा फोर्न नसकिएकाले समस्या भएको हो ।
तीन दिनदेखि सिद्धार्थ राजमार्ग अवरुद्ध हुँदा सयौं यात्रु र सवारी साधनका चालकले सास्ती भोगेका छन् । सडक डिभिजन पाल्पाले समयमै पहिरो पन्छाउन नसक्दा उनीहरुलाई खाना खानसमेत समस्या भएको छ । राजमार्ग छेउका धेरै पसलहरु खुलेका छैनन् । छेउछाउमा चलेका होटल सञ्चालनमा छैनन् । केराबारी, चर्चरे, जोरधारा, झुम्साका होटलहरु नखुल्दा यात्रुहरुले थप सास्ती भोग्नु परेको छ । लकडाउनपछि ती स्थानका सानाठूला होटल खुलेका छैनन् ।
प्रकाशित : असार ३१, २०७७ ०९:३०