कान्तिपुर वेबसाईट
AdvertisementAdvertisement

तनहुँमा पहिरोमा पुरिएर ६ जनाको मृत्यु, ५ जना बेपत्ता [अपडेट]

सम्झना रसाइली

तनहुँ — आइतबार रातिदेखि परेको अविरल वर्षासँगै आएको बाढी पहिरोका कारण तनहुँमा ६ जनाको मृत्यु भएको छ भने ५ जना बेपत्ता भएका छन् । मृत्यु हुनेमा रिसिङ गाउँपालिका–८ भैंसीकिलेका ३० वर्षीय भेषबहादुर थापा र व्यास नगरपालिका–९ माझफाँटका ४० वर्षीया कमला थापा, २४ वर्षीय मनोज थापा र २१ वर्षीया अन्जना थापा रहेको जिल्ला प्रहरी कार्यालयका प्रहरी उपरीक्षक (एसपी) अरुण पौडेलले बताए ।

एसपी पौडेलका अनुसार माँझफाँटका एकै घरपरिवारका ३ जनाको मृत्यु भएको र एक जना बेपत्ता छन् । यस्तै, म्याग्दे गाउँपालिका–६ बेलौतेडाँडामा पहिरोले घर भत्किँदा १७ वर्षीया लक्ष्मी विकको पनि मृत्यु भएको छ ।

त्यस्तै, व्यास–९ माझफाँटकी ७० वर्षीया मैतकुमारी घर्तीको पनि पहिरोमा परेर मृत्यु भएको प्रहरीले जनाएको छ ।

बाढीपहिरोका कारण जिल्लामा ५ जना बेपत्ता छन् । उनीहरुको खोजी कार्य भइरहेको एसपी पौडेलले बताए । उनका अनुसार पहिरोमा परी मृत्यु भएका रिसिङका भेषबहादुरकी २९ वर्षीया श्रीमती नानुमाया, उनकी ५ वर्षीया छोरी अमिषा, भेषबहादुरका २२ वर्षीय भाइ महादेव, महादेवकी १९ वर्षीया श्रीमती मनिसरा थापा र व्यास–९ माझफाँटका २० वर्षीय राजेश थापा पनि बेपत्ता भएका छन् ।

तनहुँको रिसिङ गाउँपालिका–८ स्थित भैसिकिलेमा पहिरोले पुरिएकाहरुको खोजी हुँदै । तस्बिर : सम्झना रसाइली

यस्तै, पहिरोबाट घाइते भएका व्यास–९ माझफाँटका केशरबहादुर थापा र रिसिङ–८ की ६० वर्षीया ज्योति थापालाई थप उपचारका लागि पोखराको गण्डकी अस्पतालमा पठाइएको प्रहरीले जनाएको छ । केशरको खुट्टामा र ज्योतिको दायाँ हातमा चोट लागेको र दुवैको अवस्था खतरामुक्त रहेका प्रहरीले जनाएको छ ।

पहिरोमा बेपत्ता भएकाको खोजीकार्य, घाइतेको उद्धार तथा अन्य क्षति विवरण संकलनमा सरोकारवाला निकाय तथा स्थानीयसँग समन्वय गरी काम भइरहेको जिल्ला प्रहरी कार्यालयले जनाएको छ । बाढी पहिरोका कारण ठाउँठाउँमा बत्तीका पोलहरु लड्दा बिहानदेखि विद्युत अवरुद्ध भएको छ । पहिरोका कारण अवरुद्ध भएको राजमार्ग अहिले खुलाइएको छ । भित्री सडक भने अझै अवरुद्ध छन् ।

प्रकाशित : असार २९, २०७७ १३:०४
प्रतिक्रिया
पठाउनुहोस्

वाग्मती र लालबकैयाको बाँध फेरि कटान

शिव पुरी

राैतहट — अविरल वर्षाले जलस्तर बढेसँगै वाग्मती र लालबकैया नदीले यस वर्ष पनि बाँध कटान गर्न थालेका छन् । स्थानीय बासिन्दा जुनसुकै बेला बाढी पस्न सक्ने भन्दै त्रासमा छन् ।

रौतहटको बौधीमाई र परोहा नगरपालिकाको बीचमा लालबकैया नदीले कटान गरेको क्षेत्रमा बोराले बाँध लगाइँदै । तस्बिर सौजन्य : सशस्त्र प्रहरी

बाढी बस्ती पस्न नदिन कटान क्षेत्रमा आइतबार सशस्त्र, नेपाली सेना र नेपाल प्रहरीले बोराको बाँध लगाएका छन् । सशस्त्र प्रहरी प्रदेश २ का डीआईजी राजु अर्यालले बौधीमाई र परोहा नगरपालिकाको तेजापाकड क्षेत्रमा लालबकैया नदीले झन्डै सय मिटर बाँध कटान गरेको बताए । ‘कटानबाट जोगाउन बोरा राख्ने काम गरेका छौं । नदीमा पानी बढ्नासाथ कटान बढ्छ,’ उनले भने, ‘बर्सेनि लालबकैया र वाग्मतीले डुबान र कटान गर्दै आएका छन् ।’

दुवै नदी नियन्त्रण गर्न भारत सरकारले निर्माण गरिदिएको बाँध ठाउँ/ठाउँमा चर्किएपछि यसपटक वाग्मती–लालबकैया नदी नियन्त्रण आयोजना परवानीपुरले मर्मत गरेको थियो । राजदेवी नगरपालिकाको वाग्मती क्षेत्रमा पनि कटान सुरु भएपछि आइतबार रातिदेखि नै सुरक्षा निकायको पहलमा बोरा राख्ने काम भइरहेको छ । राजदेवी–३ चन्डियाका झगरु साहले वाग्मतीले सधैं दुःख दिने गरेको गुनासो पोखे । ‘पुरानो बाँध कटान गरेकाले डर लागेको छ,’ उनले भने, ‘कतिखेर भत्किन्छ, ठेगान छैन ।’


बाढीबाट हुने जनधनको क्षति रोक्न तत्कालीन जल–उत्पन्न प्रकोप विभागमार्फत भारत सरकारको सहयोगमा लालबकैया र वाग्मतीमा दुई दशकअघि ४४ किलोमिटर बाँध बनाइएको थियो । अहिले ठूलो भेल आए त्यसले थेग्न नसक्ने स्थानीयको भनाइ छ । गत वर्ष साउन २९ गते लालबकैयाको बाढीले इनरबारी क्षेत्रको झन्डै १ मिटर बाँध कटान गरेको थियो । यसले त्यहाँका ३/४ सय घर जोखिममा परेका थिए । भत्किएको ठाउँमा आयोजनाले ढुंगा राखेर तटबन्ध गरेको थियो । अहिले त्यस क्षेत्रमा खतरा टरे पनि पश्चिमी भेगका बैरिया, फतुहा, पोखरिया, तेजापाकड, खोरिया, बुटुवा लक्ष्मिनिया, इनर्वा, मर्यादपुर, गम्हरिया, बुनियाद क्षेत्रका स्थानीय त्रासमा छन् ।


वाग्मतीको पूर्व सर्लाहीतर्फ धुर्वा, महिनाथपुर, हरकठवा, मानपुर, हजरिया मलाह, राजघाट खर्सालको बाँध कटानको जोखिममा छ । यसले सदरमुकाम गौरसहित ब्रह्मपुरी, बेलबिछुवा, मुडवलवा, लक्ष्मिपुर, बसतपुर, भसेढवा, पिप्रालगायत दर्जन बस्तीमा बाढीको त्रास बढेको छ ।

प्रकाशित : असार २९, २०७७ १३:०१
पूरा पढ्नुहोस्
प्रतिक्रिया
पठाउनुहोस्
×