महानिर्देशक श्रेष्ठसहित ६ उच्च अधिकारीको सरुवा- समाचार - कान्तिपुर समाचार
कान्तिपुर वेबसाईट
AdvertisementAdvertisement

महानिर्देशक श्रेष्ठसहित ६ उच्च अधिकारीको सरुवा

कान्तिपुर संवाददता

काठमाडौँ — कोरोनाको उपचार सामग्री खरिदमा विवादमा पर्दै आएको स्वास्थ्य मन्त्रालयले लकडाउनकै क्रममा स्वास्थ्य सेवा विभागका महानिर्देशक महेन्द्र श्रेष्ठसहित ६ उच्च अधिकारीको सरुवा गरेको छ ।

स्वास्थ्य सामग्री खरिदकाबीच स्वास्थ्य सचिव यादव कोइराला सरुवा भएको एक सातामै विभागका महानिर्देशक श्रेष्ठसहित ६ जनासमेत हेरफेरमा परेका हुन् । श्रेष्ठसमेत महानिर्देशक भएको तीन महिनामै सरुवामा परेका हुन् ।

स्वास्थ्यमन्त्री भानुभक्त ढकालको निर्णयबाट विभागका महानिर्देशक श्रेष्ठलाई रक्षामन्त्री ईश्वर पोखरेलको संयोजकत्वमा रहेको उच्चस्तरीय समन्वय समितिमा काजमा पठाइएको छ ।

स्वास्थ्य मन्त्रालयका १२ औं तहका डा. दीपेन्द्ररमण सिंहलाई विभागको महानिर्देशकको जिम्मेवारी दिइएको छ । विभागको आपूर्ति व्यवस्थापन महाशाखाका निर्देशक भोगेन्द्र डोटेललाई मन्त्रालयमा तानिएको छ ।

स्वास्थ्य सामग्री खरिद विवादमा परेका कारण विभागका महानिर्देशक श्रेष्ठ र आपूर्ति व्यवस्थापन महाशाखा प्रमुख डोटेललाई एकैचोटि सरुवा गरिएको दाबी मन्त्रालय स्रोतको छ ।

मन्त्रालयले राष्ट्रिय एड्स तथा यौन रोग नियन्त्रण केन्द्रका प्रमुख डा. रमेश खरेललाई विभागको आपूर्ति व्यावस्थापन महाशाखाको निर्देशकमा सरुवा गरेको छ ।

मन्त्रालयले परोपकार प्रसूति गृह थापाथलीका निर्देशक डा. जागेश्वर गौतमलाई समेत मन्त्रालयमा तानेको छ । प्रसूति गृहको निर्देशकको जिम्मेवारी डा. संगीता कौशललाई दिइएको जानकारी मन्त्रालयले दिएको छ ।

प्रकाशित : जेष्ठ २२, २०७७ १६:०२
प्रतिक्रिया
पठाउनुहोस्

बारामा संक्रमित ६ प्रहरीसहित १० जना डिस्चार्ज

लक्ष्मी साह

बारा — बारामा संक्रमित ६ प्रहरीसहित १० जना बिहीबार घर फर्केका छन् । कलैया अस्पतालबाट ७ र वीरगन्जको गण्डक कोभिड–१९ अस्पतालबाट ३ डिस्चार्ज भएका हुन् ।

जिल्ला प्रहरी कार्यालयमा कार्यरत प्रहरी निरीक्षक, नायव निरीक्षकसहित ६ प्रहरी र जिल्लाकै एक जना रेडियोकर्मी डिस्चार्ज भएको जिल्ला प्रहरी कार्यालयका प्रवक्ता प्रहरी नायव उपरीक्षक गौतम मिश्रले बताए । यीबाहेक नेपाली सेनाका २ जवान र एक संक्रमित बालक उपचारपछि निको भएर घर फर्केका हुन् । पचरौता नगरपालिकाको पिपरपाती क्‍वारेन्टाइनबाट सेनाका जवान संक्रमित भई वीरगन्ज उपचाररत थिए । बालक भने वीरगन्जबाट संक्रमित भएका थिए ।

यसअघि जीतपुरसिमरा उपमहानगरका २ जना वीरगन्जबाट डिस्चार्ज भएका थिए । जिल्लामा ७० संक्रमितमध्ये पटकपटक गरेर १२ जना कोरानामुक्त भएका हुन् । अरु उपचारकै क्रममा छन् ।

प्रकाशित : जेष्ठ २२, २०७७ १५:५२
पूरा पढ्नुहोस्
प्रतिक्रिया
पठाउनुहोस्
×