'कोरोना रोकथाम तथा नियन्त्रणमा १० अर्ब खर्च'

उच्चस्तरीय समितिले लकडाउन खुकुलो पार्ने मस्यौदा सरकारलाई बुझाउने 
कान्तिपुर संवाददाता

काठमाडौँ — कोरोना महामारी रोकथाम तथा नियन्त्रणमा अहिलेसम्म सरकारले करिब १० अर्ब रुपैयाँ खर्च भएको प्रधानमन्त्री तथा मन्त्रिपरिषद् कार्यालयका सचिव नारायण बिडारीले बताएका छन् । कोरोना नियन्त्रणका लागि उपचार, क्वारेन्टाइन निर्माण र राहत वितरणमा सरकारले ९ अर्ब ८७ करोड रुपैयाँ खर्च गरेको बिडारीले बताएका छन् ।

बुधबार बसेको कोरोना रोकथाम तथा नियन्त्रण उच्चस्तरिय समन्वय समिति बैठकमा खर्चको विवरण सार्वजनिक गरिएको हो ।

सचिव बिडारीका अनुसार कोरोना महामारी नियन्त्रण कोष, सरकारबाट विनियोजित रकम र प्रदेश तथा स्थानीय सरकारले गरी ९ अर्ब ८७ करोड रुपैयाँ खर्च गरेका हुन् । स्थानीय तहबाट भएको खर्चको पूर्ण विवरण आइनसकेको उनले बताए । कोरोना कोष र संघीय सरकारबाट ६ अर्ब ३ करोड, प्रदेशहरुबाट १ अर्ब ८ करोड र स्थानीय तहहरुबाट २ अर्ब ७६ करोड रुपैयाँ खर्च भएको उनले बताए ।

समिति बैठकमा लकडाउनलाई सहज बनाउँदै कसरी लैजान सकिन्छ भन्ने विषयमा पनि छलफल भएको छ । लकडाउन खुकुलो बनाउनेबारे स्वास्थ्य क्षेत्रका विज्ञहरुसँग पनि समितिले छलफल गरेको छ । तहगत रुपमा लकडाउन खुकुलो पार्दै लैजाने गरी मस्यौदा तयारी गरी सरकारलाई बझुाउने समझदारी पनि बैठकमा बनेको छ ।

प्रकाशित : जेष्ठ २१, २०७७ २०:१४
प्रतिक्रिया
पठाउनुहोस्

सूर्यविनायकमा सय शय्याको क्‍वारेन्टाइन

कान्तिपुर संवाददाता

भक्तपुर — विदेशबाट आउने आफ्ना नागरिकलाई राख्न भक्तपुरको सूर्यविनायक नगरपालिकाले १ सय शय्याको क्वारेन्टाइन बनाएको छ ।

सूर्यविनायक–१० बाँसघारीस्थित स्थानीय रोमन शिलाकारले प्लाइउड गोदाम सञ्चालनका लागि बनाएको जस्ताको टहरालाई क्वारेन्टाइन बनाइएको हो । नगरपालिकाले विदेशबाट फर्किएकालाई दुई साता उक्त क्वारेन्टाइनमा राख्ने जनाएको छ ।

क्वारेन्टाइनमा दैनिक बिहान–बेलुका खाना, दिउँसो खाजाको व्यवस्था गरिनेछ । क्वारेन्टाइनमा सूर्यविनायक नगरको स्वास्थ्य शाखाका कर्मचारीको संयोजकत्वमा नेपाल रेडक्रस सोसाइटी जिल्ला शाखा भक्तपुर, प्रहरी, नेपाली सेनाको समन्वयमा हेल्थ डेक्सको व्यवस्था गर्ने योजनामा उल्लेख छ । क्वारेन्टाइन सुरक्षाका लागि महानगरीय प्रहरी वृत्त जगातीका प्रहरी कर्मचारी खटिने र सफाइ कर्मचारीसमेत रहने नगरपालिकाले जनाएको छ ।

क्वारेन्टाइन निर्माणमा महानगरीय प्रहरी वृत्त जगाती र वीर दल गण सूर्यविनायकका कर्मचारी खटिएका छन् । क्वारेन्टाइन व्यवस्थापनका लागि नगरपालिकाले १० लाख रुपैयाँ छुट्याएको सूर्यविनायक–८ वडाका वडाध्यक्ष एवं सामाजिक विकास समिति संयोजक किरण थापाले बताए ।

उनका अनुसार नगरपालिकाले तीन खण्डमा विभाजित गरी क्वारेन्टाइनको व्यवस्था गरेको छ । ‘यदि सुविधायुक्त स्थानमा क्वारेन्टाइनमा बस्न चाहनेहरुका लागि होटलहरुमा स–शुल्क बस्ने व्यवस्था छ,’ उनले भने, ‘विदेशबाट फर्किएर ‘होम क्वारेन्टाइन’ मा बस्न चाहनेका लागि नगरपालिकाको निगरानीमा घरमै राख्छौं ।’

जिल्लाका मध्यपुर थिमि, भक्तपुर र चाँगुनारायण नगरपालिकाले भने विदेशबाट फर्किने आफ्ना नागरिकको लागि क्वारेन्टाइन निर्माण गरेको छैन । ‘नगरपालिकाले आफैं क्वारेन्टाइनको व्यवस्था गर्न सक्दैन,’ भक्तपुर नगरप्रमुख सुनिल प्रजापतीले भने,‘ विदेशबाट फर्किने नागरिकले आ–आफ्नै खर्चमा होटलमा क्वारेन्टाइन बस्नुपर्छ, होटल एसोसिएसनसँग छलफल भइरहेको छ ।’

मध्यपुर थिमि नगरपालिकाले विदेशबाट फर्किन चाहने नागरिकको तीनपुस्ते विवरण संकलन थालेको जनाएको छ । ‘वडास्तरबाट विवरण संकलन सुरु भएको छ,’ नगरप्रमुख मदनसुन्दर श्रेष्ठले भने, ‘नगरक्षेत्रको स्थायी बासिन्दालाई नगरपालिकाको निगरानीमा होम क्वारेन्टाइन राख्ने योजना छ ।’ नगरभित्र भाडामा बस्ने नागरिकलाई भने कुनै सुविधा नदिने उनले बताए । सूर्यविनायक नगरपालिकाले भारतबाट आएका ७ जनालाई क्वारेन्टाइनमा राखेको छ ।

प्रदेश १ र २ का नागरिकलाई भक्तपुरमा राखिने

सरकारले विदेशबाट आएका प्रदेश नम्बर १ र २ का नागरिकलाई भक्तपुरको सल्लाघारी र राधेराधेमा राख्ने तयारी गरेको छ । वाग्मती, गण्डकी र ५ का नागरिकलाई काठमाडौं र कर्णाली तथा सुदूरपश्चिम प्रदेशका नागरिकलाई ललितपुरको सेल्टरमा होल्डिङमा राखेर मात्रै प्रदेशको समन्वमा सम्बन्धित जिल्लामा पठाउने तयारी गरिएको छ ।

विदेशबाट फर्कनेको समन्वय गर्न सरकारले प्रदेश १ मा भौतिक पूर्वाधारमन्त्री वसन्त नेम्वाङ र प्रदेश २ मा श्रम रोजगार तथा सामाजिक सुरक्षा मन्त्री रामेश्वर राय यादव संयोजकको जिम्मेवारी तोकेको छ ।

प्रकाशित : जेष्ठ २१, २०७७ २०:१२
पूरा पढ्नुहोस्
प्रतिक्रिया
पठाउनुहोस्
×