मृत्युपछि कोरोना पुष्टि भएका वृद्धको गाउँ सिल, आफन्त भन्छन्- 'अस्पतालको लापर्बाही'

मृतकका छोराका अनुसार चिकित्सकले कोरोना जाँचको विषयमा केही भनेका थिएनन् । स्वाब लिए/नलिएको बारे पनि जानकारी गराइएको थिएन ।
लक्ष्मी साह

बारा — दाहसंस्कार गरिसकिएका ७० वर्षीय वृद्धमा कोरोना संक्रमण पुष्टि भएपछि प्रहरीले बाराको करैयामाई गाउँपालिका–७ उम्जन गाउँ सोमबार सिल गरेको छ । नेसनल मेडिकल कलेज वीरगन्जमा जेठ २ गते उपचारका लागि भर्ना गरिएकै दिन वृद्धको स्वाब परीक्षणका लागि लगिएको थियो ।

आईसीयूमा उपचाररत उनको जेठ ४ गते मृत्यु भयो । त्यही दिन अस्पतालले मृतकलाई परिवारको जिम्मा लगाएपछि एम्बुलेन्सबाट लगेर दाहसंस्कार गरिएको थियो ।

दाहसंस्कारमा ७० भन्दा बढी मानिस सहभागी थिए । मृत्युअघि नै निकालिएको स्वाबको रिपोर्ट भने सोमबार (आज) आएको जिल्ला प्रहरी कार्यालयका प्रवक्ता डीएसपी गौतम मिश्रले बताए । उनका अनुसार मृतकको कोरोना रिपोर्ट पोजिटिभ आएको छ । 'रिपोर्टअघि नै दाहसंस्कार गरिएको रहेछ,’ उनले भने, 'त्यसैले मृतकको गाउँ वरिपरि तारबार गरी सिल गरेका हौं ।’

गाउँ नजिकैको खोला गरिएको दाहसंस्कारमा सहभागी मलामी, मृतकका परिवार लगायतका गाउँलेलाई घरमै बस्न निर्देशन दिइएको उनले बताए । प्रहरीले कसैलाई बाहिर आउजाउ गर्न दिएको छैन । उनका अनुसार मृतकको सम्पर्कमा रहेकाहरुको ‘कन्ट्याक्ट ट्रेसिङ’ भइरहेको छ ।

ज्वरोले सिकिस्त भएपछि परिवारले उनलाई कोल्हवी बजारबाट एम्बुलेन्समार्फत जेठ २ गते नेसनल मेडिकल कलेज लगेका थिए । ‘चिकित्सकले कोरोना जाँचको विषयमा केही भनेनन्,’ मृतकका छोराले भने, ‘अस्पतालले दाहिने ‘लङ्ग्स डिस्ट्रोए’ (फोक्सोमा खराबी) भएर निमोनिया भएको भन्दै उपचार गर्न थाले, उपचारकै क्रममा बुवाको मृत्यु भएपछि हामीलाई जिम्म्मा लगाए ।’

स्वाब लिए/नलिएको पनि आफूहरुलाई जानकारी नदिइएको छोराको भनाइ छ । अस्पतालको लापरबाहीले परिवारले दुःख भोग्नु परिरहेको उनले बताए । ‘बुवा गाउँकै स्वास्थ्यचौकीबाट धेरै वर्षपहिले रिटायर्ड स्वास्थ्यकर्मी हुनुहुन्थ्यो, अहिले पनि हट्टाकट्टा नै हुनुहुन्थ्यो,’ उनले भने, ‘घरको भर्‍याङबाट लड्दा घुँडामा चोट लाग्यो, त्यसपछि ज्वरो र खोकी आएको थियो ।'

सम्बन्धित समाचार

८ दिनअघि मृत्यु भएका बाराका एक व्यक्तिमा कोरोना पोजिटिभ

प्रकाशित : जेष्ठ १२, २०७७ १५:२४
प्रतिक्रिया
पठाउनुहोस्

दैलेखमा क्वारेन्टाइन भद्रगोल, एउटै कोठामा २५ जनासम्म

तीन दिनमा ४ हजार ५ सय नागरिक जिल्ला भित्रिए 
ज्योति कटुवाल

दैलेख — ठूलो सास्ती खेपेर भारतबाट आफ्नो जिल्ला आइपुगेका दैलेखका नागरिकले क्वारेन्टाइनमा पनि उस्तै दुःख पाएका छन् । क्वारेन्टाइनको व्यवस्थापन भद्रोगल हुँदा एउटै कोठामा २५ जनासम्म कोच्चिएर बसेका छन् । जसकारण उनीहरुलाई नै संक्रमणको जोखिम बढेको छ । 

यहाँका स्थानीय तहले एउटै कोठामा २५ जनासम्मलाई कोचाकोच गरी राखेका छन् । नारायण नगरपालिका–६ का श्याम रानाले क्यारेन्टाइनको बसाइ भद्रगोल हुँदा संक्रमणको जोखिम बढ्दै गएको गुनासो गरे । उनी बसिरहेको नारायण क्याम्पसमा १ सयजनाका लागि बेड निर्माण गरिए पनि २ सय ५० जनाभन्दा बढीलाई कोचाकोच गरी राखिएको छ । ‘क्वारेन्टाइनभित्र पनि विभेद गरिएको छ,’ उनले भने, ‘कोहीलाई आरादायी बेडमा राखिएको छ, हामी भने डेक्स र बेन्च जोडेर सुत्दै आएका छौं ।’ कति क्याम्पसको कोलिया र छतमा सुत्नसमेत बाध्य भएको उनले बताए ।

स्थानीयका अनुसार उक्त क्याम्पसमा न सुत्ने व्यवस्था राम्रो छ न खाना र शौचालयकै सुविधा गतिलो । एउटै कोठामा २० देखि २५ जनालाई सुताइँदा अन्य स्वास्थ्य समस्या संक्रमणको जोखिमसमेत बढेको स्थानीय विपिन रावलले बताए । ‘खाने र सुत्ने व्यवस्था कस्तो छ भनेर जनप्रतिनिधि सोध्नसमेत आएनन्,’ उनले भने, ‘दाल र भात पनि राम्रोसँग पाकेको हुँदैन ।’ उनले भुइँमा सुत्नुपर्ने बाध्यता रहेको सुनाए ।

नारायण नगरपालिकाका विभिन्न ठाउँमा ३ सय ४४ बेड निर्माण गरिएको छ । जिल्ला प्रशासन कार्यालयका अनुसार ११ स्थानीय तहमा ९ सय ६५ क्वारेन्टाइ निर्माण गरिएकोमा १ हजार ९ सय ९२ जनालाई राखिएको छ । त्यसमध्ये ४ सय ८६ जनाको मात्र स्वाब संकलन गरिएको छ । यसअघि १ हजार २ सय ५१ जनाको आरडीटी परीक्षण गरिएको थियो ।


दैलेख र सुर्खेतको सिमानामा स्थापना गरिएको हेल्थ डेस्कमा भारतबाट फर्किएकाको चेकजाँच गरिँदै ।

अधिकांश ठाउँमा क्याम्पस र विद्यालयलाई क्वारेन्टाइन बनाइएपछि व्यवस्थापन भद्रगोल बनेको हो । ‘हामीलाई भेडाबाख्रा जसरी कोचिएर राखिएको छ,’ सदरमुकामको क्वारेन्टाइनमा बसेका एक स्थानीयले भने, ‘बरु घरमा सुरक्षित होला, हामी सुरक्षित छैनौं ।’ भारतबाट आउनेको सख्या बढ्दै गएपछि व्यवस्थापन गर्न समस्या भएको जनप्रतिनिधिको भनाइ छ । नारायण नगरपालिका–१, का वडाध्यक्ष तीर्थनारायण श्रेष्ठले बाहिरबाट आउनेको संख्या बढ्दै गएपछि क्वारेन्टाइनमा राख्न समस्या भएको बताए ।

पहिलो चरणमा भारतबाट आएकाको व्यवस्थापन राम्रै भए पनि अहिले क्वारेन्टाइनमा राख्न समस्या भएको दुल्लु नगरपालिका प्रमुख घनश्याम भन्डारी बताउँछन् । उनका अनुसार नगरपालिकाबाट झण्डै १० हजार व्यक्ति मजदुरीका लागि भारत गएका छन् । ‘भारत गएका आधा मात्र फर्किए पनि व्यवस्थापन गर्न समस्या हुन्छ,’ उनले भने, ‘सतर्कता अपनाउँदै क्वारेन्टाइनको बसाइ व्यवस्थापन गर्न प्रयास गरिरहेका छौं ।’ उनले २ हजार थान किट खरिद गरी क्वारेन्टाइनमा बसेकाको स्वाब संकलन सुरु गरिएको जनाए ।

किट अभावले स्वाब संकलनमा समस्या

भारतमा रेलसेवा सुचारु भएपछि जिल्ला फर्कनेको संख्या बढे पनि किट र भीटीएमको अभाव हुँदा स्वाब संकलनमा समस्या भएको छ । दैनिक झण्डै १ हजार बासिन्दा दैलेख भित्रिएपछि स्वास्थ्य उपकरणको अभाव देखिएको हो ।

स्वास्थ्य सेवा कार्यालयमा तत्काल ५० आरडीटी र भीटीएम मात्र मौज्दात छ । कम्तिमा १०/१० हजार किट र भीटीएम आवश्यक परेको कार्यालयका खोप अधिकृत थीरप्रसाद रेग्मीले बताए । उनका अनुसार भारतबाट करिब २५ हजार नागरिक जिल्लामा आउने सरकारी अनुमान छ ।

प्रकाशित : जेष्ठ १२, २०७७ १५:०७
पूरा पढ्नुहोस्
प्रतिक्रिया
पठाउनुहोस्
×