विभिन्न कर बुझाउने म्याद थप

कान्तिपुर संवाददाता

काठमाडौँ — मूल्य अभिवृद्धि कर, आयकर तथा अग्रिम कर बुझाउनुपर्ने म्याद आइतबार बसेको मन्त्रिपरिषद् बैठकले बढाएको छ । बैठकले विभिन्न कर भुक्तानी गर्नुपर्ने म्याद वैशाख २५ गतेसम्मलाई बढाएको सरकारका प्रवक्ता तथा अर्थमन्त्री युवराज खतिवडाले जानकारी दिएका छन् ।

उनले स्वास्थ्य सामाग्री आपूर्तिमा समेत मन्त्रिपरिषदले छुटको व्यवस्था गरेको बताएका छन् । यस्तै लकडाउन अवधीको घरबहाल नलिन तथा सो अवधी घरबहाल करमा समेत छुटको व्यवस्था गरेको बताएका छन् ।

सरकारले शहरी क्षेत्रमा रहेका असंगठित श्रमिकहरुले बुझाउनुपर्ने एक महिनाको घरभाडा मिनाहा गर्न आग्रह गरेको छ । आइतवार बसेको मन्त्रिपरिषद् बैठकले असंगठिक श्रमिकले बुझाउने एक महिनाको घरभाडा मिनाहा गर्न सम्बन्धित धरधनिलाई आग्रह गर्ने निर्णय गरेको मन्त्री खतिवडाले जानकारी दिए ।मिनाहा गरिको घरभाडामा घरबाहाल कर नलिने निर्णय गरेको पनि उनले बताए ।

अर्थमन्त्रीले मदिरा लगायतका विभिन्न वस्तुको आपूर्तिमा समेत सरकारले रोक लगाएको जानकारी दिएका छन् ।

प्रकाशित : चैत्र १६, २०७६ २१:४२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

लकडाउनमा तस्कर सक्रिय, निकुञ्ज, आरक्षमा बढाइयो गस्ती

शुक्रबार पर्सा निकुञ्जमा हतियारधारी तस्कर समूह भेटिएपछि अन्य निकुञ्ज र आरक्षहरुमा पनि निगरानी बढाइएको हो 
अब्दुल्लाह मियाँ

काठमाडौँ — लकडाउनको मौका छोपेर निकुञ्ज तथा आरक्षहरुमा तस्कर सक्रिय भएका छन् । सिकारका लागि शुक्रबार पर्सा निकुञ्जमा हतियारधारी तस्कर समूह भेटिएपछि मुलुकभरका निकुञ्ज र आरक्षमा निगरानी बढाइएको छ । राष्ट्रिय निकुञ्ज तथा वन्यजन्तु संरक्षण विभागका महानिर्देशक गोपालप्रकाश भट्टराईले संभावित घटनालाई मध्यनजर गर्दै निगरानी बढाउन सबै निकुञ्ज र आरक्ष प्रमुखहरुलाई निर्देशन दिएका छन् । 

मुलुकभर १२ वटा निकुञ्ज, दुई वटा आरक्ष (ढोरपाटन सिकार आरक्षसहित) र ६ वटा संरक्षण क्षेत्र छन् । यी सबैले मुलुकको कुल भूभागको २३.३९ प्रतिशत ओगटेको छ ।

लकडाउनसंगै तराईदेखि हिमालसम्मैका निकुञ्ज र आरक्षहरुमा सेना र कर्मचारीको गस्ती बढाइएको छ । जरायो सिकारका लागि पर्सा निकुञ्जको महादेवखोला क्षेत्र पुगेका तस्करको समूह र निकुञ्जको सिद्धिबक्स गणका सेनाबीच शुक्रबार बिहान गोली हानाहान भएको थियो, त्यसक्रममा एक जना सिकारीको ज्यान गएको थियो भने सेनाका एक जमदार घाइते भएका थिए ।

निकुञ्जका सहायक संरक्षण अधिकृत अशोककुमार रामका अनुसार त्यो नै यो वर्षको पहिलो घटना हो ।
चालु आर्थिक वर्ष २०७६, ७७ मा निकुञ्जभित्र काठ काट्न छिरेका १४ जनालाई निकुञ्जले समातेर कारबाही अघि बढाएको छ भने १८ जन फरार छन् । लकडाउनको मौका छोपेर शुक्रवार ११ जनाको समूह महादेवखोला क्षेत्रमा भेटिएका थिए । तीमध्ये एक जनालाई मात्र निकुञ्जले पक्राउ गर्न सक्यो । एक जनाको ज्यान गएको थियो । ९ जना फरार छन् ।

बर्दिया निकुञ्जका प्रमुख संरक्षण अधिकृत (चीफ वार्डेन) अणनाथ बरालले लकडाउनमा तस्कर सलबलाउन सक्ने संभावनालाई मध्यनजर गर्दै निकुञ्जको संरक्षणार्थ तैनाथ शिवदल गणका सेना र कर्मचारीको गस्ती पहिलाभन्दा बढाइएको जानकारी दिए ।

निकुञ्जको टोलीले केही दिन अघि निकुञ्जको टाइगरटप्स होटल नजिकबाट काठसहित तस्करको समूहलाई समातेको थियो । उनीहरुमाथि निकुञ्जले अनुसन्धान गरिरहेको छ ।

बर्दियाको बबई क्षेत्र संवेदनशील मानिन्छ । उक्त क्षेत्रमा पनि गस्ती बढाइएको बरालले बताए । बबईमा चितवनबाट सारिएका केही गैंडा र बाघ छन् । संभावित चोरी सिकार हुने निकुञ्जको अन्य कोर क्षेत्रमा पनि सेना र निकुञ्ज टोलीको संयुक्त गस्ती तिब्र पारिएको छ । बर्दियामा पछिल्ला वर्षहरुमा बाघ हेर्न पर्यटक भित्रिने गरेका छन् । पछिल्लो गणना अनुसार बर्दियामा ८७ बयस्क बाघ छन् ।

चितवन निकुञ्जले पनि तस्करीको संभावनालाई ध्यान दिंदै सेना र कर्मचारीको संयुक्त गस्ती बढाएको छ । निकुञ्जका प्रमुख संरक्षण अधिकृत (चीफ वार्डेन) नारायणप्रसाद रुपाखेतीले निकुञ्जको संरक्षणार्थ खटिएको बटुक गण र कर्मचारीको संयुक्त गस्तीलाई पहिला भन्दा सक्रिय पारिएको बताए ।
आइतबार सेनाको टोलीसंग गस्तीमै रहेका रुपाखेतीले कान्तिपुरसित भने, ‘संभावित घटनालाई मध्यनजर गर्दै निकुञ्जको भित्रि भागसम्मै गस्ती र अनुगमन गरिरहेको छु ।’

चितवन निकुञ्जमा २०७३ को चैत २६ पछि सिकारीले गैंडा मारेका छैनन् । त्यसयता चोरी सिकारीबाट गैंडाको सिकार शून्य भइरहे पनि प्राकृतिक कारणले गैंडा मरिरहेका छन् । लकडाउनको मौका छोपेर निकुञ्जले वन्यजन्तुको चरन क्षेत्र र घांसे मैदान व्यस्थापनको काम गरिरहेको छ ।
पाटे बाघको बढोत्तरी भइरहेको बांके निकुञ्जमा पनि संभावित चोरी हुनसक्ने संभावनालाई ध्यान दिंदै निकुञ्जले गस्ती र अनुगमन प्रभावकारी बनाएको छ ।

निकुञ्जका प्रमुख संरक्षण अधिकृत प्रमोद भट्टराईले लकडाउनको मौकामा तस्कर नछिरुन भनेर अनुगमन र गस्ती जारी राखेका छन् । लकडाउनको अवसर पारेर निकुञ्जको गस्ती र अनुगमनमा प्रयोग हुने बाटो, सडक बनाउने काम चलिरहेको छ भट्टराई उल्लेख गर्छन्, शान्त भएर होला भित्रि भाग र हाइवेमै पनि वन्यजन्तु देखिएका छन् । यो निकुञ्जको धेरै भाग पूर्व पश्चिम राजमार्गको बांके क्षेत्रमा पर्छ ।

तराईमा मात्र होइन हिमाली क्षेत्रमा पनि हिमाली वन्यजन्तुहरु कस्तुरी र हिउँं चितुवालगायतका वन्यजन्तुको संभावित तस्करीलाई मध्यनजर गर्दै अनुगमन र गस्ती बढाइएको छ । हुनत सबै जसो हिमाली क्षेत्रमा पदयात्रा ठप्प छ । तैपनि यही अवसरमा चौका हान्ने संभावना भएकाले गस्ती बढाइएको सगरमाथा निकुञ्जका प्रमुख संरक्षण अधिकृत भूमिराज उपाध्यायले बताए ।

पर्यटकको सिजन भए पनि लकडाउनले सगरमाथा क्षेत्र सुनसान छ, नाम्चेबजारबाट उपाध्यायले भने, ‘कुनै गलत काम नहोस् भनेर यहांस्थित् शमशेर गुल्मका सेना र कर्मचारी सचेत छौ र गस्ती जारी छ ।’

केही वर्षअघिसम्म सगरमाथा क्षेत्रमा कस्तुरी मृगको अत्यधिक चोरी सिकार हुन्थ्यो । उपाध्यायले आर्थिक वर्ष २०७३, ७४ पछि चोरी सिकार घटेको बताए ।

सूदूरपश्चिममा पर्ने शुक्लाफांटा निकुञ्जमा पनि गस्ती विस्तार गरिएको छ । प्रमुख संरक्षण अधिकृत लक्ष्मणप्रसाद पौड्यालले लकडाउनको मौका छोपेर वन्यजन्तु र वनस्पतिको क्षती नहोस् भनेर निगरानी गरिरहेको बताए ।


प्रकाशित : चैत्र १६, २०७६ २१:४०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×