ललिता निवासको अनियमिततामा मुद्दा दायर गर्ने अख्तियारको निर्णय - समाचार - कान्तिपुर समाचार
कान्तिपुर वेबसाईट
AdvertisementAdvertisement

ललिता निवासको अनियमिततामा मुद्दा दायर गर्ने अख्तियारको निर्णय 

कृष्ण ज्ञवाली

काठमाडौँ — अख्तियार दुरुपयोग अनुसन्धान आयोगले ललिता निवास जग्गा अनियमितता प्रकरणमा संलग्नहरुमाथि भ्रष्टाचार मुद्दा दायर गर्ने निर्णय गरेको छ । प्रमुख आयुक्त नविन घिमिरेसहित आयुक्तद्वय डा. गणेशराज जोशी र सावित्री थापा गुरुङ सम्मिलित आयोग बैठकले मुद्दा दायर गर्ने निर्णय गरेको हो । 

निर्णयलगत्तै अख्तियारको टोली बुधबार नै मुद्दा दर्ता गर्न विशेष अदालत पुगेको छ । अख्तियार उच्च स्रोतले कान्तिपुरलाई उपलब्ध गराएको विवरण अनुसार तत्कालीन उपप्रधान एवं भौतिक योजना तथा निर्माणमन्त्री विजयकुमार गच्छदार, भूमिसुधारमन्त्री डम्बर श्रेष्ठ र उनी पछिका चन्द्रदेव जोशीविरुद्ध मुद्दा दायर गर्ने निर्णय गरेको हो ।


त्यसैगरी पूर्व सचिवहरु दीप बस्न्यात, छवीराज पन्त, दिनेशहरि अधिकारीमाथि पनि मुद्दा दायर गर्ने निर्णय भएको छ । बस्न्यात अख्तियारको आयुक्त हुँदै प्रमुख आयुक्त भइसकेका व्यक्ति हुन् । पन्त चुनावी सरकारमा मन्त्री थिए ।


भ्रष्टाचार आरोपको सूचीमा २२ रोपनी जग्गा ‘घुस’ लिएका पूर्वनिर्वाचन आयुक्त सुधीर शाह र उनकी पत्नी उर्मिला, गृहमन्त्रालयका पूर्वसहसचिव गेहनाथ भण्डारी र उनकी पत्नी भुवनकुमारी चापगाई अनि सासु सोदाकुमारी चापागाई समेत छन् ।


हाल चितवन जिल्ला अदालतमा कार्यरत न्यायाधीश विनोदकुमार गौतममाथि पनि भ्रष्टाचार मुद्दा दायर गर्ने निर्णय भएको छ । उनी २०६६ सालमा मन्त्रिपरिषदमा प्रस्ताव पठाउँदा गलत राय दिएको आरोपमा परेका हुन् ।


ललिता निवासको २ सय ९९ रोपनी जग्गा पञ्चायतकालीन सरकारले अधिग्रहण गरेको थियो । २०४९, ६२, ६७ र ६९ सालमा गरी चारपटक उक्त जग्गा अतिक्रमण भएको व्यक्तिको नाममा दर्ता भएको छ । गैरकानूनी रुपमा व्यक्तिको नाममा दर्ता गरिएको जग्गा करिब १ सय ४० रोपनीभन्दा बढी छ ।

प्रकाशित : माघ २२, २०७६ १६:२७
प्रतिक्रिया
पठाउनुहोस्

वुहानबाट ल्याइने नेपालीलाई नागार्जुनमा निषेध !

गोविन्द पोखरेल

काठमाडौँ — चीनको वुहानबाट उद्धार गरी ल्याइने नेपालीहरुलाई नागार्जुन नगरपालिकाले आफ्‍नो नगरपालिकाभित्र राख्‍न नदिने निर्णय गरेको छ । नगरपालिकाले स्वास्थ्य तथा जनसंख्या मन्‍त्रालयलाई पत्र लेख्‍दै चीनबाट उद्धार गरी ल्याइने नेपालीहरुलाई सहरी विकास मन्‍त्रालयको भवनहरुमा नराख्‍न अनुरोध गरेको छ । 

नगरपालिकाकी उपप्रमुख सुशिला अधिकारीद्वारा हस्ताक्षार गरिएको पत्रमा वडा नम्बर १ मा रहेको उक्त भवन घना बसोबास भएको क्षेत्रभित्र पर्ने भएकाले उनीहरुलाई त्यहाँ नराख्‍ने व्यवस्था मिलाइदिन भन्दै मन्‍त्रालयलाई पत्र लेखेकी हुन् । नगरपालिकाले लेखेको उक्त पत्रमा प्रधानमन्‍त्री तथा मन्‍त्रिपरिषद्को कार्यालयलाई बोधार्थ दिइएको छ ।

नगरपालिकाकी उपप्रमुख अधिकारीले भने सञ्चारमाध्यमहरुमा वडा नम्बर १ मा रहेको भवन तथा सहरी विकास मन्‍त्रालयको भवनमा उद्धार गरिएकाहरुलाई राख्‍ने सम्भावित ठाउँ भनेर लेखेपछि उक्त स्थान उपयुक्त नभएकाले मन्‍त्रालयलाई पत्र लेखेको बताइन् । उनले उक्त भवन पुरानो,जीर्ण,सरसफाई नगरिकएको र घना वस्तीको नजिक भएकाले उपयुक्त नभएको बताइन् ।

उनले भनिन्,'यो ठाउँ उपयुक्त छैन । मिडियाहरुमा समाचार आएपछि जनता वडा र नगर कार्यपालिकाको कार्यालयमा आएर राख्‍न दिनु हुँदैन भन्दै हामीलाई दबाब दिए । नगरपालिकाले आफ्‍नो नगरका जनताको कुरा सुन्‍ने भएकाले उनीहरुको माग बमोजिम पत्र लेखिएको हो । '

उपप्रमुख अधिकारीले नगरपालिकाले जनताको आवाज बोलेको प्रतिक्रिया दिइन् । उनले जीर्ण भवनमा रोगी राख्‍ने ठाउँ पनि नभएको बताइन् ।

कोरोना भाइरसको संक्रमण फैलिएको चीनको हुबेइ प्रान्तमा रहेका नेपाली विद्यार्थीलाई नेपाल फर्काउने तयारी सरकारले गरेको छ । त्यहाँ रहेका १ सय ८० विद्यार्थीलाई नेपाल फर्काइँदैछ । स्वदेश फर्काएपछि उनीहरुलाई १४ दिन क्वारेन्टाइनमा राखिने तयारी सरकरको छ ।

चीनबाट फर्किने नेपालीहरुलाई भक्तपुरको खरिपाटीस्थित नेपाल विद्युत प्राधिकरणको तालिम केन्द्रमा राख्‍ने तयारी सरकारले गरेको छ । मंगलबार सिंहदरबारस्थित प्रधानमन्त्री तथा मन्त्रिपरिषद्को कार्यलयमा बसेको सुरक्षा निकायका प्रमुखहरु सहभागी बैठकले खरिपाटीलाई सम्भावित स्थलका रुपमा छनोट गरेको थियो । सो बैठकले तालिम केन्द्रको पूर्वाधार र अन्य वस्तुस्थितिबारे निरीक्षण गरेर अन्तिम टुंगो लगाउने पनि निर्णय गरेको थियो ।

उक्त निर्णयको विरोधमा नेपाली कांग्रेस क्षेत्र नम्बर-१, भक्तपुर क्षेत्रीय कार्यसमितिले बैठक नै राखेर नोवल कोरोना भाइरसको केन्द्रबाट उद्धार गरी ल्याइएका नेपालीलाई बोडेस्थित कृषि तालिम केन्द्र वा खरिपाटीस्थित नेपाल विद्युत प्राधिकरणको तालिम केन्द्रमा नराख्‍न चेतावनी दिएको छ।

प्रकाशित : माघ २२, २०७६ १६:०८
पूरा पढ्नुहोस्
प्रतिक्रिया
पठाउनुहोस्
×