राजविराज — सप्तरीमा तीन साताभित्र निर्माण हुने भनिएको अक्सिजन प्लान्ट तीन महिना बित्दा पनि बन्न सकेको छैन । आवश्यक मेसिन नआउँदा प्लान्ट निर्माण अघि बढ्न नसकेको हो । गत जेठमा कोरोनाको दोस्रो लहर उच्च हुँदा जिल्लामा अक्सिजनको हाहाकार भएको थियो । 

राजविराजस्थित गजेन्द्रनारायण सिंह अस्पतालमा अक्सिजन सिलिन्डर रित्तिँदै गएपछि र इटहरीलगायतका स्थानमा सिलिन्डर भर्न नमानेपछि जिल्लामा प्लान्ट सञ्चालन गर्ने निर्णय भएको थियो । गजेन्द्रनारायणमा टेन्डरसम्बन्धी प्रक्रियागत समस्याका कारण तत्काल प्लान्ट बन्न सक्ने स्थिति थिएन । त्यसपछि यहाँकै निजी अस्पताल छिन्नमस्ता अस्पतालमा प्लान्ट बनाउने निर्णय जिल्ला संकट व्यवस्थापन केन्द्रको बैठकले गरेको थियो ।

छिन्नमस्ता अस्पतालले अक्सिजन प्लान्ट बनाउन तयार भए पनि पैसा अभाव भएको बताएको थियो । जिल्लाका १८ वटै स्थानीय तहले संयुक्त कोष स्थापना गरी हरेक नगरपालिकाले ४ लाखका दरले र गाउँपालिकाले ३ लाखका दरले रकम दिने निर्णय गरिएको थियो । कोषको रकमबाट पछि सोधभर्ना हुने गरी छिन्नमस्तामा प्लान्ट बनाउन जेठमै २० लाख रुपैयाँ पनि दिइयो । तर, कोरोनाको तेस्रो लहर आउन सक्ने चर्चा भइरहँदा पनि आवश्यक पूर्वाधार मानिने प्लान्ट तयार हुन सकेको छैन ।