जेठानको माइलो छोरा भतिज जिप्पन बेपत्ता भएको खबर पाउँदा साह्रै दु:खी भएको बारबर्दिया नगरपालिका–१० का वडा सदस्य प्रेमप्रसाद चौधरीले बताए । ‘खबर आउने बित्तिकै बुहारी अनिता विक्षिप्त भएकी छन्,’ उनले भने, ‘भतिज विगत ४, ५ वर्षदेखि नै हाईड्रोपावरमा काम गर्थ्यो, बीचबीचमा छुट्टी लिएर घर आउँथ्यो, घर बनाएर गत जेठमा पुनः काममा फर्किएको थियो ।’

अति विपन्न परिवार भएकोले मेहनत मजदुरी गरेर गुजारा चलाइरहेका थिए । बेपत्ता जिप्पनका ११ वर्षीया छोरी कक्षा ६ मा अध्ययनरत छिन् । तीन दाजुभाइमध्ये जिप्पन माइला छोरा हुन् । दाजुभाइ घर अलग अलग बस्थे । 

बारबर्दिया नगरपालिकाका नगर प्रमुख छविलाल थारुले यस घटनाले नगरभर नै चिन्ता बढाएको बताए । ‘बेपत्ता परिवारका आफन्तहरु बेहाल बनेका छन्, आफन्तलाई सम्झाउन वडा अध्यक्षलाई लगाएको छु,’ नगर प्रमुख थारुले भने, ‘बेपत्ताहरुको अवस्थाको बारेमा सीडिओ सा'पमार्फत निरन्तर जानकारी लिइरहेको छु ।’

कमाउन गएको कान्छो छोरा बेपत्ता भएको खबर पाउँदा होस् नै गुमेको बढैयाताल गाउँपालिका–६ का महादेव चौधरीले बताए । खबरले हिजोदेखि परिवारमा सन्नाटा छाएको उनले बताए । विगत ५ वर्षदेखि उक्त हाईड्रोपावर कम्पनीमा छोराले ज्याला मजदुरी गर्थे । ‘छुट्टिमा आएको छोरा गत जेठमा काममा फर्केको थियो । छोराले गत वर्ष चार कोठे घर बनाउँदा ऋण लागेको थियो । ऋण तिर्न यसपालि मात्र कमाउन जान्छु बुबा ऋण तिरेपछि घरै बस्छु छोरा भनेको थियो,' उनले भने, 'उसको ६ वर्षको एउटा मात्र छोरा छ । अझैसम्म उताबाट केही खबर नआएको ।’