ताप्लेजुङको घुन्सामा मतदान अन्तिम चरणमा

घुन्सामा मतदाताको कुल संख्या १६६ मात्रै छ । मतदान अधिकृत गंगाबहादुर इङनामले ११ बजेपछि मतदान सुरु भएको, र अहिलेसम्म ७० जना मतदान गरिसकेको जानकारी दिए ।

‘विहान मतदाता नै आएनन् । तर, ११ बजेपछि फटाफट मतदाता आए, अहिले ७० मत खसिसकेको छ,’ उनले कान्तिपुरसँग भने । उनका अनुसार अहिलेसम्म ३६ पुरुष र ३४ जना महिलाले मतदान गरेका छन् । बाहिर बस्ने मतदाता नआएको र गोठमा गएकाहरु समेत नफर्किएकाले करिब एक सय मत खस्ने अनुमान छ ।

मतदाताको संख्याका आधारमा एक घण्टामै मतदान अन्तिम चरणको पुगेको मतदान अधिकृत इङनामले बताए । घुन्सा पुग्न गाउँपालिकाको केन्द्र तापेथोकदेखि मात्रै पनि डेढ दिन लाग्छ । यहाँको मतपत्र हेलिकप्टरबाट ल्याउने तयारी छ ।