पूर्वप्रधानमन्त्री भट्टराईले देखाए मत संकेत, हुनसक्छ जरिवाना- स्थानीय तह निर्वाचन २०७९ - कान्तिपुर समाचार

पूर्वप्रधानमन्त्री भट्टराईले देखाए मत संकेत, हुनसक्छ जरिवाना

कान्तिपुर संवाददाता

काठमाडौँ — पूर्वप्रधानमन्त्री तथा जनता समाजवादी पार्टीका संघीय परिषद् अध्यक्ष बाबुराम भट्टराईले मत संकेत सार्वजनिक गरेका छन् । शुक्रबार बिहान साढे ८ बजे गोरखाको पालुङटार नगरपालिका १ खोप्लाङस्थित अन्नपूर्ण माध्यमिक विद्यालय मतदान केन्द्रबाट उनले मतदान गरेका हुन् ।

भट्टराईले मतदान गरेको तस्बिर सामाजिक सञ्जाल फेसबुक र ट्विटरमार्फत सार्वजनिक गरेका छन् । उनले सार्वजनिक गरेको तस्बिरमा मत संकेत प्रस्ट देखिएको छ । उनले मतदानपछि सामाजिक सञ्जालमा लेखेका छन्, ‘गोरखा पानपास्थित अन्नपूर्ण माविको बुथमा बिहान ८:२५ बजे मतदान गरेर लोकतान्त्रिक अधिकार र कर्तव्य निर्वाह गरियो । सबैले मतदान गरौँ, स्थानीय लोकतन्त्र सुदृढ गरौँ ।’

मत संकेत सार्वजनिक गर्न नहुने कानुनी व्यवस्था रहेको छ । निर्वाचन (कसुर तथा सजाय) ऐन २०७३ को दफा ९ मा मत संकेत सार्वजनिक गर्न नहुने व्यवस्था छ । त्यसो गरिएमा मतदान अधिकृतले जरिवाना गर्न सक्ने व्यवस्था रहेको छ ।

'कसैले पनि मतपत्रमा मत संकेत गरिसकेपछि त्यस्तो मतपत्र कसैलाई देखाउन, प्रदर्शन गर्न, गोप्य मत संकेत स्थलमा मत संकेत नगरी त्यसभन्दा बाहिर गई मत संकेत गर्न वा मत संकेत गरेको व्यहोरा कुनै प्रकारले सार्वजनिक गर्न हुँदैन,' ऐनमा व्यवस्था गरिएको छ । त्यसो गरिएको अवस्थामा के भन्नेबारे उल्लेख छ, 'उपदफा (१)विपरीतको कार्य गर्ने व्यक्तिलाई मतदान अधिकृतले १५ हजार रुपैयाँसम्म जरिवाना गर्न सक्छ ।'

भट्टराईले मेयरमा जनता समाजवादी पार्टीको चुनाव चिह्न छातामा मत संकेत गरेको प्रष्ट देखिएको छ । त्यस्तै, उपमेयरमा स्वस्तिक छाप लगाएको देखिएको छैन भने बाँकी पदमा पनि जसपाका उम्मेदवारलाई नै मतदान गरेको देखिएको छ ।

प्रकाशित : वैशाख ३०, २०७९ ०९:५८
प्रतिक्रिया
पठाउनुहोस्

बारामा एमाले र जसपाका कार्यकर्ताबीच झडप

कान्तिपुर संवाददाता

काठमाडौँ — बाराको पचरौता नगरपालिका २ मा नेकपा एमाले र जनता समाजवादीका कार्यकर्ताहरूबीच झडप हुँदा मतदान रोकिएको छ ।

सशस्त्र प्रहरीका एक सुरक्षा अधिकारीका अनुसार प्रहरीले झडप रोक्न आधा दर्जन अश्रुग्यास प्रहार गरेको थियो। घटनास्थलमा अहिले मुख्य निर्वाचन अधिकृत खिलानाथ रेग्मीसहित ठूलो संख्यामा सुरक्षाकर्मीहरू घटनास्थल पुगेका छन् ।

उक्त स्थानमा दुवै पक्षका केही घाइते भएको बुझिएको छ । साथै केही मतपत्र पनि च्यातिएको स्थानीयहरूले बताएका छन् ।

यसैबीच बिहानैदेखि देवताल गाउँपालिका ७ पिपरपातीमा पनि कांग्रेस र लोसपाका कार्यकर्ताबीच झडप हुँदा मतदान रोकिएको थियो । तर पिपरपातीमा अहिले मतदान सुरू भइसकेको छ । पिपरपातीमा झन्डै साढे २ घण्टा मतदान रोकिएको थियो ।

सदरमुकाम कलैयाबाट प्रमुख जिल्ला अधिकारीसहित गएको सुरक्षा प्रमुखहरूको टोलीले दुवै समूहबीच सहजीकरण गराएपछि मतदान सुरू भएको हो ।

यस्तै पचरौता गाउँपालिका वडा नं ४ स्थित बेलडारी मतदान केन्द्रमा जसपाका कार्यकर्ताले नक्कली मत खसाउन लागेपछि विवाद उत्पन्न भएको छ । जहाँ अहिले मतदान रोकिएको छ । यससँगै पचरौताका वडा २ का दुई वटा मतदान केन्द्र र वडा ४ को एउटा मतदान केन्द्रमा गरी दुई मतदान केन्द्रमा मतदान रोकिएको छ ।

प्रकाशित : वैशाख ३०, २०७९ ०९:५६
पूरा पढ्नुहोस्
प्रतिक्रिया
पठाउनुहोस्
x
×