रुकुम पश्चिम — रुकुम पश्चिममा कांग्रेस र माओवादी कार्यकताबीच पुन: झडप भएको छ । झडपले नकारात्मक सन्देश गएको र मैत्रीपूर्ण प्रतिस्पर्धा गर्ने भन्दै संयुक्त अपिल जारी भएको २४ घण्टा नबित्दै दुई पार्टीबीच पुन: झडप भएको हो । सोमबार फेरि आठबीसकोट नगरपालिका वडा नम्बर १०, मा कांग्रेस र माओवादी कार्यकर्ताबीच झडप भएको हो ।

झडपका क्रममा माओवादी कार्यकर्ताले कांग्रेस कार्यकर्ताले प्रचारप्रसारमा प्रयोग गरिरहेको एउटा मोटरसाइकल जलाइदिएका छन् । २ वटा मोटरसाइकल तोडफोड भएको र एउटा गाडीमा क्षति पुगेको प्रहरीले जनाएको छ । जिल्ला प्रहरी प्रमुख डीएसपी विष्णुप्रसाद सोतीले झडपको क्रममा मान्छे भागभाग हुँदा सवारी साधनमा तोडफोड भएको बताए ।

लु १ ज २६६१ नम्बरको जिप, भे ७ प ३०६५ र भे ८ प ३६२० नम्बरको मोटरसाइकल तोडफोड भएको बताए । जलाइएको मोटरसाइकलको नम्बर भने खुलेको छैन । झडपपछि सवारी साधनमा क्षति पुगे पनि मान्छेलाई भने केही नभएको प्रहरीले जनाएको छ ।

प्रचारप्रसारमा गएका आफ्ना कार्यकर्तामाथि माओवादीले आक्रमण गरेको कांग्रसको आरोप छ । त्यसको विरोधमा कांग्रेस कार्यकर्ताले ९ नम्बर वडास्थित आठबीसकोट नगरपालिकाको कार्यालय तोडफोडको प्रयास गरेको प्रहरीले जनाएको छ । कार्यालय घेराउ गरिरहेकै समयमा प्रहरीले तितरबितर बनाएको र अहिले अवस्था सामान्य रहेको डीएसपी सोतीले बताए ।