भैरहवा — नेपाली कांग्रेसले सिद्धार्थनगर नगरपालिकाको मेयर पदमा इस्तियाक अहमद खानलाई उम्मेदवार बनाउने भएको छ । सिद्धार्थनगर नपा–१ बेलहिया निवासी खान तत्कालीन संविधान सभासदस्य समेत हुन् ।
नेपाली कांग्रेस सिद्धार्थनगर नगर समितिको मंगलबार बिहान सम्पन्न बैठकले उक्त पदमा खानलाई उमेदवार बनाउने निर्णय गर्दै उनको नाम सर्वसम्मत रुपमा सिफारिस गरेको हो ।
कांग्रेस सिद्धार्थनगर समितिका सभापति कोसिस बहादुर खड्काले जनभावना अनुरुप खानलाई मेयर पदको उम्मेदवारमा सिफरिश गरिएको बताए ।
उनका अनुसार समितिले चार चरणको छलफलपछि खानको नाम सिफारिस गरेको हो । उक्त पदमा आकांक्षी रहेका सबैलाई समितिले छलफलमा राखेर जसको नाम सिफारिस भए पनि उनीहरुबीच एकले अर्कोलाई सहयोग गर्ने प्रतिबद्धता भएको खड्काले जनाए ।
