कञ्चनपुर — कञ्चनपुरको भीमदत्त नगरपालकाकी उपप्रमुख सुशीला चन्द सिंहले यसपालि प्रमुखमा दाबी गरेकी छन् । उनी ०७४ को स्थानीय निर्वाचनमा जिल्लामा कांग्रेसबाट निर्वाचित एक्ली उपप्रमुख उनले पालिकाको विकाससँगै सबैलाई मिलाएर लैजान सक्ने भन्दै प्रमुखका लागि दाबी गरेकी हुन् । तर उनलाई प्रमुख पाउने आस भने छैन ।

अधिकांश पुरुष दाबेदार रहेका कारण उनीहरूमध्ये नै प्रमुखको उम्मेदवार हुने उनको बुझाइ छ । ‘विगतको कामको मूल्यांकन र भावी योजनाबारे छलफल गरेर उम्मेदवार बनाउनुपर्‍यो,’ उनले भनिन्, ‘उपप्रमुखपछिको पालो प्रमुख नै हो, महिला भएकै कारण हामीले प्रमुख नपाउने हुनु हुँदैन ।’ उनले उपप्रमुख हुँदा ५ वर्ष गरेको कामको मूल्यांकन गर्न पनि प्रमुखमा उम्मेदवार बनाउनुपर्ने बताइन् । उनले आफूलाई अन्य उम्मेदवारभन्दा बलियो दाबी गरेकी छन् । भीमदत्तमा कांग्रेसका १० जना प्रमुखका आकांक्षी देखिएका छ । 

बेदकोट नगरपालिकाकी उपप्रमुख सुशीला सिंहले पनि प्रमुखमा दाबी गरेकी छन् । एमालेबाट बेदकोटमा दुई जनाले दाबी गरेका छन् । बेदकोटमा एमालेबाट एक पुरुष र एक महिलाले मात्रै आकांक्षा देखाएका छन् । सुरुमा तीन जना आकांक्षी भए पनि एक पछि हटेका थिए । उनले पाँच वर्षको कार्यकालमा सबैको मन जितेर काम गरेका कारण पनि आफू प्रमुख पदको दाबेदार रहेको बताइन् । बेदकोटमा एमालेबाटै निर्वाचित भएका प्रमुख अशोककुमार चन्द नेकपा एकीकृत समाजवादीमा प्रवेश गरेका छन् । पार्टी विभाजन भएका बेला सबैको मन जितेर जानुपर्ने भएकाले पनि महिलालाई अघि सार्न उपयुक्त हुने उनले बताइन् । उनले भनिन्, ‘एक कार्यकालको अनुभवले आगामी कार्यकालमा काम गरेर देखाउन सकिन्छ ।’ 

प्रमुखमा दाबी गर्ने अर्की उपप्रमुख जिल्लाको दक्षिणी क्षेत्र पुनर्वास नगरपालिकाकी शारदा विष्ट हुन् । उनी पनि एमालेबाटै निर्वाचित भएकी हुन् । कोरोना संक्रमणसँगै पहिलो पटक स्थानीय तहमा जाँदा धेरै काम गर्ने इच्छा हुँदाहुँदै पनि नसकिएका कारण यसपटक प्रमुखमै दाबी गरिएको उनले बताइन् । सीमा क्षेत्रका समस्यादेखि आधारभूत समस्याहरू समाधान गर्नमै ५ वर्ष बितेको उनले बताइन् ।