इलाम — इलाम नगरपालिका–६ चुरेघाँटीनजिकै रहेको गुम्बाडाँडामा सामूहिक अन्त्येष्टिका लागि ३ जनाको शव पुर्‍याउनुअगावै रुवाबासी सुरु भइसकेको थियो ।

घोस गाउँका विराज पाख्रिनको घर पहिरोले पुरिँदा ज्यान गुमाएका तीन जनाको शव एकसाथ त्यहाँ पुर्‍याउँदा स्थानीयमा कोलाहल मच्चियो ।

लाठेहरूले चिता तयार गरेपछि शव राखियो । बौद्ध संस्कारअनुसार दागबत्ती दिएर आगो सल्काएपछि स्थानीयले मट्टी दिन थाले । मलामीको समूहमा ७६ वर्षीय मनबहादुर लिम्बू पनि थिए । भीड हटेपछि उनले पनि पाख्रिन परिवारका सदस्यलाई मट्टी दिए, आगो दनदनी बल्न थाल्यो ।

हेर्दाहेर्दै मनबहादुरका आँखा रसाए । ‘छिमेकीले छोडे, उनीहरू एकै ठाउँ सँगै गए, काल आएपछि कसको के नै पो लाग्दो रहेछ र ?’ उनी दुखेसो पोख्दै थिए । मनबहादुरले यसो भनिरहँदा उपस्थित मलामीजन झनै भावुक देखिए ।

इलामकै सूर्योदय–१ का राजु क्षेत्रीको घर माथिदेखि खसेको पहिरोले पुर्दा ज्यान गुमाएका ५ जनाको पनि सोमबार सामूहिक दाहसंस्कार गरियो । इलामको फिक्कल अस्पतालमा पोस्टमार्टम गरेर मानेभन्ज्याङ घाटमा पुर्‍याएर उनीहरूको अन्त्येष्टि गरिएको थियो । ‘थुप्रै आफन्तलाई दागबत्ती दिइयो, कालगतिले आफूभन्दा सानो उमेरकालाई पनि लग्यो, ठूलालाई पनि लग्यो । हाम्रो परिवारमा प्रकृतिको घटना पहिलोचोटि भएको हो । कति समाचारमा दुर्घटना परेकाहरूको सामूहिक अन्त्येष्टि गरेको सुनिन्थ्यो आज आफैं व्यहोर्नुपर्‍यो,’ मृतक मनमाया क्षेत्रीका भाइ देवी क्षेत्रीले भने ।

इलाम पहिरोमा ज्यान गुमाएका ३९ मध्ये अधिकांशको सोमबार अन्त्येष्टि गरिएको छ । मानेभन्ज्याङका ५ र घोषका ३ तथा देउमाईका ७ मध्ये ३ जनालाई एक ठाउँ र ४ जनालाई २ ठाउँ गरी ३ ठाउँमा अन्त्येष्टि गरिएको छ । यस्तै सन्दकपुर र माङसेबुङका अधिकांश मृतकको सामूहिक अन्त्येष्टि गरिएको थियो ।