सुनसरी — महालेखा परीक्षकको कार्यालय, खरिद प्रशासन र खरिद शाखाले कालोसूचीमा राखेर जरिवाना तिराउनुपर्ने राय दिए पनि बीपी कोइराला स्वास्थ्य विज्ञान प्रतिष्ठानले एक कम्पनीलाई ३० लाख रुपैयाँ उल्टै भुक्तानी गरेको छ । 

प्रतिष्ठानको अक्सिजन प्लान्ट सर्भिसिङ र मर्मत सम्भार गरेबापत उपकुलपति प्रा.डा. ज्ञानेन्द्र गिरीले डाइग्नोकेनका सञ्चालक विज्ञान अर्याललाई उक्त रकम भुक्तानी गरेका हुन् । महालेखा परीक्षकसहित प्रतिष्ठानको खरिद शाखा, आर्थिक प्रशासन र कानुनी सल्लाहकारले टिप्पणी आदेशमा हिसाब फरफारक नभएसम्म काठमार्डौको डाइग्नोकेन इन्टरनेसनल कम्पनीलाई अक्सिजन प्लान्ट सर्भिसिङको भुक्तानी नगर्न राय दिएका थिए ।

उपकुलपति गिरीले डाइग्नोकेन इन्टरनेसनललाई यसै साता भुक्तानी दिएका हुन् । डाइग्नोकेनलाई दिने भुक्तानीका बारेमा प्रतिष्ठानको आर्थिक प्रशासनले गत वैशाख ९ गते उपकुलपतिको नाममा पत्र लेख्दै डाइग्नोकेनबाट क्षतिपूर्ति रकम ३२ लाख ४० हजार ६ सय ४० रुपैयाँ लिनुपर्ने राय दिएको थियो ।

प्रतिष्ठानमा जडान गरिएको अक्सिजन प्लान्ट मर्मत सम्भारको हिसाब दुरुस्त नभएको र प्लान्ट आपूर्ति गर्दा तोकिएको समय एक सय २० दिनभन्दा पछि मात्र ल्याएर जडान गरे पनि परीक्षण र सञ्चालनसमेत नगरी बेपत्ता भएपछि महालेखाले प्रतिदिन ०.५ प्रतिशतको दरले हर्जना भराउनुपर्ने उल्लेख गरेर पत्र लेखेको थियो । महालेखाले डाइग्नोकेनका सञ्चालक विज्ञान अर्यालबाट ३१ लाख रुपैयाँ हर्जना तिराउनुपर्ने भनेर प्रतिष्ठानलाई पत्र नै लेखेको थियो । ३ करोड २४ लाख रुपैयाँ लागतमा ०७६ माघ २४ गते जडान गरिएको अक्सिजन प्लान्ट बिग्रँदा हालसम्ममा ५५ लाख रुपैयाँ अतिरिक्त खर्च भइसकेको छ । थप २५ लाख रुपैयाँ खर्च गरेर सर्भिसिङ गर्ने तयारी हुँदै छ ।

टेन्डर पारेर पनि तोकिएको समयमा आपूर्ति नगरेपछि पूर्वउपकुलपति प्रा.डा. राजकुमार रौनियारले डाइग्नोकेन र अर्याललाई कालोसूचीमा राख्ने निर्णय गरिसकेका थिए । टिप्पणीमा भनिएको छ,’ ‘डाइग्नोकेन इन्टरनेसनललाई सार्वजनिक खरिद ऐन तथा नियमावलीबमोजिम कालोसूचीमा राखी कारबाही गर्न सिफारिस भएकोमा तत्कालीन उपकुलपतिबाट खरिद शाखालाई तोकआदेश भएकोमा सो निर्णय कार्यान्वयन भएको देखिँदैन । उक्त कम्पनीबाट थप कार्यहरू गराउन कानुनविपरीत रहेको र यस सम्बन्धमा प्रतिष्ठानको कानुनी सल्लाहकारबाट समेत राय लिइसक्नुभएको व्यहोरा श्रीमान्मा अवगत नै छ ।’