विलियम शेक्सपियरको नाटक ‘एज यू लाइक इट’ को पात्र ज्याक्सको एकालाप अंश :
सारा संसार हो रंगमञ्च एउटा नर र नारी हुन् पात्र केवल गर्छन् प्रस्थान र प्रवेश ती ।
हरेक मान्छे आफ्नो जीवनमा निर्वाह गर्छ
सात भूमिका ।
पहिलो— नवजात शिशु
च्याहाँ च्याहाँ रुँदो र उल्टी गर्दाे
आमाको अँगालोमा ।
त्यसपछि— पिन्चे स्कुली केटो
बिहानझैं चहकिलो अनुहार छ जसको
झोला भिरेर जो
अनिच्छापूर्वक
शङ्खेकिरासरी घिस्रिन्छ स्कुलतिर ।
अनि— प्रेमी
जो प्रेमिकाको आँखीभुइँमाथि रचिएको
उदास गीत गुनगुनाउँदै
सुस्केरा हाल्छ खलाँतीझैं ।
पश्चात्— सिपाही
जो दाह्रीले देखिन्छ चितुवाझैं
खान्छ उदेकलाग्दो कसम
छ भोको मान–सम्मानको
लड्न–भिड्न सदा तम्तयार
खोज्ने गर्छ जो क्षणभङ्गुर ख्याति
तोपको सामुन्ने पर्दासमेत ।
र, त्यसपछि— न्यायाधीश
गतिलो भोजनले लागेको छ भुँडी उसको
पालेको छ भलाद्मी पाराको दाह्री
नजर छ उसको तीक्ष्ण
news-wrap-secपुरानो उखान हालेर, ताजा उदाहरण दिन
जो छ पारङ्गत
र, यसरी निर्वाह गर्छ उसले आफ्नो भूमिका ।
अब सुरु हुन्छ
छैटौं भूमिका
चप्पल पड्काउँदै हिँड्छ एउटा दुब्लो विदूषक
नाकको डाँडीमा छ चस्मा
सानो झोला झुन्डिएको छ काँधमा
जवान हुँदा लाउने गरेका मोजा
अहिले त सुकेका पिँडुलामा ह्वार्लाङ ह्वार्लाङ हुन्छन्
पुरुषोचित गह्रुँगो स्वर एक जमानाको
news-wrap-secपुनः भएको छ बालसुलभ तिखो ।
अन्तिम दृश्य—
हुन्छ अब पटाक्षेप
यो विचित्र घटनापूर्ण इतिहासको
सुरु हुन्छ मान्छेको
दोस्रो बाल्यकाल
स्मृतिबिनाको, दाँतबिनाको, आँखाबिनाको, स्वादबिनाको
सबथोकबिनाको ।
(शेक्सपियरको नाटक ‘एज यू लाइक इट’ को पात्र ज्याक्सको यस एकालापलाई विनोदविक्रम केसीले अनुवाद गरेका हुन् ।)
