म्याग्दी — नेकपा एमाले धवलागिरी गाउँपालिका कमिटी अध्यक्ष होमबहादुर थापा पालिका प्रमुख/उपप्रमुखमा टिकट नपाएपछि राप्रपाबाट उम्मेदवार बनेका छन् ।

एमालेले गण्डकी प्रदेश कमिटीले मनोनयन दर्ता गर्ने दोस्रो दिन सोमबार मात्र धवलागिरी पालिकामा थमसरा पुनलाई प्रमुखमा दोहोर्‍याउने र प्रगति कार्कीलाई उपप्रमुखमा उम्मेदवार बनाउने निर्णय गरेका थिए । पालिका प्रमुखमा दाबी गरेका थापाले पार्टी निर्णयमा असन्तुष्ट भइ ‘क्षमता’ देखाउने भन्दै राप्रपाबाट प्रमुख पदमा मनोनयन दर्ता गरेका थिए ।

धवलागिरी गाउँपालिकाको प्रमुख, उपप्रमुख पदमा पार्टीको टिकट वितरणमा चर्को असहमति भएको जानकारी विवाद सुल्झाउन बेनीबाट एमाले केन्द्रीय सदस्य, जिल्ला अध्यक्ष समेतको टोली धवलागिरी पुग्दा थापाले राप्रपाबाट मनोनयन दर्ता गरी फर्केका थिए । थापाले एमाले टोलीसँग भेट्न समेत मानेनन् ।

‘पालिकामा टिकट वितरणमा केही असन्तुष्टि देखियो । समस्या सुल्झाउन हामी पुग्दा असन्तुष्ट रहनु भएको होमबहादुर थापाजी आफ्नो मनोनयन दर्ता गरी फर्कनु भएको थियो । हाम्रो भेट र कुनाकानी हुन पाएन,’ एमाले जिल्ला अध्यक्ष देवेन्द्रबहादुर केसीले भने, ‘उहाँले आवेगमा लिएको निर्णय फिर्ता गर्नु हुन्छ भन्ने विश्वास लिएका छौं ।’

आमाको चुनाव चिह्न रुख, छोरा हँसिया हथौडा