म्याग्दी — भिरालो पाखोमा सडक खनिएपछि गएको पहिरोले रघुगंगा गाउँपालिका–३ पिप्ले गलेश्वरका २१ घर जोखिममा परेका छन् । गलेश्वर–भगवती–बेग सडक कालोपत्र गर्ने क्रममा भिरालो पाखोमा सडक खनिएको थियो । दुई किलोमिटर सडक खण्ड खनिएको सतीपहरादेखि च्युडीस्वारासम्मको क्षेत्रमा भूक्षय हुन थालेपछि बस्ती जोखिममा परेको हो ।

चुडीस्वाँरामा एक वर्षअघिसम्म गाडी गुड्ने सडक थियो । तर अहिले त्यसको कुनै नामोनिसान देखिन्न । निर्माणको एक वर्षसम्म पनि नियामक पूर्वाधार विकास कार्यालय र ठेकेदार कम्पनीले पहिरो रोकथाममा कुनै काम नगर्दा असुरक्षा बढेको हो । ‘सडकसँग जोडिएको बजार क्षेत्र भनेर गाउँको पाखोबारी बेचेर यहाँ आइयो तर सडकले जोगी बनायो,’ स्थानीय भरत मल्लले भने, ‘पानी ठूलो पर्दा दिनमै पनि डर लाग्छ । राति पारि गलेश्वरमा गएर बस्ने गरेका छौं ।’

च्युडीस्वाँरा पाखोमा पहिरो गएको यो पहिलोपटक होइन । गत वर्ष बर्खामा पहिरोले जोखिम भएपछि स्थानीयलाई सुरक्षित स्थानमा सारिएको थियो । यसपटक पनि पहिरोले बेनी–जोमसोम सडक लगातार अवरुद्ध भइरहेको छ । यातायात सञ्चालन गर्न दिनहुँ डोजर लगाउँदा झन् पहिरो बगेर बस्ती जोखिममा परेको हो ।

पहिरोले बेनी–जोमसोम सडकको राहुघाट खोलामाथि निर्मित मोटरेबल पुल पनि जोखिममा परेको छ । सडकमा थुप्रिएको लेदोमा फसेका सवारीसाधन एक्स्काभेटरको सहायताले वारपार गराइएको छ । जिल्लाको उत्तरी भेगका दुई गाउँपालिका र मुस्ताङ जाने र फर्कने मोटरसाइकललगायत साना तथा ठूला गाडीलाई उक्त खण्ड पार गराएको ३ सयदेखि ५ सय रुपैयाँ असुल्ने गरिएको छ ।

गलेश्वर–पिप्ले–भगवती सडक नालीसहित ८ मिटर चौडा कालोपत्र तहमा स्तरवृद्धि गर्न एपेक्स–खड्का जेभी काठमाडौंले भ्याटबाहेक १८ करोड ४१ लाख ८ सय ३८ रुपैयाँमा ठेक्का लिएको थियो । ‘गलेश्वर–भगवती सडकको सुरुको २ किमि खण्डमा पहिरोले पूरै जमिन बगेको हुँदा पुनः सडक निर्माण सम्भव छैन । त्यसैले एलाइन्मेन्ट परिवर्तन गरेका छौं । समयमा निर्माण व्यवसायी परिचालन नहुँदा पनि समस्या आएको हो,’ पूर्वाधार विकास कार्यालयका इन्जिनियर सन्तोष पोख्रेलले भने, ‘तत्कालका लागि पिप्लेसम्म रघुगंगा जलविद्युत् आयोजनाले प्रयोग गरेको सडक प्रयोगमा ल्याएका छौं ।’