गोरखा — रोगप्रतिरोधी क्षमता बढाउन गाउँपालिकाले संक्रमितलाई घरै पुगेर जिंक चक्की, भिटामिन सी, इमुनोकेयरलगायतका सामग्री संक्रमितलाई उपलब्ध गराउन थालेको छ ।

होम आइसोलेसनमा बसेका सहिद लखन गाउँपालिका–९ का ७० वर्षीय संक्रमितको घरमै स्वास्थ्यकर्मी, जनप्रतिनिधि पुगेर दैनिक सरसफाइमा आवश्यक पर्ने स्वास्थ्य सामग्री र औषधि उपलब्ध गराए । होम आइसोलेसनमा बसेका १ सय ८७ जनालाई सामग्री वितरण गर्ने गाउँपालिकाका स्वास्थ्य शाखा प्रमुख वीरेन्द्र श्रेष्ठले बताए । 

‘होम आइसोलेसनमा बसेकालाई स्वास्थ्य सामग्री वितरण चलिरहेको छ,’ श्रेष्ठले भने, ‘कोही संक्रमित थपिनुभयो भने पनि स्वास्थ्य सामग्री वितरणलाई निरन्तरता दिन्छौं ।’ गाउँपालिकाले ज्वरो नाप्ने थर्मोमिटर, सिटामोल, जीवनजल, सेनिटाइजर, १५ पिस मास्क, झुल, साबुन, रुमाल, नङकट, महिलाका लागि प्याडलगायतका सामग्री संक्रमितलाई उपलब्ध गराएको उनले बताए । भने, ‘अहिलेसम्म विभिन्न संघसंस्थाबाट सहयोग प्राप्त भएको छ ।’ संक्रमितलाई मनोसामाजिक परामर्श पनि उपलब्ध गराउँदै आएको उनले बताए ।

घरमै पुग्दा जनप्रतिनिधि, स्वास्थ्यकर्मीलाई संक्रमितको अवस्था बुझ्न सहज भएको गाउँपालिकाका अध्यक्ष रमेश थापाले बताए । ‘संक्रमितको होम आइसोलेसनको बसाइँ व्यवस्थित र सहज होस् भनेर घरघरमा पुगेका हौं,’ उनले भने, ‘फेरि हामीले अत्यावश्यक सामग्री उपलब्ध गराएका छौं ।’ प्रत्येक स्वास्थ्य संस्थामा फोकल पर्सन तोकेर संक्रमितको निगरानी गरिएको पनि उनले सुनाए । उनका अनुसार प्रत्येक संक्रमितको स्वास्थ्य अवस्थाबारे पनि दैनिक रिपोर्टिङ भइरहेको छ । उक्त गाउँपालिकामा संक्रमण पुष्टि भएका १ सय ८७ मध्ये ५७ जना निको भइसकेका छन् ।