पोखरा — सबै सरकारी अस्पतालमा ५० प्रतिशत बेड कोरोना संक्रमितका लागि छुट्याउन स्वास्थ्य मन्त्रालयले वैशाख २ मा निर्देशन दियो । पोखरामा संक्रमितको संख्या दिनदिनै बढ्दासमेत संघअन्तर्गतको पोखरा स्वास्थ्य विज्ञान प्रतिष्ठानले भने कुनै तयारी गरेन ।

प्रदेशमा सरकारीमध्येकै ठूलो यो अस्पतालले वैशाख १६ बाट ३ सय ७० मध्ये जम्मा ५० बेड छुट्याएर उपचार थाल्यो ।

यसअघि प्रदेशअन्तर्गत पोखरा–३० मा रहेको संक्रामक तथा सरुवा रोग अस्पतालमा संक्रमितलाई राखिएको थियो । १५ आइसोलेसन र ४० एचडीयू बेड भएको अस्पतालमा जनशक्ति अभावमा आईसीयू सञ्चालनमा छैन । ५० बेडको संक्रामक अस्पताल भरिएपछि बल्ल प्रतिष्ठान तातिएको थियो ।

वैशाख पहिलो सातादेखि नै गम्भीर प्रकृतिका संक्रमित चर्को शुल्क तिरेर निजी अस्पतालमा उपचार गराउन बाध्य भए । अस्पतालले कोरोना संक्रमितको उपचार थालिन्जेल गण्डकी प्रदेश र विशेष गरी कास्की जिल्लामा कोरोना तीव्र गतिमा फैलिइसकेको थियो । ५ दिनमै २५ बेड एचडीयू, १५ बेड आईसीयू र १० बेड आइसोलेसन भरिभराउ भयो ।

मन्त्रालयको निर्देशनबमोजिम प्रतिष्ठानअन्तर्गतको पश्चिमाञ्चल क्षेत्रीय अस्पतालले एक सय ८५ बेड कोरोना संक्रमितका लागि छुट्याउनुपर्ने हो । तर अस्पतालले हाल ३८ आइसोलेसन, २५ आईसीयू र ३० एचडीयू गरी ९३ बेड मात्रै छुट्याएको छ । हाल आइसोलेसनमा ३८, आईसीयूमा १७ र एचडीयूमा १६ गरी ७१ संक्रमितले उपचार गराइरहेका छन् । संक्रामक तथा सरुवा रोग अस्पतालमा ५० जनाको उपचार भइरहेको छ ।

त्यसबाहेक नयाँ बनेको प्रसूति भवनमा २ सय एचडीयू बेड विस्तार गर्न अस्पताललाई स्वास्थ्य मन्त्रालयले रकम पठाइसकेको छ । उक्त २ सय बेडका लागि सेन्टर सप्लाइ सिस्टमबाट अक्सिजन पाइपलाइन वायरिङ गर्नुपर्ने हुन्छ । त्यसका लागि गण्डकी प्रदेश सरकारले ६२ लाख रुपैयाँ अस्पताललाई दिने सुनिश्चितता पत्र दिइसकेको छ । तर अस्पतालले अझै पनि बेड विस्तार गर्न सकेको छैन । अस्पतालको आफ्नै अक्सिजन प्लान्ट छैन ।

प्रतिष्ठानका निर्देशक डा. भरतबहादुर खत्रीले बेड अभावमा संक्रमितलाई इमर्जेन्सी वार्डमा राखेर उपचार गर्नु परिरहेको स्विकारे । उनका अनुसार बेड विस्तार गर्न अक्सिजन पाइपलाइन फिटिङका लागि टेन्डर आह्वान गरे पनि नपरेपछि पुनः टेन्डर गर्ने प्रक्रियामा छ । ‘अक्सिजन पाइपलाइन जडान नगरी एचडीयू बेड जडान गर्न मिलेन,’ उनले भने, ‘प्रक्रियागत रूपमा जाँदा अझै केही समय लाग्ने भयो ।’ अस्पतालमा बेड विस्तार, लिक्विड अक्सिजन ट्यांक र नयाँ अक्सिजन प्लान्ट जडानका लागि ९ करोड रुपैयाँ संघ सरकारले पठाएको छ । हाल दैनिक एक सयदेखि एक सय ५० सिलिन्डर अक्सिजन उत्पान क्षमताको प्लान्ट राख्न ३ करोड रुपैयाँमा टेन्डर आह्वान गर्ने तयारी रहेको उनले बताए । त्यसबाहेक यसअघि नै रेट्रोफिटिङ योजनाअन्तर्गत अक्सिजन प्लान्ट निर्माणाधीन छ ।