बागलुङ — केही दिनदेखि बडिगाड गाउँपालिकाले २ स्थानमा अस्थायी प्रहरी पोस्ट राखेर पालिकाको सिमानामा छिर्न कडाइ गरेको छ । गुल्मी, गलकोट र बुर्तिवाङ तर्फका नाका सिल गरेर आउजाउमा कडाइ गरिएको हो ।

विवाह भोजमा सरिक वडा ४ को झुलेडाँडाका एकाघरका चार जनाले ज्यान गुमाएपछि पालिका संक्रामक रोग नियन्त्रणमा जुरमुराएको हो । २ साताभित्र ३ जना छिमेकीको पनि कोरोनाकै कारण मृत्यु भइसकेको छ ।

वडा ७ र ९ का एक एक जना गरी गाउँपालिकाभित्रै ९ जनाको ज्यान गएपछि पालिकाले संक्रमितको खोजी, उद्धारसहित उपचारलाई पनि तीव्र बनाएको स्वास्थ्य शाखा प्रमुख चूडामणि कँडेलले बताए । घरघरमा पुगेर संक्रमित खोजी गर्ने, संक्रमितलाई उपचारको पहुँचमा ल्याउने कामसमेत गरेको हो ।

‘अहिले घरघरमा संक्रमितको खोजी भइरहेको छ, सामान्य बिरामी भए पनि उपचार र पीसीआर गराउने काममा लागेका छौं,’ कँडेलले भने, ‘आउजाउ ठप्प पारेर खोजी गरिएकाले साता दिनमै संक्रमण नियन्त्रणमा आउने अपेक्षा छ ।’ झुलेडाँडामा दुई–तीन दिन बिराएर पीसीआर भइरहेको उनले बताए । यहाँ ६८ सक्रिय संक्रमित छन् ।