काठमाडौँ — आसन्न निर्वाचनमा देशभर मूलतः नेपाली कांग्रेस नेतृत्वको सत्ता गठबन्धन र नेकपा एमाले नेतृत्वको अर्को गठबन्धनबीच मुख्य प्रतिस्पर्धा छ । अहिले उम्मेदवारहरू मतदाता रिझाउन घरदैलो गरिरहेका छन् ।

यसै सन्दर्भमा ललितपुर क्षेत्र नं. १ मा सत्ता गठबन्धनबाट नेपाली कांग्रेसका प्रतिनिधिसभा सदस्य उम्मेदवार उदयशमशेर राणासँग प्रकाश धौलाकोटीले गरेको कुराकानी : 

मतदानको दिन नजिकिँदै छ, चुनावी प्रचार कस्तो भइरहेको छ ? 

हाम्रो गठबन्धन छ, यहाँ संयुक्तरुपमा प्रचारप्रसार गरिरहेका छौं । त्यहीअनुसार निर्वाचन आचारसंहिताभित्र रहेर हामीले टोल–टोलमा पुगेर मतदातासँग भेट्ने र मत माग्ने गरिरहेका छौं । गएको पाँच वर्षमा आशातित काम हुन नसकेका कारण यसपटक मलाई मतदाताहरूले निकै माया र स्नेह देखाउनुभएको छ । गठबन्धनको पक्षमा राम्रो माहोल बनेको छ । 

मतदाताको प्रतिक्रिया के छ ? गुनासाहरू पनि होलान् नि ? 

यो आमनिर्वाचन हो, तर मतदाताको गुनासो विकास निर्माणसँगै जोडिएको छ । क्षेत्रमा विकास भएन, हामीले चुनेको जनप्रतिनिधिले हाम्रो समस्याहरूलाई बुझिदिनुभएन भन्ने गुनासो नै धेरै सुनिरहेको छु । कतिपय ठाउँमा भने पहिले एउटा सेलिब्रेटीलाई भोट हाल्यौं र जितायौं । तर, सेलिब्रेटीबाट विकास हुन सकेन । बरू तपाईं चुनाव हारेपनि हामीसँगै रहनुभयो, अब तपाईंले नै हाम्रो समस्याहरू बुझिदिनुपर्छ भन्ने कुरा पनि आएको छ । कार्यकर्ता र मतदाता सबै उत्साहित हुनुहुन्छ । तर, मतदाताको मनोदशा- 'हामी भोट दिन्छौं, तर जितेपछि बिर्सिंनुहोला कि? हाम्रो जनप्रतिनिधि हाम्रो सुखदुःखमा हामीसँगै हुनुपर्छ,' भन्ने छ । 

तपाईंका चुनावी एजेन्डाहरू के–के हुन् ? 

सबैभन्दा धेरै माग पूर्वाधारकै हो । यहाँको गोदावरी नगरपालिका क्षेत्रमा अहिले पनि सडकको समस्या छ । सबैतिर सहज पुहँच बनेको छैन । फेरि गएको पाँच वर्षमा केही कामै भएन, विगतमा बनेका सडकहरू पनि मर्मत सम्भारको काम भएको छैन, जताततै लथालिङ्ग बनेको अवस्था छ । धेरै साथीहरूले सडक राम्रो बनाइदिनुस्, कालोपत्रे गरिदिनुस्, टोलमा एम्बुलेन्स आउने अवस्था हुनुपर्‍यो भन्नेसम्मका कुराहरू गर्नुहुन्छ । त्यस्तै, ढल र खानेपानी योजनाहरूको माग पनि धेरै छ । तर, त्योभन्दा ठूलो समस्या भने मैले यहाँ बेरोजगारीको देखिरहेको छु । 

पढेलेखेका युवाहरूले समेत रोजगारी पाइहाल्ने अवस्था छैन । जनशक्तिको जहाँ आवश्यक छ, त्यहाँ दक्ष जनशक्ति छैन । जो रोजगारी चाहिरहेको छ, ऊसँग दक्षता छैन । धेरै युवाहरू बेरोजगार हुनुपरेको अवस्था छ । रोजगारीको वातावरण कसरी बनाउने भनेर मैले योजनाहरू पनि प्रस्तुत गरेको छु । 

मैले क्षेत्रका समस्याहरूबारे चुनावमा होइन, त्योभन्दा पहिले देखि नै निरन्तर छलफल गर्ने र आफ्नो ठाउँबाट सम्बोधन गर्ने गरिरहेको हुँ । अहिले चुनावमा मतदाताको बीचमा जाँदा पनि मैले उही कुरा दोहोर्‍याएको छु । कुन समस्यालाई कसरी सम्बोधन गर्ने भनेर मसँग प्रष्ट योजनाहरू छन् । त्यसका लागि स्रोतको, बजेटको आवश्यक पर्छ । यहाँ स्थानीय तहहरू अहिले गठबन्धनले नै जितेका छन् । त्यसकारण स्थानीय सरकार, प्रदेश सरकार र संघीय सरकार मिलेर अन्य सरोकारवालासँग समेत छलफल गरेर, समन्वय गरेर काम गर्छु भनेर मतदाताको बीचमा गइरहेको छु । 

०७४ मा तपाईं पराजित हुनुभयो । अहिले पनि पुरानै प्रतिस्पर्धीसँग भीड्दै हुनुहुन्छ, कसरी हेर्नुभएको छ ?

हाम्रो क्षेत्रमा नेपाली कांग्रेस आफैं बलियो संगठन भएको पार्टी हो । यसपटक गठबन्धन पनि भएका कारण हामीलाई अप्ठेरो छैन । यो क्षेत्रमा ३० वटा वडाहरू छन् । यहाँ कांग्रेसले मात्रै २२ वडा जितेको छ । त्यस्तै, माओवादी केन्द्रले ५ वटा जितेको छ । एमालेले जितेको ३ वटा वडामात्रै हो । वडाध्यक्षहरूले पाएको मतको आधारमा म करिब ११ हजार मतले अगाडि छु । त्यसमाथि उहाँलाई जिताएपछि उहाँले काम गर्न सक्नुभएन भन्ने गुनासो धेरै सुनिरहेको छु, त्यसैले यसपालि हाम्रो जित निश्चित छ । 

स्थानीय तहको मतकै आधारमा जित निश्चित भन्न मिल्छ र ?

म विगत २५ वर्षदेखि यही क्षेत्रबाट राजनीति गरिरहेको छु । चुनाव जित्दा पनि, हार्दा पनि म यही क्षेत्रका जनतासँग रहेर काम गर्दै आएको छु । मैले अर्थ राज्यमन्त्री भएर पनि काम गरें । म तरुण दलको अध्यक्षसमेत भएँ, तर मलाई अहिलेसम्म कसैले उदयशमशेरले यो काम गर्दा मेरो यति पैसा खाइदियो भनेर भन्न पाउने मौका मैले दिएको छैन । म पैसा कमाउन राजनीतिमा आएको होइन । वास्तवमै जनताको, राष्ट्रको सेवा गर्छु भन्ने भावनाले म राजनीतिमा लागेको हुँ ।