काठमाडौँ — सूरज हुआ मद्धम, चाँद जलने लगा...यो गीत हर नेपालीका कानमा वर्षौंदेखि गुन्जिरहेको छ । गीत गुनगुनाउनेहरू त्यसका गायकलाई सम्झिरहन्छन् ।

‘कल हो ना हो’ होस् वा ‘में अगर कहुँ’ । जसका दर्जनौं गीतहरू नेपालीहरू मुक्तकण्ठले गाउँछन् । उनै गायक सोनु निगमले काठमाडौंको चिसो रातलाई न्यानो बनाउने गरी सांगीतिक प्रस्तुति दिए । 

लोकप्रिय गायकलाई प्रत्यक्ष सुन्न दर्शक लालायित देखिन्थे । बुधबार साँझ हायात होटलको मैदान संगीतप्रेमीले तातिएको थियो । ‘सोनु निगम लाइभ इन नेपाल’ को मैदानमा सबैलाई प्रतीक्षा थियो–उनको इन्ट्रीको । कोही टाढैबाट श्रद्धाका हातहरू फैलाउन चाहन्थे त कोही फूलका गुच्छाहरू सोनु निगमसम्म पुर्‍याउने अभिलाषामा थिए । सबैका आँखा चमकधमकले सजिएको स्टेजतिरै थियो ।

लागिरहेको थियो, ‘उनी हिन्दी गीत गाउँदै प्रेक्षालयमा देखापर्छन् ।’ तर उनको सरप्राइज्ड मीठो थियो । उनी नेपाली गीत ‘उकाली ओराली’ गाउँदै स्टेज चढे । भीआईपी र प्लाटिनम श्रेणीको रोहमा भएका दर्शकले त उनलाई सजिलै देख्थे । तर जनरल श्रेणीमा रहेका दर्शकहरूलाई भने स्टेज चढेका सोनु निगम देख्न कसरतै गर्नुपर्थ्यो ।

कोही एकले अर्कालाई बोक्दै प्रत्यक्ष गाइरहेका आफ्ना प्रिय गायकलाई हेर्न थाले । र, कोहीले भन्न थाले, ‘आई लभ यु सोनु निगम ।’ नेपाली दर्शकहरूमा सोनु निगम क्रेज यो दृश्यबाट देखिन्थ्यो । लामो कपाल र कालो चस्मा लगाएका सोनु निगमलाई दर्शकहरूले हुटिङमार्फत स्वागत गरे ।

सोनु निगमको स्वरमा आधा दर्जन बढी नेपाली गीतहरू छन् । त्यसमध्ये फिल्म ‘सिमाना’ को ‘उकाली ओराली गर्दै’, ‘फूलको डाली डालीमा’ र फिल्म ‘बादलपारि’ को गीत ‘यो जिन्दगीले के गर्‍यो के गर्‍यो’ निकै चर्चित छन् । सोनुले आफ्ना नेपाली गीतहरू पनि नेपाली दर्शकसामु प्रस्तुत गरे ।

सोनु बुधबार दिउँसो मात्र नेपाल आइपुगेका थिए । उनले दर्शकहरूलाई सांगीतिक कार्यक्रममा आउन निम्तोसमेत दिएका थिए । उनको निम्तोलाई स्विकारेर आएका दर्शकहरूलाई उनले भरपूर नचाए । गीतमा झुमेका दर्शकहरूसँग सोनुले अन्तरक्रिया पनि गर्न भ्याए । गाउने क्रममा सोनु निगमले सम्झिए, ‘मैले गाउन थालेकै ४७ वर्ष पुगेछ ।’ 

हुन त उनी ५१ वर्ष लागिसके । उनले ४ वर्षको उमेरदेखि गाउन थालेका थिए । सुरुमा उनी आफ्ना बुबासँग विवाह र पार्टीहरूमा गीत गाउँथे । ३० जुलाई १९७३ मा भारतको फरिदाबाद, हरियाणामा जन्मिएका सोनुले शास्त्रीय संगीतको शिक्षा उस्ताद गुलाम मुस्तफा खानबाट लिएका हुन् ।

सोनुले १९९० मा फिल्म ‘जनम’ का लागि पहिलो गीत गाए तर त्यो रिलिज भएन । सन् १९९२ मा टेलिभिजन कार्यक्रम ‘तलास’ का लागि गाए । उनलाई पहिलो सफलता भने १९९३ मा रिलिज भएको फिल्म ‘आजा मेरी जान’ को गीत ‘ओ आसमान वाले जमी पर’ ले दियो । त्यसपछि उनले ‘बेवफा सनम’ (१९९५) र ‘सन्देशे आते हैं’ (१९९७) जस्ता हिट गाना गाए । त्यसपछि ‘अच्छा सिला दिया तुने मेरे प्यार का’ बाट त उनको परिचय झनै फैलियो । 

१९९९ मा उनका पहिलो सोलो एल्बम ‘दिवाना’ आयो । जसले उनी भारतीय संगीतका एक पृथक् नाम बने । अझ कल हो ना हो (२००३) फिल्मको मुख्य गीत ‘कल हो ना हो’ पछि उनले पछाडि फर्केर हेर्नु नै परेन । सोनु निगमले हिन्दीका साथै कन्नड, असमिया, पञ्जाबी, बंगाली, तमिल, मराठीका साथै नेपाली भाषामा पनि थुप्रै गीत गाएका छन् । त्यसकारण पनि उनको गायकीका प्रशंसक थुप्रै भाषीका छन् ।

सोनु आफ्ना गीतका अंशहरू गाउँदै थिए । जस्तो कि ‘तुने तो पल भर में’ गाउँदा जोडी दर्शकहरू आफूलाई फिल्मी रूपमा प्रस्तुत गरिरहेका थिए । उनले ‘अब मुझे रात दिन’ गीत गाउनुअघि जीवनको एउटा मीठो क्षण सेयर गरे । ‘यो गीत गाएर मैले उतिबेला आफ्नी प्रेमिकालाई प्रेम प्रस्ताव राखेको थिएँ ।’ यसरी तीन घण्टा लगातार सोनुले आफ्नो जादुमयी स्वरमा दर्शकहरूलाई मन्त्रमुग्ध बनाइरहे ।

नेपाल आइरहन्छन् बलिउड कलाकार

नेपालमा भारतीय कलाकारहरू आउनु नौलो कुरा हैन । यसै वर्ष पनि थुप्रै भारतीय कलाकारहरू नेपाल आइसकेका छन् । र, यो आवतजावतको क्रम चली नै रहेको छ । कोही विभिन्न समारोह तथा सांगीतिक कार्यक्रममा भाग लिन आउँछन् त कोही पारिवारिक र व्यक्तिगत भ्रमण गर्न । भ्रमण तथा बिदा मनाउन आउने कतिपय कलाकार भने आए–गएको पत्तै हुन्न । पछिल्लो तीन वर्षयता थुप्रै कलाकार कार्यक्रमका लागि नेपाल आएका छन् ।

२०८० मंसिरमा बलिउडका चर्चित गायक अरिजित सिंह नेपालमा पहिलो पटक गुन्जिए । हायातको ग्राउन्डमा उनलाई हजारौं नेपाली दर्शकले सुनेका थिए । अरिजितले ४ घण्टा गाएका थिए । फ्यानहरूलाई अटोग्राफ दिए । २०७९ चैतमा गायक हनी सिंहले पनि हायातकै ग्राउन्डमा दर्शकहरूलाई मन्त्रमुग्ध पारेका थिए ।

हायातकै ग्राउन्डमा पाकिस्तानी चर्चित गायक आतिफ असलम पनि गुन्जिएका थिए । गत नयाँ वर्षको पूर्वसन्ध्यामा उनले आफ्नो प्रस्तुति दिएका थिए । आतिफले यसअघि सन् २०१२ मा दशरथ रंगशालामा पनि नेपाली दर्शकहरूका माझ झुमेका थिए ।

भारतीय कलाकार सुनील ग्रोबर पनि गत मंसिरमा काठमाडौं आए । नयाँ बानेश्वरस्थित एभरेस्ट होटलमा उनले आफ्नो प्रस्तुति दिएका थिए । उनको कार्यक्रममा नेपाली ब्यान्ड कुटुम्बले पनि प्रस्तुति दिएको थियो ।

यही साता मात्र तीन चर्चित बलिउड अभिनेत्रीहरू सन्नी लियोनी, इशा गुप्ता र निया शर्माले नेपालमा प्रस्तुति दिए । उनीहरू भैरहवामा खुलेको क्यासिनोको उद्घाटनमा आएका थिए । लियोनी त पटकपटक नेपाल आइरहेकी छिन् । इशा पनि यसअघि नेपाल आएकी थिइन् ।

गत मंसिरमा बलिउडमा भिलेनको परिचय बनाएका भारतीय अभिनेता प्रदीप रावत पनि नेपाली फिल्म ‘ह्रस्व दीर्घ’ को प्रमोसनका लागि नेपाल आएका थिए । उनको नेपाली फिल्म ‘ह्रस्व दीर्घ’ मा महत्त्वपूर्ण भूमिका थियो । उनीसँगै दक्षिण भारतकी अभिनेत्री कल्याणी पनि नेपाल आएकी थिइन् ।

गत भदौमा फिल्म ‘साम्बाला’ को प्रिमियरमा सहभागी हुन बलिउड निर्देशक अनुराग कश्यप र अभिनेता नवाजुद्दिन सिद्दिकी पनि नेपाल आएका थिए । उनीहरू ‘साम्बला’ को प्रिमियर कार्यक्रममा पनि सहभागी भएका थिए । भारतीय गायिका शिल्पा राव पनि गत वर्षको भदौमा नेपाल आएकी थिइन् । भदौ ८ मा उनले सोल्टी होटलमा सांस्कृतिक कार्यक्रममा प्रस्तुति दिइन् । उनले नेपालीहरूको प्रशंसा गर्दै भनिन्, ‘तपाईंहरू सुन्दर ठाउँमा बस्नुहुन्छ ।’ उनले १४ वटा गीत गाएकी थिइन् ।

चर्चित बलिउड पार्श्व गायक जावेद अलीले पनि गत वर्षको साउनमा पहिलो पटक नेपालमा लाइभ कन्सर्ट गरेका थिए । २०७९ फागुनमा दशरथ रंगशालामा भारतीय गायिका आस्था गिलले पनि दर्शकलाई प्रस्तुति दिएकी थिइन् । उनले आधा दर्जन गीत गाएर दर्शक तताएकी थिइन् ।

त्यतिबेला उनीसँगै चर्चित भारतीय र्‍यापर डिभाइन र किङले पनि प्रस्तुति दिएका थिए । आस्था त्यसअघि वैशाखमा पनि नेपाल आएकी थिइन् । उनले दरबारमार्गस्थित क्लब प्लाटिनममा आयोजित ‘आस्था गिल लाइभ कन्सर्ट’ मा दर्शकहरू झुमाएकी थिइन् । उनले हिट गीत ‘पानी पानी हो गई’, ‘तेरा बज’, ‘डिजेवाले बाबु’ ‘अभी तो पार्टी सुरु हुई है’ लगायतका दर्जन बढी हिट गीत प्रस्तुत गरेकी थिइन् ।